Minisitiri w’Intebe yasabiye ibihano abiha kuzamura ibiciro by’amazi, ababarebera n’abasaba ruswa

Yanditswe na Evariste Nsengimana
Kuya 6 Gicurasi 2019 saa 03:40
Yasuwe :
0 0

Minisitiri w’Intebe, Dr. Edouard Ngirente, yavuze ko hari imikorere idahwitse ivugwa mu mitangire y’amazi irimo imicungire mibi y’amavomero rusange, kwishyuza amafaranga arenze ayagenwe, ruswa n’ibindi ababigiramo uruhare bakwiye kuryozwa.

Dr. Ngirente yabivuze kuri uyu wa 6 Gicurasi 2019 ubwo yafunguraga ku mugaragaro uruganda rw’amazi rushya rwa Nzove I na Nzove II rwongerewe ubushobozi ngo rubashe guhaza Umujyi wa Kigali.

Nzove I ifite ubushobozi bwo gutanga metero kibe ibihumbi 40 ku munsi na Nzove II yongerewe ubushobozi bwo gutanga metero kibe ibihumbi 40 ivuye ku bihumbi 25 ku munsi.

Minisitiri w’Intebe, Dr. Edouard Ngirente yavuze ko izo nganda zombi zigiye kunganira Leta muri gahunda yayo yo kugeza amazi meza kuri buri munyarwanda, by’umwihariko zikazagaburira abatuye Umujyi wa Kigali.

Ati “Ibi ni igisubizo kuri bamwe mu baturage bacu batuye Umujyi wa Kigali batajyaga bagerwaho n’amazi uko bikwiye. Uruganda rwatashywe ndetse n’urwaguwe zatumye ubushobozi bw’amazi agera mu mujyi wa Kigali ku munsi bwiyongera ku buryo buhagije.”

Umujyi wa Kigali ukenera amazi angana na metero kibe 143 668. Uyu munsi hiyongereyeho izo nganda zatashywe ubasha kubona metero kibe ibihumbi 145.

Dr. Ngirente yavuze ko guverinoma y’u Rwanda ikomeje gahunda yo kwegereza buri munyarwanda amazi mezi, gusana imiyoboro y’asanzwe ariko ko kugira ngo bigerweho hakenewe uruhare rw’inzego zose harimo abaturage n’abafaranyabikorwa mu iterambere ry’urwego rw’amazi.

Dr. Ngirente yavuze ko abaturage basabwa kongera ibikorwa byo kubungabunga ibikorwa remezo birimo n’iby’amazi bahabwa, kurwanya ubujura bw’amazi kandi bakayishyurira ku gihe.

Imicungire y’amavomero rusange

Dr. Ngirente yavuze ko abafite inshingano zo gucunga amavomo rusange batuzuza neza inshingano bagomba kuvugurura imikorere yabo, abatabyuzuza bagakurikiranwa.

Ati “Tukaba tugira ngo twongere dusabe inzego z’ibanze kujya zikurikirana imitangire y’amazi hanyuma zigahita zisimbuza abashinzwe amavomero badakora neza.”

Yakomeje agira ati “Nibutse ko abashinzwe amavomero ko batagomba kurenza igiciro cyashyizweho ku ijerekani y’amazi. Icyo giciro kirazwi kandi kiba cyarumvikanyweho. Mboneyeho no kwibutsa ko abazazamura igiciro bagomba kujya bahanwa bikomeye.”

Impinduka ziheruka gutangazwa n’ikigo ngenzuramikorere, RURA, ku biciro by’amazi zivuga ko ikiguzi cyo ku mavomo rusange kitahindutse metero kibe yagumye kuri 323 Frw, umuturage akazajya agura ijerikani ku mafaranga 20Frw.

Nko ku mazi akoreshwa mu ngo habaye impinduka kuko nk’aho bakoresha hagati ya metero kibe 0-5, bazajya bishyura 340Frw kuri metero kibe imwe, avuye kuri 323Frw.

Abakoresha hagati ya metero kibe 5-20 bazajya bishyura 720Frw avuye kuri 331Frw; abakoresha metero kibe 20-50 bishyure 845Frw avuye kuri 413Frw naho abakoresha amazi hejuru ya metero kibe 50 bishyure 877 Frw avuye kuri 736Frw.

Inzego z’ibanze zizabazwa amakosa

Dr. Ngirente ati “Nkaba mbonyeyeho kwibutsa nanone nkomeje ko aho bizagaragara ko ibiciro by’amazi bicibwa umunyarwanda aho yaba atuye hose, ibyo biciro bikagaragara ko birengeje ibyemejwe hazajya habanza kubazwa inzego z’ibanze zitabivuze ngo bikemurwe.”

Dr. Ngirente yavuze ko ubuyobozi bw’utugari n’imidugudu bugomba gutanga raporo z’aho ibiciro by’amazi n’amabwiriza binyuranye n’ibyashyizweho cyangwa abafunga amazi abaturage bakayabura kandi ahari.

Imikorere idahwitse na ruswa

Minisitiri w’Intebe, Dr. Edouard Ngirente yavuze ko nubwo bidakabije, hari bamwe mu bakozi bafite imikorere idahwitse na ruswa mu mitangire y’amazi nyamara leta ishishikajwe no kuyageza kuri buri muturarwanda.

Iyi mikorere mibi harimo aho ngo “byagaragaye ko bafungira amazi abaturage bitari ngombwa, ahandi bakongera ibiciro ndetse hakaba n’aho bagaragaza imikorere mibi isa n’aho irimo ruswa.”

Dr. Ngirente yavuze ko atari henshi iyo mikorere mibi iri ariko n’aho hake byagaragaye bigomba gucika, yibutsa abakozi ba Wasac gukomeza ubunyangamugayo kubera ko “Hari bamwe byagaragaye ko bagira uruhare mu bikorwa bidashimishije.”

Minisitiri w’Ibikorwa Remezo, Amb. Gatete Claver, yavuze ko imishinga yombi yatwaye amadolari ya Amerika miliyoni zisaga 40.

Amb. Gatete yavuze ko hari indi mishinga irimo gukorwa izafasha abaturarwanda kubona amazi meza ku buryo bitanga icyizere ko mu 2024 ntawe uzaba atayafite nk’uko gahunda ya Guverinoma ibiteganya.

Dr. Ngirente afungura uruganda ku mugaragaro
Dr. Ngirente ari kuganiro na Minisitiri w'Ibikorwa remezo, Amb. Gatete Claver n'umuyobozi wa Wasac, Eng. Aimé Muzola
Eng. Aimé Muzola ari kubasobanurira uko amazi atunganywa
Eng. Aimé Muzola ari kwereka Minisitiri w'intebe imikorere y'uruganda rw'amazi rwa Nzove
Minisitiri w’Ibikorwa Remezo, Amb. Gatete Claver, yavuze ko imishinga yombi yatwaye amadolari miliyoni zirenga 40
Minisitiri w'Intebe yasabiye ibihano abiha kuzamura ibiciro by’amazi, abayobozi babarebera n’abayasabamo ruswa
Umuyobozi wa Wasac Eng. Aimé Muzola ari gusobanurira Minisitiri w'Intebe Dr Ngirente ubushobozi bw'inganda zatashywe
Uruganda rw'amazi rwa Nzove I rufite ubushobozi bwo gutanga metero kibe ibihumbi 40 ku munsi

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza