Kwamamaza

Mu myaka 8 abagore 3000 bamaze kuvurwa indwara yo kujojoba

Yanditswe kuya 19-10-2016 saa 12:35' na Jean Pierre Tuyisenge


Minisiteri y’Ubuzima itangaza ko kuva mu mwaka wa 2008, abagore bagera ku 3000 bamaze kuvurwa indwara ya Fistule (Kujojoba) n’itsinda ry’ Abaganga bari mu muryango Mpuzamahanga w’Abagore baharanira iterambere (IOWD).

IOWD ni umuryango w’abakorerabushake bafite itsinda ry’Abaganga baza mu Rwanda gatatu mu mwaka kuvura abagore bafite indwara yo kujojoba (Fistule) ku buntu, bakaba baje ku nshuro ya 20 ku bitaro bya Kibagabaga.

Muri birori byo kwishimira ko abagore 604 bavuwe iyo ndwara n’iryo tsinda kuva mu mwaka wa 2011, ibyo bitaro byahawe ibikoresho byifashishwa mu buvuzi bifite agaciro ka miliyoni 16 z’Amafaranga y’u Rwanda, nk’uko The New Times yabyanditse.

Umunyamabanga wa Leta muri Minisiteri y’Ubuzima, Patrick Ndimubanzi yavuze ko indwara ya Fistule ikwiye guhagarikwa kuko ngo igira ingaruka mbi ku bagore.

Yagize ati “ Tuzi neza twese ko Fistule ari indwara ikunze gufata abagore mu gihe cyo kubyara kandi ikabagiraho ingaruka ku mubiri, ikanabaca mu bandi. Abagore bayirwaye bakunze kwiyumvaho igisuzuguriro, kutegera aho abandi bari, ndetse ntibabashe kugira uruhare mu bikorwa byo muri Sosiyete, bikabatera kubaho mu buzima batifuza.”

Ndimubanzi yavuze ko hari ingamba mu kongera imbaraga mu bikorwa by’Ubuvuzi, zirimo guha amahugurwa abaganga bakagira inararibonye mu kubyaza, hakanakazwa ingamba zo kuboneza imbyaro.

Ati “ Ni ngombwa ko hubakwa ubushobozi, tukagira itsinda ry’abantu bashobora kuvura ababa bahuye n’icyo kibazo. Ni byiza ko hahugurwa abaganga bashobora kurinda ubuzima bw’abantu. Ni ngombwa kandi ko mu minsi mike iri imbere twe nk’igihugu, tuzaba dufite ubushobozi bwo kvura abantu bafite iyi ndwara”.

Umuyobozi Mukuru wa IOWD, Barbara Margolies, yishimiye ko nyuma y’igihe kinini abagore bababara, ubu bari mu buzima busanzwe, ashimira itsinda rye ryakoze icyo gikorwa.

Yagize ati “ Aba bagore bari bamaze imyaka myinshi bababazwa n’ubu burwayi, uyu munsi bishimiye ko bagarukanye agaciro kabo, ubu bashobora kujya ku masoko, bashobora kwicarana n’imiryango yabo kuko ni bazima, barakomeye kandi barishimye.”

Yongeyeho ati “ Dushimiye ibitaro bya Kibagabaga kuko iyo bitatwakira ntituba twarabashije kukora iyi gahunda, iyo tudafashwa n’abaganga b’Abanyarwanda dukoranye imyaka igera kuri itandatu n’igice, ntituba twarashoboye kubigeraho."

Alexia Mukabalisa, umugore waturutse mu Ntara y’Amajyepfo yavuze ko yari agiye kwiyahura abitewe no kubabazwa n’iyo ndwara ariko aza gukira abikesha IOWD.

Ati “ Mfite abana babiri, nari maranye ubu burwayi imyaka icyenda, sinari mfite icyizere cy’ubuzima kuko nta muntu n’umwe wifuzaga kuza hafi yanjye; ubu ubuzima bwarahindutse .”

Fistule ni iki?

Fistule cyangwa kujojoba, ni indwara iterwa n’uko haba habayeho gukomereka mu gice ndangagitsina cy’umugore mu gihe arimo kubyara. Ibyo bigaragara cyane ku bagore batabyarira kwa muganga kandi baba bakeneye kubagwa, bigatuma habaho inzira idasanzwe ihuza uruhago rw’inkari, inzira y’inkari n’inkondo y’umura cyangwa inkondo y’umura n’urura runiri rusohora umusarani.

Bigatuma umugore ahora asohora imyanda twakwita ko iba yayobye kuko inyura mu nkondo y’umura igasohokera mu gitsina nta rutangira.

Barbara Margolies yahawe impano nyinshi ashimirwa
Umunyamabanga wa Leta muri Minisiteri y'Ubuzima, Patrick Ndimubanzi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved