Mu bacamanza 702 bariho mbere ya 2003, abari bafite impamyabumenyi bari 74

Yanditswe na Kanamugire Emmanuel
Kuya 5 Ugushyingo 2016 saa 05:42
Yasuwe : XX
118 67

Ubutabera bw’u Rwanda burishimira urwego bugezeho mu bijyanye no guha serivisi zabwo abaturage, bukemeza ko bwavuye habi.

Nyuma ya Jenoside yakorewe Abatutsi mu 1994, inzego z’ubutabera kimwe n’izindi zose zagiye zigira icyuho cy’abakozi, bitewe nuko abari babifitiye ubushobozi bishwe, abandi bagahunga.

Mu nzego z’ubutabera, cyane mu nkiko hitabazwaga abantu batari barize amategeko, nyamara muri urwo rwego, by’umwihariko mu nkiko hagomba gukora abantu bize amategeko. Icyo gihe uwabaga yarize andi masomo yararangije amashuri yisumbuye yahabwaga amahugurwa y’igihe kitageze ku mezi atatu, akagirwa umucamanza.

Umugenzuzi w’inkiko akaba n’umuvugizi wazo, Itamwa Emmanuel yatangaje ko icyo kibazo bahanganye na cyo kugeza bagikemuye, kuri ubu ngo ibintu bikaba bimeze neza.

Ubwo yaganiraga n’abanyamakuru bagize Umuryango w’abanyamakuru bagamije amahoro PaxPress, ku wa Gatatu tariki ya 2 Ugushyingo 2016 yagaragaje bimwe mu byakozwe n’umusaruro byatanze.

Yavuze ko muri 2004 hakozwe ivugurura rw’Urwego rw’Ubucamanza zatanze umusaruro ukurikira. Ati “Mbere ya 2004, hari abacamanza 702, abafite impamyabumenyi mu mategeko bari 74.”

Inkiko zagiye zishakirwa abakozi babifitiye ubushobobozi, ku buryo uwo mubare w’abacamanza batari bujuje ibisabwa bagiye biyambazwa nyuma ya jenoside, wasimbuwe n’abujuje ibisabwa.

Kugezwa ubu hari abacamanza 283 bafite impamyabumenyi ihanitse mu mategeko.
Ati “Abacamanza bose bize amategeko bafite impamyabuhushobozi y’icyiciro cya kabiri mu matageko bitandukanye na mbere y’ivugururwa ry’inzego z’ubucamanza kuko mbere ya Jenoside yakorewe Abatutsi abacamanza benshi n’abandi banyamategeko bari barayigiye barishwe abandi barahunga , bituma tugira ikibazo cy’abantu bize amategeko, ubungubu twavuga ko dufite inzego zihamye zifite abakozi rwose bakora neza."

Urwego rw’ubucamanza mu Rwanda rumaze kwiyubaka ndetse rufite abantu benshi babyigiye

Kuri ubu ngo mbere y’uko abakozi (abacamanza n’abanditsi) batangira akazi, babanza guhabwa amahugurwa y’ibanze abategurira gukora neza, ahoraho mu bumenyi butandukanye, ingendoshuri n’ibindi bigamije kuibafasha kunoza akazi kabo.

Mu rwego rwo kwihutisha imanza z’ubucuruzi hashyizweho Inkiko zihariye z’Ubucuruzi kugira ngo abashoramari boroherezwe kandi n’Abacamanza barusheho gusabanukirwa n’amategeko y’ubucuruzi.

Mu nkiko hashyizweho Komite zishinzwe kurwanya ruswa, Kwigisha no gukangurira abaturage ububi bwayo cyane cyane itangwa mu Nkiko, gukora isesengura riganisha ku kugaragaza ingamba zafatwa mu kurwanya ruswa no kugaragaza abakozi b’Inkiko bishora mu bikorwa bya ruswa ariko hadashingiwe gusa ku bihuha.

Izo mpinduka kandi ngo zagiye zituma n’umusaruro wiyongera ku buryo umubare w’imanza zicibwa ku mwaka wagiye wiyongera n’abaturage bakarushaho kwizera ubutabera bw’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE