Kwamamaza

Mu mibare: Ni he umugore mu Rwanda amaze gutera imbere, ni he agicumbagira?

Yanditswe kuya 10-10-2016 saa 08:26' na Rabbi Malo Umucunguzi


Raporo mpuzamahanga zitandukanye zigaragaza u Rwanda nk’igihugu kiri kuzamuka cyane mu iterambere, by’umwihariko mu nzego zinyuranye zirimo abagore, aho mu 2015 rwaje ku mwanya wa Gatandatu ku Isi n’urwa Mbere muri Afurika mu kuziba icyuho cy’uburinganire.

Ikigo cy’Igihugu cy’Ibarurishamibare mu Rwanda, NISR, cyifashishije raporo z’ibigo bitandukanye, kigaragaza imibare yerekana intambwe umugore amaze gutera mu nzego zirimo uburezi, ubuzima, kubona imirimo, iterambere n’izindi, hagereranywa abagabo n’abagore.

Muri iyi raporo igaragaza imibare yo mu 2015, NISR yerekana ko icyo gihe mu Rwanda Abanyarwanda bari miliyoni 11.2, barimo abagabo miliyoni 5.4 (48.3%) n’abagore miliyoni 5.81 (51.7%), bigaragaza ko iyo habaruwe abagore 100 bajyana n’abagabo 94.

Mu mashuri

NISR igaragaza ko mu bana bafite hagati y’imyaka itatu n’itandatu nk’imyaka y’abana bari mu mashuri y’incuke, abakobwa ni 5.4% mu gihe n’abahungu ari 5.4%.

Ku bari hagati y’imyaka irindwi na 12 ibemerera kwiga mu mashuri abanza, abakobwa ni 8.1% mu gihe abahungu ari 8.0%. Iyo bigeze mu myaka 12 na 17 y’abajya mu mashuri yisumbuye, abakobwa ni 6.7% mu gihe abahungu ari 6.5%.

Imibare ya Minisiteri y’Uburezi yerekana ko mu 2015 mu mashuri abanza, abakobwa babarurwaga ari 1. 236. 686 mu gihe abahungu bari 1. 214. 019 (abakobwa biharira 50.5%); mu mashuri yisumbuye ho abakobwa bari 287, 302 mu gihe basaza babo bangana na 256,634 (Abakobwa bihariye 52.8%).

Mu barimu bafite ubushobozi bwo kwigisha mu mashuri abanza, abagore ni 21, 227 mu gihe abagabo ari 18, 226; mu gihe abarimu bigisha mu mashuri yisumbuye harimo abagore 5, 157 (29%) n’abagabo 13, 607 (70.1%).

Mu bafite ubushobozi bwo kwigisha mu byiciro biri hejuru y’amashuri yisumbuye, abagore ni 1, 574 mu gihe abagabo ari 4,857.

Iyi mibare kandi igaragaza ko nk’iyo bigeze muri za Kaminuza, hari amasomo abakobwa batitabira nk’abahungu, kuko nko mu bijyanye n’ubumenyamuntu n’ubugeni harimo abakobwa 1, 042 n’abahungu 2, 607.

Mu masiyansi ho harimo abakobwa 3, 038 n’abahungu 6, 577, naho mu masomo afatwa nka ‘Engineering’( imibare, ikoranabuhanga,...), gukora mu nganda n’ubwubatsi hakabamo abakobwa 1,249 n’abahungu 5,462.

Gusa mu masomo y’ubumenyi rusange, ubucuruzi n’amategeko, abakobwa basa n’abari hejuru ya basaza babo bitewe n’uko abakobwa bayiga bangana na 20, 433 mu gihe abahungu ari 17, 506.

Urwego rw’ubuzima

NISR igaragaza ko mu 2015 abangavu babyaraga bari hagati y’imyaka 15-19 bari 7.3%, mu gihe mu bagore n’abakobwa bari bafite hagati y’imyaka 25-49 batewe inda bari munsi y’imyaka 15 bari ku kigero cya 0.4%.

Muri rusange abana bahabwa inkingo zose z’ingenzi ni 92.6%. Abakobwa bahabwa izo nkingo bangana na 92.3% mu gihe abahungu ari 93%.

Abana bagwingiye bari ku gipimo cya 37.9%. Abana b’abakobwa bahuye n’icyo kibazo bangana na 32.4% mu gihe basaza babo bari ku kigero cya 42.7%.

Abana bapfaga bataruzuza umwaka bavutse bangana na 32/1000. Abakobwa bapfaga muri icyo gihe bari 39/1000 mu gihe abahungu ari 45/1000.

Abapfaga bari munsi y’imyaka itanu muri rusange bari 50/1000. Abakobwa 60/1000 ni bo bapfaga batarageza iyo myaka mu gihe abahungu bari 70/1000.

Ubukungu

Iyi mibare igaragaza ko abafite imirimo guhera ku myaka 16 kuzamura, abakobwa ari 85.5%, mu gihe abagabo ari 85.8%.

Mu rubyiruko rudafite akazi ruri hagati y’imyaka 15 na 24, abakobwa cyangwa abagore ni 4.4% mu gihe abahungu ari 3.6%. Mu badafite akazi bari hagati y’imyaka 16 na 30, abakobwa ni 16.5% mu gihe abahungu ari 7.3%.

Ubushomeri hagati y’imyaka 16 na 64 abagore ni 2.1% mu gihe abagabo ari 1.9%, ndetse binagaragara ko mu buhinzi abagore aribo benshi (66.2%), mu gihe abagabo ari 42.8%.

Ku bantu bafite hejuru y’imyaka 16 bafite akazi mu nzego za leta, abagore ni 34.9% n’abagabo 60.6%; abagafite mu nzego z’abikorera, abagore ni 53.9% n’abagabo 46.1%; imiryango idaharanira inyungu iha akazi abagore ku kigero cya 54.6% n’abagabo kuri 45.4%.

Muri rusange abakozi b’abagore ni 11.5% n’abagabo 24.6%, naho abatanga akazi, abagore ari 0.3% mu gihe abagabo ari 0.6%.

Uko abagore basanganyijwe mu myanya ya leta

Imibare y’Urwego rugenzura ihame ry’uburinganire, (Gender Monitoring Office) yo mu 2014, igaragaza ko mu bakozi ba leta muri rusange abagore ari 43.5% mu gihe abagabo ari 56.5%.

Ku Buyobozi bwa za Ministeri, muri Gicurasi 2015 abagore bari 40% n’abagabo 60%. Mu banyamabanga bahoraho, abagore bari 31.6% n’abagabo 68.4%. Muri ba Ambasaderi, harimo abagore 22.6% n’abagabo 77.4%; Abayobozi bakuru b’ibigo n’abanyamabanga Nshingwabikorwa (imibare ya 2014) harimo abagore 37.2% n’abagabo 62.8%.

Mu Nteko Ishinga Amategeko Umutwe w’Abadepite (imibare ya 2014), igaragaza ko abagore bari 64% n’abagabo 36%, mu gihe muri Sena abagore ari 38% n’abagabo 62%.

Ba guverineri b’abagore bangana na 60% mu gihe abagabo ari 40%, Abayobozi b’Inama Njyanama z’Uturere harimo abagore ku kigero cya 40.9% n’abagabo 59.1%, mu bayobozi b’uturere harimo abagore 16.7% n’abagabo 83.3%.

Abayobozi b’uturere bungirije bashinzwe iterambere ry’ubukungu barimo abagore 20% n’abagabo 80%, abayobozi b’uturere bashinzwe imibereho myiza abagore ni 76.7% n’abagabo 23.3%, muri za Njyanama z’uturere hakabamo abagore 45.2% n’abagabo 54.8%.

Mu Banyamabanga Nshingwabikorwa b’uturere harimo abagore 7% n’abagabo 93%, Abanyamabanga Nshingwabikorwa b’imirenge barimo abagore 11% n’abagabo 89%, mu gihe Abanyamabanga Nshingwabikorwa b’utugari barimo abagore 35% n’abagabo 65%.

NISR yagaragaje ko muri serivisi z’imari nk’abantu bafite guhera ku myaka 18 kuzamura, abagore bizigamira hatitawe ku buryo bifashisha ni 84% mu gihe abagabo ari 87%.

Mu bakoresha amabanki, abagore ni 41% mu bagabo 56%, ariko iyo bigeze ku kwizigamira hifashishijwe ubundi buryo bw’imari, abagore ni bo benshi na 57% mu gihe abagabo ari 54%.

Imibare y’abaturage bafite guhera ku myaka 18 kuzamura babika amafaranga mu nzu zabo, abagore ni 36.7% mu gihe abagabo ari 37.9%.

Umubare w'abagore mu Nteko Ishinga Amategeko warazamutse, gusa hari izindi nzego batarisangamo bihagije

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved