Musanze: Icyumba cy’urukiko cyiciwemo Abatutsi kigiye guhindurwa urwibutso rwa Jenoside

Yanditswe na Hakizimana Jean Paul
Kuya 27 Mata 2019 saa 03:54
Yasuwe :
0 0

Perezida w’Urukiko rw’Ikirenga Prof Sam Rugege, yasabye inzego zitandukanye gufatanya hagashyingurwa mu cyubahiro imibiri irenga 200 y’abatutsi biciwe mu cyahoze ari urukiko rw’ubujurire rwa Ruhengeri.

Yanasabye ko CNLG, Akarere ka Musanze ndetse n’ubucamanza gukorana hagashakwa ahimurirwa icyumba cy’iburanisha cy’urwo rukiko noneho icyari gisanzwe kikagirwa urwibutso rwa Jenoside kuko cyiciwemo abatutsi bari bahahungiye.

Ibi yabivuze ubwo yafunguraga ku mugaragaro umwiherero w’abayobozi bakuru b’inzego zose zibumbiye mu rwego rw’ubutabera.

Mu gusoza uyu mwiherero hafatiwemo imyanzuro 16 irimo n’uwa 11 uvuga ko inzirakarengane z’abatutsi biciwe mu cyahoze ari Urukiko rw’Ubujurire rwa Ruhengeri mu 1994 bashyingurwa neza nk’uko bikwiye hanyuma CNLG, Minisiteri y’Ubutabera Akarere ka Musanze ndetse n’Urukiko rukuru bishobotse bagashaka aho bimurira icyo cyumba cy’iburanisha hanyuma icyo ngicyo kikaba urwibutso.

Umunyamabanga Mukuru wa Komisiyo yo kurwaya Jenoside CNLG Dr Bizimana Jean Damascene, yavuze ko ubusanzwe kuri uru rukiko hari hasanzwe ikimenyetso kigaragaza ko hiciwe abatutsi mu gihe cya Jenoside ariko ko bitari bikwiye ko icyumba kiciwemo abantu gikomeza gukoreshwa.

Ati “Ubundi hariya hantu hafite amateka akomeye cyane kuko niyo nzu y’iburanishwa yiciwemo abantu, nyamara barahazanywe n’ubutegetsi bwariho icyo gihe bubabeshya ko bugiye kubatabara. Dukwiye kureba uburyo ayo mateka atazimangatana.”

Dr. Bizimana akomeza avuga ko kuba iki cyumba cyakomezaga kuburanishirizwagamo abantu nkaho nta cyabaye bitari byiza.

Mu bayobozi bagize uruhare muri ubu bwicanyi harimo uwari Perefe Zigiranyirazo ndetse na Charles Nzabagerageza.

Ubwo hibukwagwa abatutsi biciwe muri uru rukiko, abaharokokeye bavuze ko nyuma y’ibihe bikomeye bahahuriye nabyo, bidakwiye ko ikomeza kwitwa Ingoro y΄Ubutabera.

Niyoyita Veronique yagize ati "Niba ahitwa ko hatangirwaga ubutabera harabereye amahano yahitanye abacu ubwo ni ubutabera? Ahubwo urwego rw’ubutabera rwareba ahandi rwimurira ruriya rukiko, ubundi ho hagashyirwa urwibutso tukahashyingura abacu n΄ibindi bimenyetso bisigasira amateka yihariye yahabereye, bitabaye ibyo ibyahabaye byakwibagirana burundu."

Umuhoza Brigitte na we ati "Ndi umwe mu barokokeye hariya hantu, hiciwemo Abatutsi benshi bari bahungishirijwemo bijejwe ko babajyana muri Zaire, bicishwa amabuye, ubuhiri, imbunda n΄ibindi. Nagize amahirwe nsohokamo interahamwe zitaraza, ariko haguyemo mama n’abandi bavandimwe bishwe rubi.”

“Njye numva bibaye ngombwa ko mpatangira ikirego urwo rubanza sinabasha kuruburana, kuko n’iyo mparebye gusa nibuka amahano yahabereye umutima ukandya, ntihabereye gutangirwa ubutabera rwose. Bibaye byiza bakwimura ruriya rukiko rukajyanwa ahandi maze hano hakubakwa Urwibutso hakaruhukira abacu bari mu Rwibutso rwa Muhoza kugeza ubu badashyinguye mu cyubahiro."

Bivugwa ko muri uru rukiko hiciwe abatutsi barenga 200 gusa kuri ubu hamaze kumenyekana amazina 88 ari nayo yanditswe ku rukiko rukuru Urugereko rwa Musanze.

Imbere y'urwahoze ari Urukiko rw'Ubujurire rwa Ruhengeri hubatswe urukuta ruriho amazina y'abazize Jenoside yakorewe abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza