Kwamamaza

Mu mezi 5 mu Rwanda haratangira Kaminuza ya 33,‘African Leadership University’

Yanditswe kuya 21-11-2016 saa 09:40' na IGIHE


Mu gihe habura amezi atandatu gusa ngo Kaminuza ya 33 mu Rwanda itangire gukorera mu rwa gasabo, ‘African Leadership University (ALU)’ yatangiye kugaragaza amahirwe n’umwihariko mu burezi izaniye Abanyarwanda.

Iyi Kaminuza ikomoka mu birwa bya Mauritius, ishami ryayo mu Rwanda rizaba ari irya kabiri muri Afurika. Ryitezweho kuzamura ireme ry’uburezi no guha abazaryigamo ubumenyi bukenewe ku isoko ry’umurimo n’ubumenyi mu miyoborere.

Mu kiganiro cyihariye yagiranye na IGIHE mu gikorwa cyo gusobanurira Abanyarwanda imikorere yayo no kwakira abanyeshuri bashya bifuza kuyigamo, Umuyobozi ushinzwe imyitwarire y’abanyeshuri muri ALU i Mauritius, Veda Sunassee, ari nawe uzaba ayoboye ishami ryo mu Rwanda, yatangaje ko muri Gicurasi umwaka utaha bazatangira guha abanyarwanda ubumenyi bukenewe ku isoko ry’umurimo.

Iyi kaminuza izaba ifite umwihariko w’uko umuntu uyigamo azahabwa amasomo nk’ay’uwicaye i Cambridge muri Massachusetts muri Leta Zunze Ubumwe za Amerika.

Veda yasobanuye ko iyi kaminuza izakorera mu itaji ya kabiri mu nyubako nshya ya Kigali Heights iri imbere ya Kigali Convention Centre, izatanga amasomo ahuye neza n’isoko ry’umurimo.

Yagize ati “Ibyo tuzigisha muri ALU bikozwe mu buryo bwo kuziba icyuho cy’ubumenyi gihari. Tuzazana porogaramu zo guhanga udushya n’uburyo bw’imyigishirize buzadufasha kwigisha urubyiruko rw’u Rwanda bakeneye kwiga kugana kaminuza yacu bagahabwa ubumenyi bukwiye bukenewe n’abakoresha bose ku Isi.”

Yongeraho ko yizera ko bazabasha kubaka ubushobozi bw’urubyiruko rw’u Rwanda rukabashaka kugira ubumenyi bukwiye ruzajyana ku isoko ry’umurimo kandi bagatanga umusaruro.

Veda yasobanuye ko ALU ifite imyigishirize iri ku kigero kigezweho, abarimu bafite ubunararibonye baturuka muri Kaminuza nziza ku isi nka Harvard na Massachusetts.
Yahishuye ko kuzana Kaminuza ya ALU mu Rwanda bitazungukira abanyeshuri gusa ahubwo bizanagirira umumaro abenegihugu bazahabwa akazi bakanahugurirwa gukora nk’abafasha mu masomo azajya atangwa n’iyo Kaminuza.

Avuga ku cyatumye baza gukorera mu Rwanda,Veda yagize ati “U Rwanda rwagaragaje ko rushishikajwe no guteza imbere uburezi bw’amashuri makuru na za Kaminuza. Turahamya ko ari ahantu heza kuri twe ho gukorera ibikorwa byacu.”
Amasomo yo mu bwoko bwa ‘Engineering’ azajya yigwa imyaka ine naho ayo mu bumenyi rusange ‘Social Sciences’ yigwe imyaka itatu.
Veda yavuze ko Kaminuza izajya yakira abanyeshuri batsinze neza mu cyiciro cy’amashuri barangije kandi bagaragaje umusanzu wabo mu baturage.

Yasobanuye ko bafite uburyo bwo gufasha abadafite ubushobozi bwinshi bashaka kwiga muri iyo Kaminuza bwitwa ‘Income Sharing Agreement (ISA)’.

Yagize ati “Dufite gahunda y’ubufasha mu bushobozi bw’amafaranga aho tuzajya tumenya ubushobozi bw’umunyeshuri bwo kwishyura amasomo ye, abatabishoboye bahabwe inkunga y’ayasigaye binyuze muri iyo gahunda.”

Ubuhamya bw’abasanzwe biga muri ALU

Umwe mu basanzwe biga muri ALU i Mauritius, Lea Umurerwa, wiga ‘Electrical Engineering’, yavuze ko kuba iyi kaminuza ije mu Rwanda bizatanga umusaruro mwiza ku Banyarwanda kuko abana babo bazahabwa uburezi bufite ireme bityo babashe no guhangana ku isoko ry’umurimo.

Yagize ati “ALU itanga ubuyobozi n’ubushobozi bwo kwihangira imirimo no gukemura ibibazo. Twumva dushobora guhangana ku isoko ry’umurimo”.

Yakomeje avuga ko buri mwaka biga amezi umunani andi ane bakayimenyerezamo umwuga. Kuri ubu Umurerwa yimenyereza muri Tigo Rwanda. Ibi ngo bituma batyara bakabasha guhangana ku isoko ry’umurimo ry’Isi yose.

Annick La Reine Shimwa undi munyeshuri wiga muri ALU i Mauritius, yasobanuye ko abakozi bayo bateza imbere gukorera hamwe, gukurikirana abanyeshuri yaba buri umwe ku giti cye kandi bakubaha imico y’ahantu hatandukanye.

Uwitwa Dushime Jonathan wiyandikishije muri iyi Kaminuza akoresheje ikoranabuhanga, yavuze ko yishimiye guhabwa ubumenyi mu bijyanye n’ubuyobozi.

Umutangana Marie Aime Jacqueline, umubyeyi ufite umwana wiga muri ALU i Mauritius, yavuze ko yabonye iterambere ry’ubwenge bw’umukobwa we no gukorana n’abandi kuva yajya muri iriya kaminuza.

Yagize ati “Umukobwa wanjye yagiye kwiga muri ALU arangiye muri Gashora Girls School. Ntabwo yakoranaga n’abandi bihagije ariko twabonye impinduka zikomeye agarutse mu rugo aje kwimenyereza ibyo yiga. Arasobanutse kandi yiyongereye cyane uburyo akorana n’abandi abikuye mu burezi butandukanye yahawe. Yamenye guhanga udushya ku rwego rwo kuba ategura ibikorwa byo guhuriza hamwe abanyeshuri bafite impano zitandukanye z’ubugeni.”

ALU izaba ari Kaminuza ya 33 mu Rwanda. Ifite ubufatanye n’andi mashuri akomeye. Abanyeshuri bazajya bahabwa amasomo kuri internet ava muri ayo mashuri, ariko rimwe mumezi ane, abarimu bavuye muri ayo mashuri bazajya baza mu Rwanda bigishe abanyeshuri barebana.

Abanyeshuri basobanuriwe uko amasomo atangwa muri iyi kaminuza ndetse n'inzira zo kwiyandikisha
Umwe mu bayobozi b'iyi kaminuza
Umuyobozi ushinzwe imyitwarire y’abanyeshuri muri ALU i Mauritius, Veda Sunassee
Umwe mu babyeyi bafite abana basanzwe biga muri iyi kaminuza muri Mauritius
Umunyeshuri usanzwe yiga muri iyi kaminuza mu ishami ryayo muri Mauritius
Umuyobozi Mukuru wa Rwanda Online, Uwajeneza Clement

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved