Munyakazi yagereranyije itorero ry’igihugu no kumesa umwenda wanduye

Yanditswe na Thamimu Hakizimana
Kuya 10 Mutarama 2017 saa 04:32
43 29

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Munyakazi Isaac yagereranyije Itorero ry’Igihugu no kumesa umwenda wanduye kuko urinyuzemo yigishwa indangagaciro na kirazira z’umuco nyarwanda zituma arivamo yabaye umuntu mushya.

Munyakazi avuga ko umuntu wagiye mu Itorero agahabwa amasomo arimo no gukunda igihugu aba ameze nk’umwenda wari ufite ikizinga ariko ukaza kumeswa ugacya.

Aya magambo yayagarutseho kuwa 9 Mutarama 2017, mu muhango wo guha izina ry’ubutore n’icyivugo abarimu bo mu mashuri abanza n’ayisumbuye bamaze iminsi itanu mu Itorero. Abaryitabiriye bahawe izina ry’Indemyabigwi.

Yagaragaje ko iyo umuntu agiye mu Itorero ahakura ubumenyi bwinshi ku buryo agaruka yarabaye mushya yaba mu mikorere n’imigirire ye.

Yagize ati “Ubundi gutoza ni uguhindura imyitwarire; ku buryo umuntu wari ku karubanda akora ibikorwa bitandukanye birimo gucaracara no kutagira icyerekezo iyo ajyanywe mu itorero biba bimeze nko kumesa umwenda wanduye.”

Yakomeje atangaza ko kuba abarimu baragiye mu Itorero bizatuma nta n’umwe ushobora kuzongera kugaragarwaho ingeso mbi zirimo gukopeza ibizami n’ibindi.

Umuyobozi w’Akarere ka Nyarugenge, Kayisime Nzaramba we yavuze ko iri Torero rizazana impinduka mu mashuri ndetse rinazamure ireme ry’uburezi.

Yagize ati “Ibi biradufasha kuzamura ireme ry’uburezi cyane ko hari abarimu batabishyiragamo imbaraga, bizatuma baba ku isonga mu kubaka igihugu cyane ko umurezi ari we shingiro ry’ahazaza hacyo.”

Umwarimu witwa Mukahirwa Florence na we yabwiye IGIHE ko amasomo bahawe azabafasha kuzamura imitsindire y’abanyeshuri bigisha.

Yagize ati “Kubera ibintu bitandukanye twagiye twigishwa birimo gukunda igihugu n’ibindi, mfite icyizere cy’uko bizadufasha kuzamura imitsindire y’abanyeshuri twigisha bitandukanye no mu myaka ishize.”

Abarimu bo mu mashuri abanza n’ayisumbuye ya Leta n’ayigenga bagera ku 1098 bo mu Karere ka Nyarugenge ni bo bitabiriye iri Torero mu gihe mu gihugu hose bagera ku bihumbi 73.288.

Biteganyijwe ko iri Torero rizarangira ku wa Kane tariki 12 Ukuboza 2017.

Umunyamabanga wa Leta ushinzwe amashuri abanza n'ayisumbuye, Isaac Munyakazi
Umuyobozi w'Akarere ka Nyarugenge, Kayisime Nzaramba
Umunyamabanga Nshingwabikorwa w'Umurenge wa Nyarugenge, Havuguziga Charles
Umwarimu witwa Mukahirwa Florence yabwiye IGIHE ko amasomo bahawe azabafasha kuzamura imitsindire y’abanyeshuri bigisha
Bamwe mu batoza b'abarimu
Bamwe mu barimu bitabiriye Itorero mu Karere ka Nyarugenge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE