Mufti w’u Rwanda yibukije Abayisilamu ko gusoza igisibo bitavuze gusubira mu byaha

Yanditswe na Habimana James, Thamimu Hakizimana
Kuya 4 Kamena 2019 saa 11:09
Yasuwe :
0 0

Mufti w’u Rwanda, Sheik Salim Hitimana, yabwiye Abayisilamu ibihumbi birindwi bari bateraniye kuri Stade ya Kigali i Nyamirambo mu Mujyi wa Kigali, ko bakwiye kwirinda gusubira mu byaha nyuma yo gusoza ukwezi gutagatifu kwa Ramadhan.

Kuri uyu wa Kabiri nibwo Abayisilamu hirya no hino ku Isi basoje ukwezi gutagatifu kwa Ramadhan (Eid El Fitr), mu Rwanda uyu muhango wabereye mu Karere ka Nyarugenge kuri Stade ya Kigali i Nyamirambo.

Ni umuhango utitabiriwe nk’uko byari bisanzwe mu myaka yatambutse, bitewe n’imvura yazindutse ikarogoya bamwe bagombaga kwitabira.

Amakuru IGIHE yabonye ni uko Abayisilamu ibihumbi birindwi bashobora kuba aribo bitabiriye iki gikorwa, mu gihe mu myaka ishize hataburaga abarenga ibihumbi 11.

Mu butumwa yatanze, Sheik Salim Hitimana yavuze ko kuba imvura yaguye ari umugisha, aboneraho kubabwira ko bakwiye guha agaciro iyi minsi bamara mu gisibo ntibumve ko nyuma bagomba kwishora mu byaha.

Ati “Nubwo igisibo cya Ramadhan kirangiye ibikorwa byiza ntibirangiye, ntabwo mugomba gusubira mu nzoga, uburaya n’ibindi bikorwa bibi nk’ibyo, mukomeze mube abanyakuri.”

Umwe mu bayisilamu waganiriye na IGIHE yavuze ko akenshi hari bagenzi be bumva ko mu gihe bari mu gisibo badashobora gukora icyaha, nyamara ya minsi yarangira ugasanga basubiye mu bikorwa bibi.

Ati “Muri iyi minsi usanga hari utubari twahombye, indaya zarabuze abakiliya, ibibi bigaragara ariko ya minsi irangiye usanga basubiye mu byaha.”

Yavuze ko idini rikwiye gukomeza kuba mu bantu ntibadohoke kuko igisibo cyarangiye.

Igisibo ni rimwe mahame atanu y’iri dini, risaba abayoboke baryo kwigomwa amafunguro, ibinyobwa mu bihe bisanzwe n’ibindi bibashimisha, bakarangamira Imana. Gusa bemerewe gufata ifunguro izuba rirenze no mu rukerera.

Amafoto: Imvura yakangaranyije Abayisilamu bituma badasoza igisibo nk’uko byari bisanzwe


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza