Mugabanye umubare w’ibibazo n’amarira batura Perezida kubera uburangare n’akarengane – Min. Kaboneka

Yanditswe na Mathias Hitimana
Kuya 19 Werurwe 2017 saa 02:53
Yasuwe :
0 0

Mu gihe bimaze kumenyerwa ko aho Umukuru w’Igihugu asuye abaturage, usanga baniga bashaka kumugezaho ibibazo batakemuriwe n’inzego z’ibanze, Minisitiri w’Ubutegetsi bw’Igihugu, Francis Kaboneka, yasabye abayobozi b’inzego z’ibanze kubikemura kare mu mucyo.

Mu mpanuro Kaboneka yatangiye i Bugesera hasozwa umwiherero wahuje Minisiteri y’Ubutegetsi bw’Igihugu n’abayobozi b’inzego z’ibanze, yagarutse ku kunoza imikorere yazo, abibutsa ko kwita ku baturage bashinzwe, ntihagire urenganywa mu bibazo afite ku buryo yumva ko azatabarwa n’ubuyobozi bukuru bw’igihugu.

Yagize ati “Mukemure ibibazo by’abaturage, mugabanye umubare w’ibibazo n’amarira batura Perezida kubera uburangare n’akarengane.”

Yakomeje abasaba gutana burundu n’umuco wo gutanga serivisi mbi, ziherekezwa na ruswa ikigaragara muri zimwe mu nzego z’ibanze.

Minisitiri w’Ubutegetsi bw’igihugu yanagarutse ku makosa ajya avugwa mu buyobozi bw’inzego z’ibanze, aho usanga ibigenerwa abaturage mu kubateza imbere bitabageraho neza, anasaba ko abayobozi ubwabo kudahishira na muri ayo makosa.

Ati “Mubigire kirazira guhishira no gukingira ikibaba abakora amakosa n’abacunga nabi gahunda za Leta, cyane cyane z’abatishoboye.”

Mu myanzuro y’uyu mwiherero, hafatiwemo umwanzuro wo ‘Kwimakaza indangagaciro yo kuvugisha ukuri, kwirinda no kurwanya ruswa, guhanahana amakuru hagati y’inzego no guca umuco wa “ntiteranya” no kwicecekera aho gufata icyemezo ku kibazo gihari kibangamiye inyungu rusange.’

Inzego z’ibanze zagiye zivugwaho ruswa muri gahunda ya Girinka, ugasanga umuturage udafite ruswa y’amafaranga yahawe akabyiniriro k’ikiziriko iyo gahunda itamugeraho. Ahandi ugasanga abaturage bakora imirimo muri VUP bamara igihe badahembwa, cyangwa hakanakorwa amalisiti y’abakozi ba baringa, amafaranga akanyerezwa.

Uretse ibyo, Kaboneka yongeye kwibutsa abayobozi kutareber imyubakire yo mu kajagari, bagafasha abaturage kubona aho batura hajyanye n’ubushobozi bwabo mucunga neza ubutaka.

Ku byerekeye gukemura ibibazo by’abaturage, mu turere hashize iminsi hashyizweho umunsi umwe mu cyumweru, abayobozi b’inzego z’ibanze bamanuka kujya kumva ibibazo no gukemura ibibazo by’abaturage.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza