Kwamamaza

Mu Bukonya baherukaga kubona abanyamakuru mu myaka isaga 30 ishize

Yanditswe kuya 1-11-2016 saa 16:26' na Emma-Marie Umurerwa


Abakuze bo mu gace kazwi nk’Ubukonya mu Murenge wa Muzo, ho mu Karere ka Gakenke, bavuga ko baherukaga kubona abanyamakuru hambere, kubera imiterere y’aka gace katagerwamo imodoka zitwara abagenzi bikababera inzitizi kuko batabashaka kugeza ibitekerezo byabo aho bifuza.

“Mu myaka isaga 30 ishize nibwo abanyamakuru ba Radiyo Rwanda badusura. Byatubereye inzitizi kubera ko iyo dufite ibitekerezo, ibyifuzo cyangwa hari ibyo twifuza ko byanozwa mu miyoborere nabyo tubura abanyamakuru babitugereze ku nzego zo hejuru.”

Ibi ni ibyavuzwe na bamwe mu basheshe akanguhe batuye mu Tugari dutandukanye two Murenge wa Muzo, tariki ya 31 Ukwakira 2016, ubwo basurwaga n’abanyamakuru bibumbiye mu muryango uharanira amahoro, ‘Paxpress’.

Nyuzwenayo Marc w’imyaka 75 yagize ati “Mu myaka yashize nibwo twabonye abanyamakuru ba Radio Rwanda ino aha. Kuhagera ni ibintu bigoranye, umuhanda uhari ni mubi wagiye wangizwa n’inkangu nta n’imodoka zitwara abagenzi zihaba.”

Abatuye muri aka gace bavuga ko bumva Radio Rwanda na Radio y’abaturage yo mu Karere ka Musanze, ibinyamakuru byandika ndetse n’ibikorera kuri murandasi(internet) kuri bo ni nk’inzozi.

Umunyamabanga Nshingwabikorwa w’uyu Murenge, Evergiste Gasasa yatangaje ko mu minsi ya vuba iki kibazo gishobora gukemuka.

Yagize ati “Mu minsi ya vuba ino aha hazaba hageze iminara ya RBA, izatuma abaturage babasha kumva amaradiyo atandukanye yo mu gihugu kandi bizanadufasha kuko bizanasubiza ikibazo cy’umuyoboro wa telefone gikunze kwigaragaza.”

Uretse abakiri bato, bamwe mu bakuze iyo ubabajije izina ry’umuyobozi w’Akarere ka Gakenke barajijinganya, cyangwa se bakagusubiza izina rimwe, umuyobozi w’Intara y’Amajyaruguru na we abamuzi ni mbarwa, umuyobozi badashidikanya amazina ye ni Perezida wa Repubulika.

Ni agace kari inyuma mu iterambere

Umurenge wa Muzo, utuwe n’abaturage 21.500 abagera kuri 0,5% ni bo bafite umuriro ukomoka ku mirasire y’izuba. Abaturage bakoresha amazi atari meza, ibi ngo bigaterwa n’imiterere y’aka gace k’imisozi ihanamye ituma kubagezaho amazi meza bigorana nk’uko ubuyobozi bubivuga.

Ibikorwaremezo nk’imihanda, ni kimwe mu bibazo bituma aka gace kaba mu bwigunge, nta modoka zitwara abagenzi wahabona, abaturage bakora urugendo rw’ibirometero bisaga 20 n’amaguru bajya ku isoko riri ahitwa mu Gakenke.

Nta shuri ry’ubumenyingiro (TVET) riba muri uyu murenge, ibi bikagira ingaruka ku rubyiruko ruvuga ko rwugarijwe n’ubujiji ndetse n’ubukene.

Kuradusenge Aimable, umwe mu rubyiruko wagize ati « Tujya twumva ngo urubyiruko rwo mu bindi bice rwiga imyuga, ariko ino aha ntiwabona aho wiga. Iyo urangije amashuri abanza ntutsindire kujya mu yisumbuye ubwo nyine isuka irakubona. Abenshi usanga twugarijwe n’ubujiji ndetse n’ubukene. »

Gahunda yo kuboneza urubyaro muri uyu murenge iri ku kigero cya 51%, gahunda y’ubwisungane mu kwivuza bari kuri 83%.

Muzo ni umwe mu mirenge irimo gahunda ya VUP mu rwego rwo gufasha abaturage kwikura mu bukene.

Abatuye mu Murenge wa Muzo baganira n'abanyamakuru bari babasuye
Abaturage bo mu Murenge wa Muzo bavuga ko bari mu bwigunge
Abaturage bishimiye gusurwa n'abanyamakuru
Evergiste Gasasa, Umunyamabanga Nshingwabikorwa w'Umurenge wa Muzo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved