Mu myaka itatu, harigishijwe arenga miliyari 16 z’amafaranga y’u Rwanda

Yanditswe na Cyprien Niyomwungeri
Kuya 17 Gashyantare 2017 saa 12:04
Yasuwe : XX
0

Ubushinjacyaba bukuru bwagaragaje ko ibyaha bifitanye isano no kurigisa amafaranga byagendeyemo asaga miliyari 16, impungenge zikaba ziri ku bya ruswa kuko kubikurikirana bikigoye kubera amayeri bikoranwa.

Ibi byatangarijwe mu nama nyunguranabitekerezo ku guhangana na ruswa, inzitizi zikigaragara n’ingamba zafatwa, yateguwe n’ihuriro ry’abagize Inteko Ishinga Amategeko y’u Rwanda riharanira kurwanya ruswa, APNAC Rwanda.

Mu kiganiro ku miterere ya ruswa n’amayeri mashya yo kuyitanga cyatanzwe n’Umushinjacyaha Mukuru, Jean Bosco Mutangana, Depite Nkusi Juvenal uyobora PAC na ACP Jean Nepo Mbonyumuvunyi, hagaragajwe ko mu myaka itatu ishize amadosiye yo kunyereza imisoro ariyo afite amafaranga menshi.

Umushinjacyaha Mukuru wa Repubulika, Mutangana, yavuze ko mu myaka itatu [2013-2014, 2014-2015, 2015-2016], ubushinjacyaha bwakiriye amadosiye 827 yo kurigisa imari ya leta, 527 yo kurigisa amafaranga y’amakoperative, 138 yo kurigisa amafaranga y’amabanki n’amadosiye 128 yo gutanga nabi amasoko ya leta binyuranyije n’amategeko.

Yasobanuye ko icyiyongereye ari uburyo abantu bakanguriwe gutanga amakuru kuri ruswa n’indi mikorere mibi bakabasha kumenyesha polisi n’izindi nzego zishinzwe kurwanya ruswa, ariko hakiri imbogamizi yo gushaka ibigize icyaha kubera amayeri biriya byaha bikorwamo.

Umushinjacyaha Mukuru, Jean Bosco Mutangana

Mutangana yavuze ko amafaranga yose yemejwe n’inkiko ko yarigishijwe arenga miliyari 16 Frw (16,205,713,018) akaba ari mu byiciro by’ibyaha umunani.

Ibyo birimo kurigisa amafaranga ya leta aho ayaburiwe irengero arenga miliyari ebyiri; kurigisa amafaranga y’amabanki aho arenga miliyari enye; kurigisa amafaranga y’amakoperative aho arenga miliyari eshanu; gukwepa imisoro ni miliyari imwe na miliyoni zirenga 500; gusonerwa imisoro mu buryo bunyuranyije amategeko byagendeyemo miliyoni n’ibihumbi bisaga 500; ruswa n’ibyaha bishamikiye harigishijwe miliyoni zirenga 53; gutanga amasoko mu buryo bunyuranyije n’amategeko hagenderamo miliyari na miliyoni zirenga 193.

Ahandi haburiye amafaranga ya leta ni mu bijyanye no gucunga imitungo ifitiye abaturage akamaro aho miliyoni umunani n’ibihumbi birenga 500 byarigishijwe.

Mutangana yasobanuye ko amadosiye yo kurigisa imisoro usanga ubushinjacyaha butabona ibimenyetso ngo buregere inkiko kuko babikora bihishe bigatuma iperereza ritinda kurangira.

Mu myaka itatu hagaragaye kunyereza amafaranga leta ishyira muri gahunda zigamije kuzamura abaturage aho muri Mutuelle de santé hanyerejwe 557 744 678 mu madosiye 31, VUP hanyerejwe 454 982 125 mu madosiye 49, Girinka aba 269 445 500 mu madosiye 25, Umurenge Sacco mu madosiye 30 angana na miliyoni 257 119 051.

Guverineri w'Intara y'Iburasirazuba, Kazaire Judith ni umwe mu bitabiriye ibi biganiro
Minisitiri w'Umuco na Siporo, Uwacu Julienne, akurikiye ibiganiro mu Nteko Ishinga Amategeko
Perezida w'Inteko Ishinga Amategeko umutwe wa Sena, Bernard Makuza ari kumwe na Perezida w'Inteko Ishinga Amategeko umutwe w'Abadepite, Mukabalisa Donatille
Abayobozi mu nzego zitandukanye bitabiriye ibiganiro bigamije gushaka uburyo ruswa yarandurwa
Depite Nkusi Juvenal uyobora Komisiyo ishinzwe kugenzura imikoreshereze y'imari n'umutungo bya Leta, PAC, atanga ibitekerezo

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza