MTN Rwanda yateye inkunga ikigo cya HVP Gatagara i Nyanza

Yanditswe na Muvunyi Arsène
Kuya 8 Kamena 2019 saa 08:51
Yasuwe :
0 0

Abakozi ba sosiyete y’itumanaho ya MTN Rwanda, bateye inkunga irimo ibikoresho byifashishwa mu kwigisha imyuga n’amagare y’abafite ubumuga bw’ingingo ikigo cya HVP Gatagara mu gikorwa cya 21 Days of Y’ello Care.

Guhera tariki 01 kugera 21 Kamena buri mwaka abakozi ba MTN ku Isi hose bakusanya inkunga igamije gufasha abaturage mu bikorwa by’urukundo bitandukanye.

Ibikorwa by’uyu mwaka bishingiye ku nkingi eshatu arizo: ikoranabuhanga, kongerera ubushobozi urubyiruko no kurwanya ibiyobyabwenge.

Kuri uyu wa Gatanu MTN Rwanda yasoje icyumweru cya mbere cyatangiriye mu kigo cyita ku bafite ubumuga bw’ingingo n’ubwo kutumva no kutavuga cya HVP Gatagara mu Karere ka Nyanza.

Aha havurirwa abafite ubumuga bw’ingingo hakanaba amashuri y’inshuke kugera mu cyiciro rusange cy’ayisumbuye ndetse n’amashuri y’ubumenyingiro.

MTN Rwanda yari imaze icyumweru ihugura abanyeshuri mu bijyanye n’uburyo bakwihangira imirimo mu gihe bazaba barangije kwiga.

Abanyeshuri bane bazatsinda neza bazahabwa igishoro n’ibindi bikenewe batangire bakore ubucuruzi bwa MTN Mobile Money.

Uretse amahugurwa ubuyobozi bw’ishuri bwahawe inkunga y’ibikoresho birimo ibyifashishwa n’abiga gusudira ndetse n’abiga ubudozi, hiyongeraho n’amagare 15 y’abafite ubumuga bw’ingingo.

Umuyobozi Ushinzwe imikoranire n’izindi nzego muri MTN Rwanda, Alain Numa yavuze ko ‘twabegereye tuvuga tuti ‘nabo ni nka twe ntaho dutaniye kandi nabo ni ukubagaruramo ibyiringiro ko bashobora gukora ubucuruzi’.

Akanyamuneza kari kose ku banyeshuri bo muri HVP Gatara bari nyuma yo guhabwa ibikoresho by’ishuri n’amagare y’abafite ubumuga.

Tuyisenge Emmanuel afite ubumuga bw’ingingo akaba yiga ubudozi. Yabwiye IGIHE ko amahugurwa bahawe yamugiriye akamaro ku buryo ubwo azaba arangije amasomo azayabyaza umusaruro.

Ati “Batwigishije ibijyanye no kwihangira imirimo ntituzategere ababyeyi amaboko cyangwa se ngo tujye mu mihanda gusabiriza nk’uko abenshi mu mico y’abanyarwanda bazi ko umuntu umugaye icyo aba ashoboye ari ugusabiriza gusa.”

Undi witwa Gakwavu Jean Claude wiga ibijyanye no gusudira yavuze ko ibikoresho bahawe bigiye kubafasha kwiga neza kuko ibyo bari bafite bitari bihagije.

Ati “Twari dufite ibikoresho bike mu bijyanye no gushyira mu ngiro ibyo twiga ariko byabaye igisubizo. Twishimiye imashini twabonye ubundi twajyaga tuzibona mu nganda twagiye kwimenyereza.”

Umuyobozi w’ishami ryigisha ubumenyi ngiro muri HVP Gatagara, Fr. Ndabakuranye Jean Bosco, nawe yahamije ko ibikoresho bahawe bigiye guhindura byinshi mu mikorere yabo ya buri munsi.

Ati “Mu by’ukuri ibikoresho twari dufite byari bike ugereranyije n’abanyeshuri. Bizadufasha kugira ngo ubumenyi bw’abanyeshuri bwiyongere. Ikindi nk’ariya magare y’abafite ubumuga azajya afasha abana mu gihe cyo kuva aho barara bajya aho biga”.

Umuyobozi w’Akarere ka Nyanza, Ntazinda Erasme, yashimye MTN yateye inkunga ikigo cya HVP Gatagara, ariko anasaba abayihawe kuzayibyaza umusaruro.

Ati “Hari ubufasha MTN ibahaye, hari amahugurwa yabahaye ariko mukomeze murebe kure. Murebe imbere inzozi zanyu zibe impamo. Hano higa abafite ubumuga n’abatabufite ariko byagaragaye ko kugira ubumuga ntibivuze kudashobora.”

Mu nkingi y’ikoranabuhanga, mu cyumweru gitaha, MTN Rwanda izakomereza muri HVP Gatagara ishami ryo mu karere ka Huye aho abanyeshuri bazahabwa imfashanyigisho y’amasomo ikoranabuhanga yakozwe na K Lab.

Alain Numa yavuze ko aba banyeshuri biga i Huye, bazafashwa na K Lab kubona imirimo mu gihe bazaba barangije amasomo.

Mu kindi cyumweru bazakomereza muri HVP Gatagara i Rwamagana aharererwa abafite ubumuga bwo kutabona, aho bazubakirwa inzira nziza mu rwego rwo kubarinda kugenda basitara.

Iki gikorwa kizakomereza ku kirwa cya Iwawa, ahari kugororerwa urubyiruko rwahoze mu biyobyabwenge, aho bazigishwa kwihangira imirimo.

Tariki 21 Kamena 2019 nibwo iki gikorwa Kizasorezwa kuri Club Rafiki i Nyamirambo, ahazatangwa ibikombe ku makipe y’urubyiruko mu mikino itandukanye.

Abafite ubumuga bw'ingingo bahawe amagare azajya abafasha kugenda neza
Abanyeshuri ba HVP Gatagara bahawe ibikoresho bizabafasha kunoza imyigire
Abanyeshuri ba HVP Gatagara n'abakozi ba MTN bacinye akadiho
Ubuyobozi bwa HVP Gatagara bwageneye MTN Rwanda icyemezo cy'ishimwe
Umuyobozi w'Akarere ka Nyanza yashimiye MTN Rwanda yateye inkunga HVP Gatagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza