Mobi-Grow ya KCB igiye gufasha abahinzi n’aborozi kubona serivisi zirimo inguzanyo biciye kuri telefoni

Yanditswe na HABIMANA James
Kuya 30 Mata 2019 saa 02:29
Yasuwe :
0 0

Banki y’Ubucuruzi ya KCB Bank Rwanda ibicishije muri gahunda yise “MobiGrow” yo gufasha abahinzi n’aborozi, igiye kujya iguriza abakora iyi mirimo bicishijwe kuritelefoni zabo.

Umukozi wa KCB Bank Rwanda ushinzwe kongerera ubushobozi abahinzi n’abarozi muri uyu mushinga, Emmanuel Nizeyimana, yavuze ko watangiye mu 2017 muri gahunda y’imyaka itanu.

Ufite intego yo kongerera ubushobozi abahinzi n’aborozi hirya no hino mu gihugu mu buryo bw’amahugurwa no mu bijyanye n’ubushobozi bw’amafaranga.

Ni gahunda igamije kureba uko bakongera umusaruro w’ubuhinzi ariko bakajya babona na serivisi z’imari zirimo inguzanyo, kubitsa, kubikuza, kuzigama, kubona amakuru ku buhinzi n’ubworozi n’ibindi.

KCB isanzwe ikorana n’abahinzi n’aborozi biciye mu makoperative akora ibijyanye n’ibihingwa bitatu aribyo Umuceri, Ibirayi n’Ibigori, hakiyongeraho ubworozi bw’inka zitanga amata.

Kuva uyu mushinga watangira, KCB yasinyanye amasezerano y’imikoranire na koperative 188 mu gihugu hose, zikorana n’abahinzi 94,850.

Kugirango koperative ikorane na KCB iba yujuje ibisabwa birimo kuba ifite aho ikorera, kuba ifite ubuzima gatozi, hakiyongeraho kuba izi koperative zihinga bya bihingwa bitatu cyangwa ikora ubworozi bw’inka zitanga umukamo.

KCB igenera amahugurwa abayobozi b’amakoperative, abakozi ndetse n’abanyamuryango, agatangwa mu buryo bw’imbonankubone ku buryo bwo guhinga no korora bigezweho ariko hari n’amahugurwa atangwa binyuze kuri telefoni (SMS Training).

Ubu buryo bwa Mobi-Grow bufasha umuhinzi ku giti cye kubasha kugera ku mafaranga abinyujije kuri telefoni.

Etienne Ndayambaje ushinzwe gukurikirana ibikorwa by’u mushinga, yabwiye IGIHE ko ubusanzwe KCB iguriza amakoperative akabona amafaranga yifashishwa mu guteza imbere abanyamuryango, ariko ubu bigeze aho umunyamuryango ubwe biciye kuri telefoni ye agiye kujya yaka amafaranga muri banki igihe ayakenereye.

Yagize ati “Ubu noneho bizaba bireba umuntu ku giti cye kuko ayo yandi twayatangaga kuri koperative na yo ikayaha abanyamuryango, ubu turashaka kurenga urwo rwego umuntu akabasha kwiguriza ku giti cye kandi ntibisaba umuntu ufite telefoni igezweho gusa na telefoni yose yabikora.”

Uburyo bwo gufungura konti ya KCB Mobi-Grow umuntu akanda *522# akemeza, agakurikiza amabwiriza kugeza afunguye konti ye.

Gufungura konti byatangiye mu kwezi kwa Kabiri uyu mwaka, mu kwa Gatanu bazaba bashobora gutangira gusaba inguzanyo.

Amafaranga umuntu uri muri iyi koperative aguza ashobora kugera ku bihumbi 500 ariko bikanajyana n’umusaruro yeza akageza kuri koperative. Aya ni amafaranga yo ku mufasha mu bikorwa by’ubuhinzi nko kugura ifumbire, imbuto, guhemba abakozi n’ibindi.

KCB ivuga ko impamvu yabishyize kuri telefoni ari uko mbere wasangaga umuntu yatse inguzanyo nko mu kwezi kwa munani akazayabona mu kwa cumi, ugasanga igihembwe cy’ihinga kiramucitse.

Ndayambaje yagize ati “Ubu tuzajya tumwoherereza ubutumwa bugufi kuri telefoni tumubwira amafaranga atarenza.”

“Mu gihe azayashakira azajya kuri telefoni akande *522# noneho yigurize abone amafaranga mu gihe kitarenze iminota itanu.”

Bwa butumwa bugufi nabubona amafaranga azahita ajya kuri ya konti yafunguye, nashaka kuyabikuza ajye k’uhagarariye KCB umwegereye cyangwa ayavane kuri konti ayashyire kuri mobile money, abikuze ajye gukora ubuhinzi bwe.

Abahinzi bari mu makoperative nibo bazibandwaho cyane ariko n’undi mukiriya wa KCB ashobora gufungura iyi konti akabitsaho amafaranga, ariko ikizajya kibatandukanya n’abahinzi bo muri koperative ni uko bo kugurizwa kwabo bizajya bisaba ko bajya ku ishami rya KCB bakanasabwa ingwate.

KCB yavuze ko buri muntu wese ashobora kubona amakuru ajyanye n’ubuhinzi biciye kuri telefoni zabo kandi ku buntu.

Uko bikorwa umuntu ajya ahandikirwa ubutumwa bugufi agashyiramo ijambo ‘KCB’ akaryohereza kuri 4535, agatangira gukurikiza amabwiriza.

KCB ubu irimo gushaka uko yakorana na Airtel-Tigo kuko yatangiranye n’abakoresha MTN Rwanda .

Abahinzi mu makoperative bigishwa uko bazajya babona inguzanyo binyuze kuri telefoni
Abakozi ba KCB begera abahinzi b'ibigori kugira ngo bongere umusaruro w'ibyo bazakuramo
Bamwe mu bahinzi bafashwa na KCB mu gihugu
KCB ifasha abahinzi mu bujyanama bwo kubona umusaruro mwinshi
KCB ikorana n'abahinzi batandukanye mu gihugu mu kwiteza imbere
KCB isanga abantu mu makoperative aho bari
KCB kandi ikorana n'abahinzi b'umuceri mu makoperative atandukanye mu gihugu kugira ngo bongere umusaruro
Mobi-Grow ya KCB igiye gufasha abahinzi n’aborozi kubona serivise harimo n’inguzanyo biciye kuri telefone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza