Musanze: Abana bavuye mu mashyamba ya Congo basabwe gusigasira umutekano basanze mu gihugu

Yanditswe na N.Kubwimana Janvière
Kuya 14 Kamena 2018 saa 10:23
Yasuwe :
0 0

Abana bagera kuri 15 bitandukanyije n’imitwe y’inyeshyamba ikorera muri Repubulika Iharanira Demokarasi ya Congo, basabwe gusigasira umutekano basanze mu gihugu, ababyeyi babo bibutswa kubaba hafi bakabaremamo icyizere nyuma y’igihe bamaze mu buzima bugoye bwo mu mashyamba.

Abo bana bari mu Kigo cya Mutobo kinyuzwamo abagitahuka bavuye mu mitwe yitwaje intwaro, bagaragaza ko bari barambiwe ubuzima babagamo mu burasirazuba bwa Congo, ku buryo baje mu Rwanda batorotse.

Nubwo bakiri guhabwa amasomo mbere yo gusubizwa mu miryango, Kuri uyu wa Kabiri habaye umuhango wo guhuza abo bana n’imiryango yabo ku bamaze kuyibona nyuma y’igihe kirekire baraburanye. Mu bana 15 bahari, barindwi nibo bamaze kubona imiryango yabo.

Komiseri muri Komisiyo y’Igihugu yo gusezerera no gusubiza mu buzima busanzwe abavuye mu gisirikare, Nyamurangwa Fred, yasabye aba bana kuba urufatiro rw’umutekano basanze mu gihugu.

Yagize ati “Ntawe utavuga ko mwavuye ahantu habi namwe muri abahamya babyo, ubu muri mu gihugu kirimo umutekano. Iyo tubasaba rero ni ugukomeza kuba umusingi w’umutekano mwasanze, mukawusigasira, mukawuharanira mwirinda icyakongera kuwuhungabanya mugasubira ahabi mwavuye.”

“Dusaba n’aba babyeyi kubaba hafi bakabaremamo ikizere cyo gukunda Igihugu cyabo bakumvako nta heza nk’iwabo. Mubatoze gukunda umurimo bazabashe kwiteza imbere.”

Umwe muri abo bana wahujwe n’umuryango we, Tuyisenge Adam, n’ibyishimo byinshi bivanze n’amarira, yavuze ko yavukiye mu ishyamba muri RDC, aza kuburana n’ababyeyi be ubwo bazaga mu Rwanda we agasigara.

Yakomeje agira ati “Nabayeho mu buzima busharira, duhabwa inyigisho z’uburozi bwo kutwangisha igihugu cyacu dutozwa ibikorwa by’ubugome, mbese twabaga mu mwijima twarihebye twumva ko tutazongera kubonana n’abacu.”

“Aho twagereye mu Rwanda twasanze ari amahoro, ubu turiga twatojwe indangagaciro na kirazira z’umuco nyarwanda, none mpuye n’umuryango wanjye, ndishimye cyane nshima na Leta yacu yatubereye umubyeyi, nsaba abakiri mu mashyamba kuva mu binyoma bakaza bakirebera ukuri, iwacu ni amahoro.”

Umubyeyi witwa Mutuyimana Dativa wahujwe n’umuhungu we, yavuze ko amaze imyaka ibiri avuye muri kongo, ariko ubwo yazaga yamusizeyo yumva ko birangiye ntaho bazongera guhurira, kuko kuvayo biba bitoroshye.

Yakomeje agira ati “None ndamubonye ibyishimo birandenze, ndashima komisiyo yadusezereye neza none bakaba baduhuje n’abana bacu, Imana ibahe umugisha natwe tuzafatanya nabo kubitaho.”

Umuyobozi wungirije w’Akarere ka Musanze ushinzwe imibereho myiza y’abaturage, Uwamariya Marie Claire, yasabye aba bana kubyaza umusaruro amahirwe bafite nk’abandi Banyarwanda bose.

Yakomeje agira ati “Ubu mwakwiga, mwashora imari mu bikorwa bitandukanye bibafasha kwiteza imbere. Ayo mahirwe rero muyakoreshe natwe tuzababa hafi icyo muzadukeneraho muzatubwire tuzabafasha.”

Kuva iki kigo cyatangira mu 2001 kimaze kwakira abana 984, muri bo 189 bamaze gusubizwa mu miryango yabo, abandi bakomeje kuyishakirwa. Abadahita bayibona bafashwa na Komisiyo yo gusezerera no gusubiza mu buzima busanzwe abahoze mu gisirikare kubona uko babaho.

Byari ibyishimo ku babyeyi ubwo bongeraga guhura n'abana babo
Akanyamuneza kagaragaraga ku maso nyuma y'uko uyu musore yari abonye umuryango we, nubwo igihe cyo kuwusanga kitaragera kuko hari amasomo ari guhabwa
Ifoto y'Urwibutso y'abana, ababyeyi n'abayobozi mu muhango kubahuza n'ababyeyi babo
Komiseri Nyamurangwa yasabye aba bana gusigasira ibyiza basanze mu gihugu
Komiseri Nyamurangwa asanga aba bana bakeneye kwitabwaho n'ababyeyi, bakabafasha kwisanga mu muryango mugari w'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza