Musanze:Batatu barakekwaho kwica uwabasanze mu ishyamba rye biba ibiti

Yanditswe na Kanamugire Emmanuel
Kuya 8 Ukwakira 2016 saa 04:49
Yasuwe : XX
0

Abagabo batatu barakekwaho kwica mugenzi wabo witwa Nzirinda Mathias nyuma y’aho abasanze mu ishyamba rye bari kumwiba ibiti.

Urupfu rwa Nzirinda wari utuye mu mudugudu wa Runyura, mu kagari ka Kabeza, rwamenyekanye mu ma saa yine zo kuri uyu wa Gatandatu tariki ya 8 Ukwakira 2016, ubwo yari avuye mu misa akerekeza mu ishyamba rye riherereye mu mudugudu wa Kungo mu kagari ka Kabeza mu murenge wa Cyuve, akarere ka Musanze.

Bamwe mu baturanyi ba nyakwigendera bavuga ko ubujura bw’ibiti bukabije cyane kandi ko abavugwaho kubyiba babarizwa mu mutwe wiyise ’abanyarirenga’ bavugwaho ubugizi bwa nabi harimo n’ubwicanyi muri Musanze.

Nyirabirushya Ancille, nyirasenge wa nyakwigendera yagize ati “Nzirinda yari avuye gusenga hari uwamuhuruje ko bari kumwibira ibiti agezeyo arababona."

Biravugwa ko aba bagabo bahise bamwica mu buryo butamenyekanye kuko ngo nta gikomerere cyagaragaye ku mubiri we.Abana batashyaga inkwi hafi aho, ni bo bavuze ko abo bagabo bamwibaga ibiti babatumye kujya kuvuga ko aguye hasi kubera igicuri.

Nturanyi Sylvestre na we yagize ati “Aba bantu batwiba biyita abanyarirenga kandi baraturembeje, bariba bakanica, bibaye igihe kinini babafunga bakabafungura, twibaza niba leta ibereyeho kurinda abanyabyaha kurusha abaturage beza.”

Umunyamabanga Nshingwabikorwa w’Umurenge wa Cyuve, Manzi Jean Pierre yemeje amakuru y’urupfu rwa Nzirinda Mathias anatangaza ko muri batatu bakekwa umwe yamaze gutabwa muri yombi.

Yagize ati “Iperereza riracyakomeje uretse ko umwe mu bakekwa yamaze gutabwa muri yombi, twizera ko n’abandi bazafatwa hakagaragazwa ukuri.”

Akomeza asaba abaturage kujya batangira amakuru ku gihe kuko ngo ubu bujura bw’ibiti bwigeze kuhagaragara bakaburwanya ariko bukaba bwari bwongeye kubura bitunguranye.

Nzirinda Mathias abaye uwa kabiri wishwe muri uyu murenge kuko no mu ijoro ryo kuwa 30 Nzeri uwitwa Nyabyenda Jean Bosco yasanzwe mu cyobo yapfuye.

Bamwe mu bari batabaye mu rugo rwa nyakwigendera

bazatsinda@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza