Mpayimana asanga abashaka ubutegetsi mu Rwanda bakoresheje imbunda barayobye

Yanditswe na Habimana James
Kuya 16 Mutarama 2019 saa 10:25
Yasuwe :
0 0

Umunyapolitiki Mpayimana Philippe, watangije ishyaka ry’Iterambere na Demokarasi mu Rwanda PPDR (Le Parti du Progrès et la Démocratie au Rwanda), yavuze ko abumva ko bashaka ubutegetsi bakoresheje intwaro, abo bakiri muri politiki za kera zo gutega amatwi ba mpatsibihugu.

Mpayimana yavuze ko nubwo abarwanya ubutegetsi wenda bumva ari amahitamo yabo, gusa ngo kuri we abona ko ari ubuyobe bakirimo.

Kuva mu 1994 ubwo ingabo z’Inkotanyi zahagarikaga Jenoside yakorewe Abatutsi, abayigizemo uruhare barahunze ariko bakomeza gushaka gukomeza umugambi wabo wo guhungabanya umutekano w’Abanyarwanda.

Nubwo leta y’u Rwanda yakomeje kubasaba gutaha ku mahoro, bamwe baratahutse bakirwa neza ubu baratunze baratunganiwe. Gusa hari abandi bahisemo gukoresha intwaro, bakaba barimo FDLR n’indi mitwe itifuriza u Rwanda ibyiza.

Kugeza ubu kandi haravugwa umubano udasanzwe w’Urwego rw’Ubutasi rwa Uganda (CMI) n’abagize Umutwe urwanya Leta y’u Rwanda (RNC) uyoborwa na Kayumba Nyamwasa, aho ukomeje kugarukwaho cyane kubera ibikorwa byo gushimuta Abanyarwanda no kubakorera iyicarubozo ndetse no gushaka abajya muri uyu mutwe ngo baze guhungabanya umutekano w’u Rwanda.

Urugero ni impunzi z’abanyarwanda zigera kuri 40 zigeze gutabwa muri yombi zerekeje mu myitozo y’Umutwe urwanya ubutegetsi bw’u Rwanda, RNC, mu Burasirazuba bwa Repubulika Iharanira Demokarasi ya Congo mu mpera za 2017. Gusa nyuma baje kurekurwa.

Raporo y’impuguke z’akanama k’Umuryango w’Abibumbye gashinzwe umutekano, yagaragaje ko muri Repubulika Iharanira Demokarasi ya Congo (RDC) hari umutwe w’inyeshyamba ufashwa na Kayumba Nyamwasa, ugamije guhungabanya umutekano w’u Rwanda. Abarwanyi babwirwa ko intego y’uwo mutwe ari ukubohoza u Rwanda.

Mpayimana wabaye mu Bufaransa akaza mu Rwanda kwiyamamaza mu matora ya Perezida yo mu 2017 agatsindwa, mu kiganiro yahaye IGIHE yavuze ko hari imyumvire ishaje ndetse y’ubuyobe bwo gushaka ubutegetsi ukoresheje intwaro.

Ati “Mu ngamba tuzashyigikira harimo ko igihugu cyacu kigira ingabo zikirengera tugakangurira urubyiruko kwinjira mu ngabo zirengera ubusugire bw’igihugu, ku bagishaka gukoresha intwaro babihisemo ntawabibabuza gusa ubwo ni ubujiji bakirimo bwo gukora za politiki za kera zo gutega amatwi ba mpatsibihugu no gutega amatwi imiryango y’ubucuruzi bw’intwaro.”

Mpayimana yavuze ko Abanyarwanda bagomba gukomeza kwigishwa gukunda igihugu cyabo, bakumva ko gukoresha intwaro mu gushaka ubutegetsi ari ubujiji.

Mu ijambo rya Perezida Paul Kagame ryo gutangira umwaka mushya wa 2019, yagaragaje ko Leta y’u Rwanda izi iby’iyo mitwe n’uruhare abaturanyi babigiramo.

Yagize ati “Bamwe mu baturanyi bacu bakomeje kugerageza gufasha kuzanzamura imitwe igamije guhungabanya umutekano w’u Rwanda nka FDLR, RNC n’abandi. Ibi bibangamira ibikorwa byiza ubundi bisanzwe biranga umuryango wa Afurika y’Iburasirazuba n’umutekano w’aka karere muri rusange.”

Perezida Kagame yavuze ko icyo kibazo bagiye gukomeza kukiganiraho n’abo bireba kugira ngo imibanire ikomeze kuba myiza.

Abavuye muri iyi mitwe barayinenga

Muri Werurwe 2013, Nyandwi Salatiere wari mu ishyaka Rwanda National Congress (RNC) ryashinzwe na Kayumba Nyamwasa, Karegeya Patrick n’abandi, yarisezeyemo ataha mu Rwanda nyuma y’aho aboneye ko abayobozi baryo bakoresha ikinyoma ngo babone abayoboke.

Nyandwi wari ushinzwe umutekano muri RNC, yasabye kandi abandi banyarwanda bari hanze gutaha kuko igihugu yasanze gitandukanye n’uko abagize RNC bagisebya.

Nyandwi yavuze ko ibyo kunyomoza ibinyoma babeshywaga na RNC yabikoze akigera mu gihugu kuko ari bwo yari yiboneye ukuri.

Nyandwi ukomoka i Rusizi yaje mu Rwanda avuye Afurika y’Epfo aho yabaga nk’impunzi.

Uyu mugabo yari ashinzwe umutekano mu ishyaka RNC rivuga ko rihanganye n’ubutegetsi bw’ U Rwanda. Ageze I Kigali ngo yahisemo kuguma mu Rwanda kuko yasanze iryo shyaka ribeshwaho n’ikinyoma.

Yagize ati "Hari ibintu twabwiwe n’abashinze RNC, barimo Dr. Rudasingwa Kayumba na Karegeya bakimara kugera muri Afurika y’Epfo, bavugaga ko mu Rwanda ibintu bitagenda neza nyuma mfata icyemezo cyo kuvuga nti reka nze nirebere, gusa nasanze ibyo bavuga atari byo".

"Baravugaga ngo mu Rwanda bakwica ukigera ku kibuga cy’indege, ngo babwira abantu guhinga indabo nta nsina bagitera, gusa twari tubizi, ariko ishusho ya mbere nabonye nkimara kugera mu Rwanda indege irimo kumanuka i Masaka nahise mbona intoki, nazengurutse igihugu cyose nsanga abanyarwanda nta bibazo bafite muri rusange, ni yo mpamvu nahisemo kuva muri Rwanda National Congress".

Nyandwi Salatiere yavuye mu Rwanda mu 1994, yemeje ko aho agarukiye yasanze U Rwanda rutandukanye n’urwo yari azi, bityo ngo akaba ashaka ko n’abandi bakiri mu buhungiro bareka kumva ikinyoma bagataha mu gihugu cyabo.

Mpayimana asanga abashaka gukoresha intwaro mu gushaka ubutegetsi bari mu buyobe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza