Musanze: Abasirikare n’abasivili 24 basoje amahugurwa ku kugarura ituze ahari umutekano muke

Yanditswe na Claude Bazatsinda
Kuya 14 Nyakanga 2017 saa 08:48
Yasuwe :
0 0

Amahugurwa yari ahuriyemo abasirikare, abapolisi n’abasivile bagera kuri 24 bo bihugu byo mu Karere u Rwanda ruherereyemo, yasojwe abayitabiriye bahamya ko bahakuye ubumenyi buzabafasha kugarura ituze ahari umutekano muke.

Aya mahugurwa yari amaze ibyumweru bibiri yitabiriwe n’abagera kuri 24 baturuka mu bihugu bya Kenya, Uganda n’u Rwanda rwayakiriye akaba yasojwe kuri uyu wa 14 Nyakanga 2017, mu Karere ka Musanze mu Kigo cy’Igihugu cy’Amahoro.

Umuyobozi w’iki kigo Col. Jill Rutaremara yavuze ko abitabiriye aya mahugurwa basangiye ubumenyi n’ubunararibonye n’ingabo z’u Rwanda zizobereye mu bikorwa byo kugarura amahoro mu bihugu bitandukanye.

Yagize ati “Aya mahugurwa yabaye umwanya mwiza wo gusangira ubumenyi n’ubunararibonye kuko ingabo zacu zisanzwe zibikora mu bihugu bitandukanye, byabaye n’umwanya wo kumenya uko umuntu uri mu butumwa bw’amahoro yakwitwara bijyanye n’umuco w’aho ari gukorera.”

Bamwe mu bitabiriye aya mahugurwa bemeza ko ubumenyi bahakuye buzabafasha kugarura ituze ahagaragara umutekano muke.

Major Charles Muhozi, umusirikare wayitabiriye aturutse mu Rwanda yagize ati “Twagerageje guhuriza hamwe ubumenyi butandukanye bw’uko abasivile n’abasirikare bakorana mu kugarura amahoro n’ituze aho umutekano wabaye muke.”

Nyaga Mugo waturutse muri Kenya na we yagize ati “Twabonye byinshi muri aya mahugurwa kuko mbere numvaga ibikorwa by’umutekano ari iby’abasirikare n’abapolisi ariko ubu twabonye ko bisaba ubufatanye kuri bose kandi twize n’uburyo umuntu yakwitwara mu gihe cy’umutekano muke, ibi bizadufasha ahantu hose haba hagaragaye umutekano muke.”

Aya mahugurwa yatangiye kuva tariki 3 Nyakanga yasojwe none ku wa 14 Nyakanga 2017; yaberaga mu Kigo cy’Igihugu cy’amahoro kiri i Nyakinama.

Abasoje amahugurwa hamwe n'abafatanyabikorwa mu ifoto y'urwibutso
Abasoje amahugurwa bashyikirizwa inyemezabumenyi
Umuyobozi w’Ikigo cy'Igihugu cy'Amahoro, Col. Jill Rutaremara yavuze ko abitabiriye aya mahugurwa basangiye ubumenyi n’ubunararibonye n’ingabo z’u Rwanda zizobereye mu bikorwa byo kugarura amahoro mu bihugu bitandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza