Kwamamaza

Munyakazi wahawe akazi muri Minisiteri y’Uburezi, yahawe umukoro n’abo yakoreraga

Yanditswe kuya 13-10-2016 saa 12:06' na Tombola Felicie


Prof Nshuti Manasseh, Umuyobozi w’abashinze Kaminuza ya Kigali (University of Kigali), yasabye Munyakazi wagizwe Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi wari usanzwe ukora muri iyo kaminuza, guhagurukira ikibazo cy’ireme ry’uburezi mu mashuri abanza n’ayisumbuye kuko usanga ari ho byose bipfira.

Munyakazi Isaac yashyizwe kuri uwo mwanya tariki ya 4 Ukwakira 2016, Ubwo Perezida Kagame yatangazaga abayobozi bashya muri za Minisiteri n’ibigo bizishamikiyeho n’abayobozi b’intara, aho uyu yasimbuye Olivier Rwamukwaya wagizwe Umunyamabanga wa Leta ushinzwe amashuri y’imyuga n’ubumenyi ngiro.

Mu muhango wo gushimira no kwifuriza imirimo myiza Munyakazi Isaac, witabiriwe n’abarezi ndetse n’abanyeshuri ba Kaminuza ya Kigali, kuri uyu wa 12 Ukwakira 2016, ubuyobozi bwayo bwamushimiye uburyo yitangaga igihe yayikoreraga ariko bunamwereka ko ireme ry’uburezi rigipfira hasi ku buryo bidakosowe n’ubundi nta cyerekezo cyiza uburezi bw’u Rwanda bwagira.

Prof Nshuti Manasseh yagize ati "Turagusaba kwita ku ireme ry’uburezi (quality) kuko ibibazo by’ireme ry’uburezi ubibonera muri Kaminuza. Usanga umuntu atazi kuvuga ururimi urwo ari rwo rwose no kurwandika, ugasanga Ikinyarwanda ntacyo azi, Igifaransa ntacyo azi, Icyongereza ntacyo azi, ibyo rero ni ibibazo biba byaratangiriye hasi. Ibyo yaba yiga byose ntabwo abasha kubigeraho neza kubera izo nzitizi aba afite .”

Yakomeje avuga ko iyi kaminuza itewe ishema n’uyu mugabo ati” Reka mbabwize ukuri, Munyakazi ni umugabo ukunda akazi , ni inyangamugayo afite ubunyarwanda muri we.”

Mu ijambo rye, Munyakazi Isaac yashimiye Umukuru w’Igihugu wamugiriye icyizere akamushinga amashuri abanza n’ayisumbuye, ashimangira ko atazemera ko ireme ry’uburezi rikomeza kuba ikibazo.

Ati “Hakenewe umusaruro uva mu burezi bw’ibanze, abana bakigishwa hakiri kare ibyazatuma bihangira imirimo no gukora udushya aho kurangiza ayisumbuye biteze ubushomeri. Reka mbabwire, burya iyo dusaba abanyeshuri bo muri kaminuza gukora neza kandi nta cyo bavanye mu mashuri abanza n’ayisumbuye tuba tubarenganya.”

Yokomeje avuga ko azakora uko ashoboye hamwe nabo bafatanyije kugira ngo barusheho gufasha umwarimu kumva ko yitaweho.

Ati "Ntabwo ikibazo cy’amafaranga ari cyo umwarimu afite gusa,hari n’ibindi byarebwaho akumva ko yitaweho nawe, bigatuma iryo reme ry’uburezi rizamuka.”

Munyakazi Isaac yageze muri Kaminuza ya Kigali mu ntangiro z’umwaka wa 2013, yari yabanje gukora nk’ushinzwe ireme ry’uburezi muri iyi kaminuza, nyuma aza kuba umuyobozi w’Ishami ry’Ubukungu n’Imicungire y’Ubucuruzi (Dean of the Faculty of Business Management and Economics) akabifatanya no kwigisha.

Abanyeshuri yigishaga n’abo yabereye umuyobozi, bamusabye kuzagendera mu ndangagaciro yabigishaga kugira ngo azabashe gusohoza inshingano ze neza.

Prof Nshuti Manasseh (ibumoso) yasabye Munyakazi kuzita ku ireme ry'uburezi ahereye mu mashuri abanza
Munyakazi yashimiwe ubwitange n'umurava yagaragaje ubwo yakoreraga University of Kigali
Munyakazi (hagati) yakoreraga iyi kaminuza kuva mu 2013
Munyakazi yijeje abo muri iyi kaminuza ko azakora uko ashoboye akazamura ireme ry'uburezi mu Rwanda
Bamwifurije ishya n'ihirwe mu mirimo mishya yashinzwe muri MINEDUC

[email protected]

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved