Kwamamaza

Mugimba na Iyamuremye bakatiwe gufungwa by’agateganyo iminsi 30

Yanditswe kuya 23-11-2016 saa 17:46' na Philbert Hagengimana


Urukiko rwibanze rwa Nyarugunga rwakatiye gufungwa by’agateganyo iminsi 30, Mugimba Jean Baptiste na Iyamuremye Jean Claude uzwi nka Nzinga, kubera ibyaha bya Jenoside n’ibyibasiye inyokomuntu bakurikiranyweho.

Mugimba Jean Baptiste w’imyaka 57 akurikiranyweho ibyaha birindwi birimo icyaha cya Jenoside, Gucura umugambi wo gukora Jenoside, Ubufatanyacyaha mu gukora icyaha cya Jenoside, Gushishikariza abandi gukora jenoside, ubwicanyi nk’icyaha cya jenoside, kurimbura imbaga nk’icyaha cyibasiye inyokomuntu no kurema umutwe w’abagizi ba nabi, kuwutunganya, kuwuyobora no koshya abandi kuwujyamo.

Ibi byaha ashinjwa ko yabikoreye mu yahoze ari Segiteri ya Nyakabanda, mu Mudugudu w’Abakozi ba BNR.

Iyamuremye we ashinjwa ibyaha bitandatu, bisa neza n’ibya Mugimba, we akaba ashinjwa ko yabikoreye mu yahoze ari Serire Gatare, ubu ni mu Kagari ka Gatare, Umurenge wa Niboye ho mu Karere ka Kicukiro.

Mu rubanza ku ifungwa n’ifungurwa ry’agateganyo rya Mugimba na Iyamuremye, urukiko rwasuzumye ingingo ebyiri, ari zo kureba niba hari impamvu zikomeye zihari zatuma bakurikiranwaho ibyaha bakekwaho, rwasanga bakwiye kubiryozwa, hakarebwa niba bakurikiranwa bari hanze cyangwa bafunze.

Urukiko rushingiye ku byavuzwe n’Ubushinjacyaha n’inyandikomvugo z’abatangabuhamya, rwasanze hari impamvu zikomeye zituma bakurikiranwaho ibyo byaha.

Rwasanze kandi badakwiye gukurikiranwa bari hanze rushingiye ku kuba ibyaha bashinjwa ari ndengakamere bikaba biteganyirizwa igihano kiri hejuru y’imyaka itanu.

Urukiko rwategetse ko Mugimba na Iyamuremye bafungwa by’agateganyo iminsi 30, rubibutsa ko icyo cyemezo kijuririrwa bitarenze iminsi itanu uhereye igihe bakimenyesherejwe.

Mu iburanisha ryo ku wa Mbere, tariki ya 21 Ugushyingo nibwo Ubushinjacyaha bwari bwavuze ko Mugimba, kuwa 8 Mata 1994 yaremesheje inama yitabiriwe na Nyirimanzi Gregoire wari konseye wa Segiteri Nyakabanda mu Mujyi wa Kigali, ikorerwamo urutonde rw’abatutsi bagombaga kwicwa. Icyo gihe ngo yatse imbunda Col Hakizimana Edouard zagombaga gukoreshwa muri jenoside, harimo imwe ngo yashyizwe imbere y’urugo rwe.

Mugimba Jean Baptiste w’imyaka 57, mu gihe cya Jenoside yakorewe abatutsi mu 1994 yari umukozi wa Banki Nkuru y’Igihugu, BNR, akaba n’Umunyamabanga Mukuru w’ishyaka CDR.

Bwanavuze ko mu bishwe nyuma y’urutonde rwakozwe muri iyo nama, Ubushinjacyaha buvugamo Ndungutse Jean Bosco wakoranaga na Mugimba muri BNR, bari banaturanye mu mudugudu witiriwe BNR mu Mujyi wa Kigali. Mugimba kandi ngo yagaragaye kuri za bariyeri ari kumwe n’Interahamwe n’Imbonezamugambi za CDR.

Kuri Iyamuremye Jean Claude uzwi ku izina rya Nzinga, we bwavuze ko ubwo Jenoside yakorwaga yari umusore w’imyaka 18 n’amezi atatu. Ubushinjacyaha bwavuze ko kuwa 7 Mata 1994 yajyanye n’abandi bantu guhiga Bayingana Dismas na Kageyo bagasanga bahunze, bagatwika inzu ye, aho yari atuye muri Kicukiro.

Kuwa 11 Mata, ho bikekwa ko ari kumwe n’abasirikare babiri bayobowe na Col Rusatira hamwe n’abandi bantu benshi, Iyamuremye yagiye mu gitero muri ETO Kicukiro yari yahungiyemo abatutsi benshi, ndetse ajya i Nyanza ahari hahungiye abatutsi bari barokokeye muri ETO.

Umwe mu batangabuhamya yavuze ko Iyamuremye yanishe umwe muri ba nyirarume, uregwa akavuga ko hari ibimenyetso bizerekana ko ibyo ari agashinyaguro kuko umuryango wo kwa mama we wahigwaga.

Inkuru bifitanye isano: Iyamuremye na Mugimba basabye kurekurwa kuko bamaze imyaka itatu muri gereza

Hejuru ku ifoto: Ubwo Mugimba na Iyamuremye bagezwaga mu Rwanda


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved