Kwamamaza

Mu myaka itanu,ikigega Agaciro Development Fund kimaze gutangwamo Miliyari 38

Yanditswe kuya 2-12-2016 saa 06:00' na Cyprien Niyomwungeri


Kuva mu mwaka wa 2012 Perezida wa Repubulika Paul Kagame atangije ikigega Agaciro Development Fund, Abanyarwanda n’inshuti zabo bakomeje gutangamo imisanzu bashyigikira umuco wo kwigira, aho kugeza ubu bamaze gutanga miliyari 38 z’amafaranga y’u Rwanda.

Iki kigega cyatangiranye miliyari 17, abakiyobora bavuga ko iyi misanzu yabaye mike bitewe n’uko Abanyarwanda batakomeje umuvuduko batangiranye wo kuyitanga, kuko ngo iyo bawukomeza nibura kiba kirimo miliyari 110.

Ibi nibyo byatumye ku mugoroba wo kuwa 1 Ukuboza 2016, ubuyobozi bw’Agaciro Development Fund buganiriza abikorera nka rumwe mu rwego rwafashe iya mbere mu gushyigikira iki kigega, kugira ngo umurava bari bafite gishyirwaho bongere bibuke ko bikiri inshingano zabo kongera kugiteza imbere.

Umuyobozi w’iki kigega, Jack Kayonga, yabwiye itangazamakuru ko abikorera hamwe n’abanyarwanda muri rusange badohotse ku gutanga imisanzu, bitewe n’uko biyumvishije ko gutanga imisanzu rimwe gitangizwa bihagije. Ibi ngo bikaba byagorana ko kigera ku mari ya miliyari 200 cyifuza kugeraho mu myaka ya vuba.

Yagize ati “Barasa nabahagaritse, iyo dukomeza nkuko twatangiye dufite miliyari 17, uyu munsi twakabaye dufite miliyari 110 ari nayo mpamvu twumva ko na miliyari 200 zishoboka mu gihe abanyarwanda bose bakomeza kumva ko ari inshingano zabo, iki kigega bakakigira icyabo,bakumva ko kizafasha leta kugira ngo igere ku bikorwa bitandukanye, kandi ari umurage w’u Rwanda rw’ejo hazaza.”

Akomeza avuga ko hatangiye gushyirwamo imbaraga nk’izo cyatangiranye kugira ngo abanyarwanda bongera bumve ko ari inshingano zabo kwiyubakira igihugu cya none n’ejo hazaza.

Ati “Tugomba gufatanya gukomeza kubaka u Rwanda kandi tugira ikigega gikomeye gifite nibura miliyari 200 kugira ngo gishobore gufasha leta mu bikorwa bitandukanye.”

Kayonga avuga ko kugira ngo iki kigega kigere ku cyifuzo cya Perezida wa Repubulika habayeho ibiganiro bitandukanye, bakemeranya ko kugira ngo abikorera bashobore gushyiramo umusanzu ufatika bazajya batanga umusanzu bakawusonerwa ku misoro.

Ati “Imisanzu yose bazajya batanga itarenze 1% ry’ibyo binjiza, bazajya bayikurirwa ku misoro n’ikigo gishinzwe imisoro n’amahoro. Ibi byakozwe kuko leta ibona iki kigega nk’icyayo cyo kwizigamira ejo hazaza.”

Umyobozi w’urugaga rw’abikorere, Benjamin Gasamagera, yavuze ko bumva neza akamaro k’iki kigega kandi hari byinshi biyemeje mu kongera kugishyigikira birimo guhindura imyumvire yo kumva ari icy’abakoresha gusa.

Yavuze ko abikorera bemeye ko n’abakozi babo bazajya batanga hagati ya 1% na 2% by’imishahara kugira ngo bashyigikire ikigega.

Yagize ati “Ntabwo ikigega cyaharirwa ba nyir’ibigo nkuko mbere byari byagenze kuko kiriya kigega ni icy’abanyarwanda bose. Twumvikanye n’ikigega ko hagati ya 1% na 2% ko twajya dutangamo umusanzu wacu wa buri kwezi mu bigo byacu kandi uwayatanze nta mvune yakumva.”

Yashimye cyane gahunda ya Guverinoma yo kujya bakata umusanzu batanze ku misoro y’ibyo bakora, avuga ko biyemeje kongeramo ingufu kandi bikava mu buryo byari byakozwemo ku ikubitiro aho bakusanyije inkunga bamwe bakibwira ko byarangiye.

Kugeza ubu amafaranga yo mu Agaciro Development Fund ntabwo yigeze ashyirwa mu ishoramari kuko hatarubakwa ubushobozi bw’ikigega, kuri ubu akaba yaratijijwe amabanki andi atizwa leta binyuze mu kugura impapuro mpeshwafaranga. Izirenga miliyari 30 nizo zibikijwe mu mabanki yungukira ikigega.

Mu mwaka wa mbere ikigega Agaciro Development Fund cyatangiranye miliyari 17, mu 2013 cyarimo 20.5, mu 2014 cyarimo angana na miliyari 24.9, umwaka washize cyarimo miliyari 29.2 z’amafaranga y’u Rwanda.

Umuyobozi wa Banki y'Abaturage mu Rwanda, Sanjeev Anand (hagati) aganira n'abandi bikorera bari bitabiriye uyu mugoroba
Umuyobozi w’Ikigega Agaciro Development Fund, Jack Kayonga
Umuyobozi Mukuru w'Urugaga rw'Abikorera mu Rwanda (PSF), Gasamagera Benjamin
Umuyobozi wa Banki y'Abaturage mu Rwanda, Sanjeev Anand ageza ijambo ku bitabiriye
Jack Kayonga akurikiye ubutumwa bwatangwaga n'abandi bikorera
Umuyobozi ushinzwe ubucuruzi muri Cogebanque, Mujyambere Louis de Montfort aganira na Gasamagera Benjamin uyobora PSF

Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved