Kwamamaza

Mu myaka 12,Amerika imaze gukoresha miliyari zirenga 800 Frw mu kurwanya Sida mu Rwanda

Yanditswe kuya 1-12-2016 saa 18:14' na IGIHE


Ambasade ya Leta Zunze Ubumwe za Amerika mu Rwanda, yatangaje ko kuva mu 2004, icyo gihugu cyashoye asaga miliyari imwe y’amadolari, ni ukuvuga hafi miliyari zisaga 800 binyuze muri gahunda y’ubufasha yatangijwe na Perezida wa Amerika igamije kurwanya Sida, President Emergency Plan for AIDS Relief, PEPFAR.

Mu gihe kuri uyu wa Mbere Ukuboza Isi yizihiza umunsi mpuzamahanga wo kurwanya Sida, Umuyobozi Ushinzwe Ibikorwa bya Ambasade ya Amerika mu Rwanda, Matthew Roth, yatangaje ko bishimira umusanzu batanga mu kurwanya icyorezo cya Sida mu Rwanda.

Mu itangazo yashyize ahagaragara, Roth yagize ati “Binyuze muri PEPFAR, Guverinoma ya Leta Zunze Ubumwe za Amerika imaze gukoresha asaga miliyari $70 mu kurwanya virusi itera Sida ku Isi hose, harimo miliyari 50 z’amadolari kuva ubuyobozi bwa Obama bwatangira.’’

“Mu Rwanda, PEPFAR yashoye agera kuri miliyari imwe y’amadolari guhera mu 2004. Ku bufatanye na Guverinoma y’u Rwanda na UNAIDS (Ishami ry’Umuryango w’Abibumbye rishinzwe kurwanya Sida), PEPFAR ifasha mu kubona imiti igabanya ubukana bwa virusi itera Sida ku bantu 98 001, barimo abana 5 040. Muri uyu mwaka ushize, PEPFAR yatanze ubufasha bwo gusiramura abagabo 50 204, inafasha mu gusuzuma agakoko ka Sida n’ubujyanama ku bagore 146 315 batwite, inatera inkunga impfubyi n’abana batishoboye 72 448.’’

Yavuze ko kandi bari mu murongo Umuryango w’Abibumbye wihaye ko nibura mu 2020, ivuga ko 90% by’ababana na Virusi itera Sida bazaba bazi ko bayifite, 90% bagafata imiti igabanya ubukana na 90% by’ abari ku miti bakagera ku rwego Virusi itera Sida itagitembera mu maraso yabo.

Ati “Tugomba gukoresha uyu mwanya mu gushyira u Rwanda mu murongo wo kuba rwabasha kurandura icyorezo cya Sida.’’

Nyuma y’ikomorerwa ry’abantu benshi batemererwaga gufata imiti igabanya ubukana bwa virusi ya Sida hatarebwe ku gipimo cy’abasirikare umuntu asigaranye mu mubiri, ‘Treat All’ gahunda yatangijwe muri Nyakanga 2016, guverinoma ya Amerika n’u Rwanda bafatanyije mu gutanga imiti kuri bose, bituma abantu ibihumbi 17 babana n’ubwandu bwa virusi itera SIDA batari bemerewe gufata iyo miti bayitangira.

Roth yakomeje agira ati “Ikintu gikomeye twifuza gukora mu Rwanda ni ukongerera ubushobozi abangavu n’abagore bakiri bato kurinda ubuzima bwabo, kwita ku miberehoyabo no kurangamira inzozi zabo. Mu mwaka ushize, abangavu n’abagore bakiri bato 390 000 bari bafite VIH, abarenga 1000 bakandura buri munsi. Abangavu n’abagore bato bandura biharira 75% by’ubwandu bushya muri Afurika yo muri y’Ubutayu bwa Sahara.’’

Amerika ivuga ko kugira u Rwanda rushya ruzira virusi itera Sida atari ibintu byoroshye cyangwa bizikora ako kanya, ahubwo bisaba ko abantu bahuza imbaraga kugira ngo bigerweho.

Kurwanya virusi itera Sida bikeneye imbaraga zihariye, kuko hagendewe ku mibare y’abapfa buri mwaka bahitanwe n’icyo cyorezo, nibura mu cyumweru abantu bakuru 20 000 n’abana 2 100 bapfa bitewe n’ingaruka z’iyo virusi, abakuru basaga 37 000 bakandura barimo abagore bakiri bato 7 500.

Kugeza ubu mu Rwanda umubare w’abafata imiti igabanya ubukana bwa Virusi itera Sida bagera hafi ku 180 000, abafite iyo virusi bakaba ari 3%, ni ukuvuga ko abagera ku bihumbi 210. Abagera ku 5000 bicwa na yo buri mwaka.

Umuyobozi Ushinzwe Ibikorwa bya Ambasade ya Amerika mu Rwanda, Matthew Roth

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved