Mushikiwabo atorewe kuyobora OIF, we n’abamubanjirije twabibukiraho iki?

Yanditswe na David Eugène Marshall, Rabbi Malo Umucunguzi
Kuya 20 Kanama 2018 saa 09:38
Yasuwe :
1 0

Minisitiri w’Ububanyi n’Amahanga w’u Rwanda, Louise Mushikiwabo, akomeje kwiyegereza ibihugu bitandukanye ngo bimushyigikire mu matora y’Umunyamabanga Mukuru w’Umuryango w’Ibihugu bikoresha Ururimi rw’Igifaransa, OIF.

Amatora ateganyijwe mu Nteko Rusange yawo izabera muri Armenia ku wa 11-12 Ukwakira 2018.

Ukurikije imibare n’uburyo ibihugu bya Afurika byiyemeje kujya inyuma ya Mushikiwabo, bikomeye ku isezerano byatanze, nta kabuza ko yatahukana intsinzi.

Ibihugu by’uyu mugabane biri muri OIF ni 29 mu gihe igizwe na 54, bivuze ko byaba birenga kimwe cya kabiri cy’ibihugu bifitemo ijambo.

Wongeyeho u Bufaransa bwagaragaje ko bushyigikiye Mushikiwabo, biraganisha ku ntsinzi yizewe ko yazahigika Umunya-Canada Michaëlle Jean umaze imyaka ine ayobora OIF, akamusimbura mu biro biherereye i Paris kuri Avenue Bosquet.

Izi nshingano nshya zaba zicumbitse urugendo rw’imyaka icumi rwa Mushikiwabo w’imyaka 57 muri Guverinoma y’u Rwanda.

Yinjiye muri Guverinoma muri Werurwe 2008 ubwo yagirwaga Minisitiri w’Itangazamakuru, mu Ukuboza 2009 akagirwa Minisitiri w’Ububanyi n’Amahanga kugeza magingo aya.

IGIHE yasubije amaso inyuma ku bihe bikomeye byaranze dipolomasi y’u Rwanda mu myaka 24 itambutse, harebwa ku baminisitiri bagiye bayishingwa n’ibyo basize inyuma yabo.

Twahereye ubwo guverinoma yiyitaga iy’abatabazi yari imaze gusimbuzwa iy’Ubumwe bw’Abanyarwanda ku wa 19 Nyakanga 1994.

1994: Jean Marie Vianney Ndagijimana

Jean Marie Vianney Ndagijimana yabaye Minisitiri w’Ububanyi n’Amahanga wa Mbere wa Guverinoma y’inzibacyuho, amara amezi ane kuri uwo mwanya (Nyakanga-Ukwakira) mbere yo kwegura agahita yerekeza iy’ubuhungiro.

Nyuma ya Jenoside igihugu cyari cyarasenyutse ku buryo bamwe bakirebaga nk’ikidafite aho kigana; uretse kubura miliyoni y’abaturage, igipimo cy’ubukungu cyasubiye hasi kurusha ibindi bihe.

Perezida Kagame yigeze kuvuga ko hagiye habaho uburyo bwo gukusanya amafaranga yo kwifashishwa mu rugamba rwo kubohora igihugu, aza no gukoreshwa mu gutuma abayobozi bacyo babasha kuzuza inshingano bari bahawe.

Yatanze urugero kuri Faustin Twagiramungu wabaye Minisitiri w’Intebe na Jean Marie Vianney Ndagijimana wabaye Minisitiri w’Ububanyi n’Amahanga akaza kuva mu Rwanda atorokanye akayabo.

Ati “Umunsi wa mbere yagiye, yatorokanye ibihumbi 200 by’amadolari yari ahawe kugira ngo ayifashishe mu gufungura za Ambasade. Uwo mugabo yaragiye arayagumana sinzi icyo yamugejejeho gusa nta kinini mbona.”

1994–1999: Anastase Gasana

Dr Gasana yari umwarimu muri Kaminuza, mbere ya Jenoside yari yarigeze kuba Minisitiri w’Ububanyi n’Amahanga mu 1993, anagira uruhare mu masezerano ya Arusha.

Mu mpera za 1994 yongeye kugirwa Minisitiri w’Ububanyi n’Amahanga nyuma ya Ndagijimana.

Muri icyo gihe ishusho y’u Rwanda yari ikingirijwe n’icyasha cya Jenoside n’intambara zarubayemo, hakaba n’amahanga yabonaga ko kongera kurema ubutegetsi bufite ireme mu Rwanda byari nko kwigerezaho.

Byari ibihe bitoroshye ku badipolomate b’u Rwanda, biba ibihe itangazamakuru ryaba iryo mu karere cyangwa mpuzamahanga ryari maso cyane ku bibera mu Rwanda.

Bamwe bashakaga kugaragaza ukuri kuri Jenoside yakorewe abatutsi abandi bagambiriye guhisha ukuri, ngo abari bafite inyungu mu guhakana no gupfobya Jenoside babone rugari.

Nka Radiyo Agatashya yavugiraga mu nkambi z’impunzi muri Zaire n’abantu nka Alison Des Forges wayoboraga Human Right Watch mu Karere k’Ibiyaga Bigari icyo gihe barahagurutse baharanira kwamamaza ko mu Rwanda habaye Jenoside ebyiri.

Byari akazi gakomeye muri dipolomasi ngo ijwi rivuga ukuri ridatsikamirwa n’irivuga ikinyoma.

Ku bwa Minisitiri Gasana wahereye mu Ugushyingo 1994 akageza muri Gashyantare 1999, ni nabwo u Rwanda rwanyuraga mu nzitane yo gucyura impunzi zisaga miliyoni eshatu zari mu mashyamba ya Zaire.

Ibihe bikomeye muri dipolomasi y’u Rwanda byanakomeje mu ntambara ya kabiri ya Congo.

1999-2008: Amri Sued, Dr Iyamuremye, André Bumaya na Muligande

Dr Gasana yasimbuwe na Amri Sued Ismail gusa nta byinshi byagiye bigarukwaho byavuzwe cyane uretse kuba uyu yarakuwe kuri uwo mwanya amazeho igihe gito mu 1999 ku buyobozi bwa Pasiteri Bizimungu.

Uyu wari warabaye Ambasaderi mu Misiri yasimbujwe Agustin Iyamuremye wari Minisitiri w’Itangazamakuru.

Mu 2000 Iyamuremye yasimbujwe André Bumaya warangaje imbere dipolomasi y’u Rwanda kugeza mu Ugushyingo 2002 ubwo Perezida Paul Kagame yakoraga impinduka, akamusimbuza Dr Charles Murigande.

Abo bose bicaye muri iyo ntebe muri cya gihe n’ubundi cy’intambara ya kabiri ya Congo yabaye hagati ya 1998 na 2003, aho u Rwanda rwahashyaga imitwe yitwaje intwaro yakoreraga muri icyo gihugu.

Dr Muligande mu gihe cye itangazamakuru ryari ryibanze cyane ku kubaza niba u Rwanda rwarohereje ingabo muri Repubulika Iharanira Demokarasi ya Congo.

Dr Murigande yaje gusimburwa na Rosemary Museminari ku wa 8 Werurwe 2008 nawe wamaze igihe gito kuri uyu mwanya.

2008-2009: Rosemary Museminari

Ku bwa Museminari nibwo u Rwanda rwinjiye mu Muryango uhuza ibihugu bikoresha ururimi rw’Icyongereza, Commonwealth, hari mu Ukwakira 2008.

Uku kwinjira muri uwo muryango bisa n’ibyakanguye u Bufaransa bwahoraga bwibwira ko u Rwanda rujenjetse.

Museminari yavuze ko inyungu u Rwanda rwiteze muri uyu muryango ari “gusangizanya ubunararibonye bwacu, kandi tuzahahirana bikwiye, bizatuma twungukira mu gukorana ubucuruzi n’ibihugu bigize uyu muryango, abaturage bacu kandi bazabasha kuzamura imibereho myiza.”

Museminari yaje gusimbuzwa Louise Mushikiwabo ku wa 04 Ukuboza 2009, wari Minisitiri w’Itangazamakuru guhera mu 2008.

2009-: Louise Mushikiwabo

Ibihe by’inzitane u Rwanda rwaciyemo muri dipolomasi yari irangajwe imbere na Minisitiri Mushikiwabo, rwabisohotsemo gitwari bituma uyu mugore yemerwa n’abatari bake.

Uretse ibibazo by’urudaca yahoraga abazwa ku ntambara yo muri Congo, itabwa muri yombi rya Gen. Laurent Nkunda ku butaka bw’u Rwanda, Mushikiwabo yinjiye muri iyi Minisiteri u Rwanda rumaze imyaka hafi ine ruhagaritse umubano n’u Bufaransa.

Ni nyuma y’igitotsi cyavutse ku nyandiko zo guta muri yombi abayobozi bakomeye b’u Rwanda umucamanza w’Umufaransa Jean Louis Bourguière yari yashyizeho.

Umwaka wa 2008 na 2009 watangiranye agacu ko kuzahura umubano n’u Bufaransa, ubwo mu mpera za 2008, Umunyamabanga muri Perezidansi y’u Bufaransa, Claude Guéant yagiriraga uruzinduko mu Rwanda.

Muri Mutarama 2009, akurikirwa n’uwari Minisitiri w’Ububanyi n’Amahanga Bernard Kouchner.

Muri ibyo byose ariko Dipolomasi y’u Rwanda yiyerekanaga neza nk’aho atari uguhomera iyonkeje, kugeza ubwo ku wa 25 Gashyantare 2010 Perezida w’u Bufaransa, Nicolas Sarkozy yasuraga u Rwanda.

Bidatinze ku wa 12 Nzeri 2011 Perezida Paul Kagame yakirwa na mugenzi we w’Ubufaransa muri Elysée ku nshuro ya mbere.

Uburasirazuba bwa Congo bwabereye dipolomasi y’u Rwanda ikorosi ritoroshye!

Harimo n’igihe hari intambara hagati y’umutwe wa M23 na Guverinoma ya Congo n’ibindi bihe byinshi bikomeye, bikagenda byitirirwa u Rwanda nyamara rukabyamaganira kure.

Ku itariki ya 07 Ukuboza 2012 Mushikiwabo yasabwe n’Inteko Ishinga amategeko imitwe yombi ibisobanuro by’icyo u Rwanda rwatekerezaga ku bibera mu burasirazuba bwa RDC, ndetse no ku nkunga amahanga amwe n’amwe yari amaze iminsi aruhagarikiye.

Yagize ati “Twasanze imirwano ihari itakongerwamo n’indi mirwano, ahubwo dushakisha uko twarinda neza imipaka yacu tukiyama abo bagizi ba nabi […] ariko ibyo bidahagaze u Rwanda rwakwirwanaho”.

Mu bya vuba, mu Ugushyingo 2014 Minisitiri Mushikiwabo yagaragaje akababaro yatewe n’imvugo isa n’iy’umubyeyi ubwira abana be yakoreshejwe na Perezida François Hollande wayoboraga u Bufaransa, mu nama y’abakuru b’ibihugu, aho kubatega amatwi akabategeka.

Hari mu nama ya OIF yaberaga i Dakar muri Senegal, yemerejwemo Michaëlle Jean nk’Umunyamabanga Mukuru w’uyu muryango, ari nawe yifuza gusimbura.

Mu kiganiro yagiranye na France 24 yagize ati “Ese ubundi ni nde ufatira Abanyafurika ibyemezo by’ahazaza habo muri politiki? Ntabwo Paris ari yo ifatira Abanyafurika ibyemezo, ibyo birumvikana.”

“Ibi bivuze ko Perezida w’u Bufaransa ashobora gutanga igitekerezo cye, yewe yanatanga inama, natwe kandi bikaba bityo, ariko kuvuga ngo ‘Naje i Dakar kubwira Abanyafurika ko…’ si byo na gato, turi mu 2014”.

Muri iyi myaka yose imibanire y’u Rwanda n’amahanga yagiye inozwa ku buryo ari ari igihugu gihagaze neza, cyubashywe kuri uyu mugabane ukurikije ibikorwa bikomeye cyakira cyangwa inshingano Abanyarwanda bahabwa.

Rwakomeje kwagura imibanire n’ibindi bihugu aho nyuma y’imyaka 24, Ambasade z’ibihugu cyangwa imiryango y’ibihugu bifite icyicaro i Kigali bigera kuri 30; ibihagarariwe ku rwego rwa Consular ni icyenda mu gihe ibifite ababihagarariye bakorera mu bindi bihugu ari 39.

U Rwanda rukomeje kwagura umubano n’ibindi bihugu kuko ubu rufite ambasade 33 ziruhagarariye mu bihugu 147 n’imiryango mpuzamahanga. Hari n’izindi ntumwa 37 zihagarariye inyungu z’u Rwanda mu bihugu 17.

Uhereye hejuru ibumoso ugana iburyo: Jean Marie Ndagijimana, Dr Anastase Gasana, Amri Sued Isamael , Dr Augustin Iyamuremye, Andre Bumaya, Dr Charles Murigande, Rosemary Museminali na Louise Mushikiwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza