Minisitiri w’Intebe yahagarariye Kagame mu muhango wo kwizihiza isabukuru y’ubwigenge bwa Ghana

Yanditswe na Uwishyaka Jean Louis
Kuya 6 Werurwe 2017 saa 02:07
Yasuwe :
0 0

Minisitiri w’Intebe w’u Rwanda, Anastase Murekezi, yageze muri Ghana, aho yahagarariye Perezida Kagame mu muhango wo kwizihiza ku nshuro ya 60 isabukuru y’ubwigenge bw’iki gihugu.

Ghana yabonye ubwigenge tariki 6 Werurwe 1957 ibukuye ku Bwongereza bwari bwarayikoronije kuva mu mpera z’ikinyejana cya 19, inaba igihugu cya mbere cyo muri Afurika yo munsi y’ubutayu bwa Sahara cyabonye ubwigenge kiyomoye ku ngoma ya gokoloni y’abazungu. Ubwo bwigenge yabugezeho ibifashijwemo na Dr Kwame Nkrumah.

Ghana ni igihugu gifite ubuso bwa kilometero kare (Km2) 238,535. Gituwe n’abaturage basaga miliyoni 27 nkuko ibarura ryo mu 2014 ryabigaragaje. Iki gihugu kandi gikikijwe n’ibihugu nka Côte d’Ivoire mu Burengerazuba, Burkina Faso mu Majyaruguru, Togo mu Burasirazuba na Guinea mu Majyepfo.

Iki gihugu kandi gituwe n’ubwoko butandukanye bujyana n’imyemerere n’indimi binyuranye. 5% by’abaturage b’iki gihugu bagendera ku myemerere ya gakondo, 71.2% ni abakirisitu mu gihe 17.6% ari abayoboke b’idini ya Islam.

Umubano w’u Rwanda na Ghana

U Rwanda na Ghana ni ibihugu bifitanye umubano mwiza kandi w’igihe kirekire, ibishimangirwa n’ingendo z’abayobozi bakuru babyo bagenderana mu rwego rwo gusangira ubumenyi n’ubunararibonye mu nzego zinyuranye.

Muri Mutarama uyu mwaka, Visi Perezida wa Ghana, Dr Mahamudu Bawuma, yasuye u Rwanda ahanini aje kwirebera intambwe yarwo mu koroshya iyandikwa ry’ibigo by’ubucuruzi, umugambi yasobanuye ko igihugu cye gishyize imbere. Yasobanuraga ko mu gihugu cye kwandikisha ikigo cy’ubucuruzi bitinda bitewe no kuzenguruka mu biro by’ababishinzwe, mu gihe mu Rwanda bikorwa hifashishijwe ikoranabuhanga.

U Rwanda na rwo rwarahuye ubumenyi kuri Ghana by’umwihariko mu bijyanye n’imiyoborere, dore ko zimwe muri gahunda zimaze guteza imbere igihugu nko kwegereza ubuyobozi abaturage (decentralisation) yarahuwe kuri iki gihugu cyo muri Afurika y’u Burengerazuba.

Si ibyo gusa kuko no mu rwego rw’umutekano, u Rwanda na Ghana ari abafatanyabikorwa bakomeye, byashimangiwe n’amasezerano y’ubufatanye muri urwo rwego ibihugu byombi byashyizeho umukono muri Nyakanga 2016.

Icyo gihe Gen Kabarebe yavuze ko Ghana n’u Rwanda bisanzwe bifitanye umubano umaze igihe.Yagaragaje ko ubwo Jenoside yakorewe abatutsi mu 1994 yatangiraga mu Rwanda ingabo z’amahanga zatereranye u Rwanda ariko ko umutwe w’Ingabo za Ghana wagumye mu Rwanda bagafasha mu kurengera ubuzima bw’abantu mu gihe ingabo z’ ibindi bihugu zazinze utwazo zikigendera.

Si ibyo gusa kuko Ghana ari n’igihugu cyafashije ingabo z’u Rwanda mu kwiyubaka baha amahugurwa ba Ofisiye ba RDF urugamba rwo kubohora igihugu rukirangira kugeza n’ubu nk’uko yakomeje abisobanura.

Umuhango wo kwizihiza iyi sabukuru, wanitabiriwe n’abanyacyubahiro banyuranye kuri uyu mugabane barimo Robert Mugabe, Perezida wa Zimbabwe, Ellen Johnson Sirleaf wa Liberia, uwa Côte d’Ivoire, Alassane Outtara, Faure Gnassingbé wa Togo, Visi Perezida wa Zambia, Inonge Wina;n’abandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza