Mu gihe kitageze ku mezi abiri, abarwayi bambuye ibitaro bya Muhima asaga miliyoni esheshatu

Yanditswe na Thamimu Hakizimana
Kuya 23 Kanama 2017 saa 02:12
Yasuwe :
0 0

Ibitaro bya Muhima bimaze igihe biri mu mitwe ya benshi kubera inkuru zivuga ku bibazo by’abarwayi cyane ababaga bafashwe bugwate nyuma yo kubura ubwishyu; gusa imibare itangwa n’Ubuyobozi bwabyo yerekana ko mu gihe kitageze ku mezi 12 bifitiwe umwenda wa miliyoni zisaga 20 z’u Rwanda n’ababyivurijemo bagasiga batishyuye.

Ibi bitaro ni bimwe mu byakira abarwayi benshi bo mu Mujyi wa Kigali, ibi bituma bidasiba mu itangazamakuru ku kintu icyo aricyo cyose kiba cyabibayemo. Mu minsi ishize hari umugore wavugaga ko yabagiwe kuri ibi bitaro agiye kubyara abaganga bakamusiga mu nda igitambaro; undi nawe akavuga ko yahawe umwana umwe kandi yabyaye babiri; abandi nabo bagatangaza ko bafatiriwe kubera kubura ubwishyu n’ibindi.

Ku munsi ibi bitaro byakira abantu bagera ku ijana barimo abasheshe akanguhe baba baje kwivuza indwara zitandukanye, abagore bahabyarira;abivuza indwara zifitanye isano n’ubuzima bw’imyororokere; abana nibura 30 n’abandi.

Hari uruhurirane rw’ibibazo bivugwa muri ibi bitaro. Gusa twaganiriye n’Ubuyobozi bwabyo buva imuzingo ikibazo cy’abarwayi bafatwa bugwate kubera kubura ubwishyu aho kuva mu kwezi kwa karindwi k’uyu mwaka kugeza uyu munsi, igihe kitageze ku mezi abiri gusa biberewemo umwenda wa 6,963,680 Frw.

Abenshi muri aba barwayi babereyemo umwenda ibitaro ni abagore baba bagiye kubyara n’abandi baba babigannye kubera ibibazo byo mu nda bifitanye isano n’urubyaro.

Umuyobozi w’agateganyo w’ibi bitaro, Rivuzwe Théogène yasobanuye uko umwenda ibitaro biberewemo mu mwaka w’ingengo y’imari ushize uko uhagaze.

Ati“ Urebye umwenda wose ugera kuri 27,538,455 Frw kuko abatarishyura ni abarwayi 394 uretse ko hari abagiraneza barihiye abantu 254 umwenda wa 12,848,294 ku buryo ubu asigaye ari 14,690,161 Frw.”

Yakomeje avuga ko guhera muri Nyakanga 2017 kugeza muri uku Kwezi kwa Kanama 2017; ibitaro bifitiwe umwenda wa 6,963,680 Frw n’abarwayi 38.

Uyu muyobozi yakomeje anasobanura igituma bafatari abarwayi batishyuye ari ingaruka uwo mwenda ugira ku bitaro n’igikwiye.

Yagize ati “ Ubundi twe ntabwo tubafunga nk’uko bikunze kuvugwa mu itangazamakuru ahubwo ni uburyo dukoresha kugira ngo bishyure ibitaro kuko iyo umuntu yahawe serivise aba agombo kwishyura kubera ko ntiwajya kuri restaurant ushonje ngo nibamara kukugaburira uhaze ubabwire ngo ntiwishyura.”

IGIHE yasanze kuri ibi bitaro abagore babuze ubwishyu nyuma yo kubyara, abakozi bo mu rugo, abacuruza agataro n’inzererezi. Abenshi bakomoka hanze ya Kigali mu biturage bya kure.

Umuhire Chantal w’imyaka 29 umaze iminsi ine abyaye, yemeza ko yafatiriwe n‘ibi bitaro kubera kubura ubwishyu kuko nta mituweli yari afite.

Yagize ati “ Nibyo nanjye banze ko mva hano kubera ko nabuze mituweli noneho banca ibihumbi bigera kuri 45 ndabibura ku buryo ubu nanjye sinzi uko nzava aha.”

Yakomeje avuga ko ingaruka bahura nazo zirimo kuba batabona amafunguro nk’uko bikwiye kubera ko bataba bemerewe kujya hanze y’ibitaro.

Umuyobozi w’Ibitaro avuga ko kugira ngo iki kibazo gikemuke, bikwiye ko hashyirwaho ikigega cyajya cyishyurira ababuze ubwishyu ku bitaro.

Ati “ Kuri njye numva Minaloc na Minisiteri y’Ubuzima bagakwiye gushyiraho ikigega gifasha aba bantu kubera ko usanga bitera ingaruka zitandukanye cyane cyane ko ayo mafaranga ariyo tuguramo imiti n’ibindi bikoresho nkenerwa n’ayo gusana ibitaro.”

Umuyobozi w’agateganyo w’ibi bitaro, Dr Rivuzwe Théogène, yavuze ko mu gihe kitageze ku mezi abiri, ibi bitaro biberewemo umwenda wa miliyoni zisaga esheshatu z'amafaranga y'u Rwanda
Bamwe mu bagore bafatiriwe n'ibitaro bya Muhima kubera kubura ubwishyu nyuma yo kuvurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza