Minisitiri Uwizeyimana Evode yavuze icyatuma u Rwanda rutarangwamo icyaha

Yanditswe na Evariste Nsengimana
Kuya 17 Kamena 2018 saa 06:01
Yasuwe :
0 0

Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, Uwizeyimana Evode, yavuze ko kugira ngo u Rwanda rube igihugu kitarangwamo icyaha bisaba ko buri mudugudu warwo ugikumira kandi buri rwego rukabigiramo uruhare.

Kuri uyu wa Gatandatu ku cyicaro cya Polisi y’Igihugu ku Kacyiru hizihijwe isabukuru y’imyaka 18 Polisi y’u Rwanda imaze ishinzwe.

Uwizeyimana yashimiye Polisi mu bikorwa ikora birimo; kubungabunga amahoro mu gihugu no hanze yacyo ndetse n’icyumweru cyahariwe ibikorwa byayo itegura buri mwaka, aho mu 2018 cyari gifite insanganyamatsiko igira iti “Duture mu mudugudu utarangwamo icyaha.”

Yavuze ko gucunga umutekano ari igikorwa gisaba guhozaho ndetse n’urugendo rugikomeza buri wese akwiye kugiramo uruhare kugira ngo ibimaze kugerwaho bitazasubira inyuma.

Uwizeyimana yavuze ko icyatuma u Rwanda rutarangwamo icyaha ari uko buri wese yashyira imbere gutura mu mudugudu utarangwamo icyaha.

Yagize ati “Gutura mu mudugudu uzira icyaha, bivuze gutura mu gihugu kitagira icyaha kuko imidugudu yose ibaye izira icyaha ubwo n’u Rwanda rwose rwaba nta cyaha kirimo”.

Gusa ngo ibi birasaba ubufatanye mu nzego zose yaba iz’ubuyobozi, abanyamadini, inzego z’umutekano zisanzwe zinabifite mu nshingano.

Umuyobozi Mukuru wa Polisi y’Igihugu, IGP Gasana K. Emmanuel, yavuze ko Polisi yishimira ko mu myaka 18 ishize, yubatse icyizere n’imikoranire myiza n’abaturage.

Ati “Mu myaka 18 ishize twishimira ko twubatse icyizere n’imikoranire myiza n’abaturage. Twabashije kandi kongerera ubumenyi n’ubushobozi abapolisi hagamijwe kurwanya ibyaha”.

Avuga ko usibye ibyakozwe mu gihugu imbere, Polisi y’Igihugu igaragara neza ku ruhando mpuzamuhanga mu kubungabunga amahoro.

Uhagarariye ba Ambasaderi ba Polisi, akaba n’Umuyobozi Mukuru w’Ikigo cy’Igihugu gishinzwe amahugurwa n’imicungire y’abantu n’ibintu (RMI), Gasamagera Wellars, yavuze ko ba ambasaderi ba Polisi batewe ishema no kwitwa abafatanyabikorwa bayo.

Ashimangira ko batazahwema kugira uruhare rugaragara mu gufasha polisi y’u Rwanda kugera ku ntego yayo nziza yo kugira umudugudu utarangwamo icyaha.

Polisi y’u Rwanda yashinzwe mu 2000; mu myaka 18 imaze ikaba yarakozemo ibikorwa binyuranye birimo; kubungabunga umutekano haba mu gihugu, ifatanije n’abaturage n’izindi nzego no hanze yacyo mu butumwa bunyuranye bw’amahoro. Ubu iri ku mwanya wa Kabiri muri Afurika, nyuma y’iya Botswana, mu bihugu bifite izikora neza.

Polisi y’u Rwanda kandi yagiye ikora n’ibiteza imbere abaturage nko kubagezaho amashanyarazi akomoka ku mirasire y’izuba, amazi, guhanga no gusana ibiraro n’ibindi bitandukanye byagiye bikorwa mu cyumweru cyahariwe ibikorwa byayo kizwi nka ‘Police Week’.

Muri uyu mwaka, ibi bikorwa byatangiye ku wa 16 Gicurasi, bikaba byari bimaze ukwezi bikorerwa hirya no hino mu gihugu. Ingo 3000 zahawe amashanyarazi akomoka ku mirasire y’izuba, hubakwa ibiro bimwe by’umudugudu muri buri karere bishyirwamo ibikoresho by’ibanze na Televiziyo ifasha abaturage kumenya amakuru n’ibindi. Ubu hamaze kuzura bitanu.

Uhagarariye ba Ambasaderi ba Polisi, akaba n’Umuyobozi Mukuru w’Ikigo cy’Igihugu Gishinzwe Amahugurwa n’Imicungire y’Abantu n’Ibintu (RMI), Gasamagera Wellars
Umuhango witabiriwe n'abanyamadini batandukanye
Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, Evode Uwizeyimana
Umuyobozi Mukuru wa Polisi, IGP. Gasana Emmanuel, yavuze ko Polisi yishimira ko mu myaka 18 ishize yubatse icyizere n'imikoranire myiza n'abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza