Muhanga: Abakozi babiri ba Sacco bakurikiranyweho kunyereza miliyoni zisaga 29 Frw

Yanditswe na Emma-Marie Umurerwa
Kuya 8 Kamena 2019 saa 12:19
Yasuwe :
0 0

Umubitsi n’umucungamutungo ba Sacco Icyerekezo, bacyekwaho kunyereza miliyoni zisaga 29 Frw bari mu maboko y’Urwego rw’Igihugu rw’Ubugenzacyaha (RIB) i Kiyumba mu Karere ka Muhanga.

Umwe mu bafunze ni Kabukwiye Elena w’imyaka 31 y’amavuko, utuye mu Mudugudu wa Nyanza, Akagari ka Remera mu Murenge wa Kiyumba, akaba yari umucungamutungo wa Sacco Icyerekezo, mu gashami ka Remera.

Undi ni Niyigena Annoilithe w’imyaka 24 y’amavuko, utuye mu Mudugudu wa Cyakabiri mu Kagari ka Remera mu Murenge wa Kiyumba, akaba yari umubitsi wa Sacco Icyerekezo, mu gashami ka Remera.

Amakuru IGIHE ikesha Urwego rw’Igihugu rw’Ubugenzacyaha, avuga ko bombi bashinjwa kunyereza umutungo wa Sacco Icyerekezo, aho bakekwaho kunyereza Miliyoni zirenga 29 Frw, igenzura rikaba rigikomeje ngo hamenyekane umubare nyawo banyereje.

Umuvugizi wa RIB, Mbabazi Modeste, arasaba abanyarwanda n’abaturarwanda kwirinda ubujura no kunyereza umutungo wa rubanda kuko uzafatirwa muri ibyo byaha atazihanganirwa, ahubwo azahanwa n’amategeko.

Umuyobozi w’Ikigo cy’Igihugu gishinzwe guteza imbere Amakoperative, RCA, Prof. Harelimana Jean Bosco, yabwiye IGIHE ko batazigera bihanganira na rimwe abakoresha umutungo w’abanyarwanda mu nyungu zabo bwite.

Ati “Abakozi ba Sacco, abayobozi b’amakoperative bakwiye kwirinda kwitiranya amafaranga y’abanyamuryango n’ayabo bwite. Abafite iyo mikorere idahwitse bamenye ko batazigera bihanganirwa na gato, ubuyobozi bwa RCA, Polisi na RIB bari maso kandi twese dukomeje gukorera hamwe hagamijwe kubungabunga umutungo w’abanyarwanda.”

Ingingo ya 10 y’Itegeko numero N°54/2018 ryo ku wa 13/08/2018, ivuga ku kunyereza umutungo, ivuga ko kunyereza umutungo ivuga ko umuntu wese, yaba umukozi wa Leta cyangwa undi ukora umurimo wa Leta cyangwa ukora mu nzego zayo, umuyobozi cyangwa umukozi mu kigo cy’ubucuruzi cyangwa isosiyete y’ubucuruzi cyangwa koperative cyangwa ukorera undi muntu, umuryango ushingiye ku idini cyangwa undi muryango uwo ari wo wose, ukoresha mu nyungu ze cyangwa iz’undi, umutungo, amafaranga cyangwa inyandiko z’agaciro, yahawe cyangwa yashyikirijwe kubera imirimo akora cyangwa ukoresha mu nyungu ze abakozi ashinzwe ku bw’umurimo, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza