Mushikiwabo yatangiye inshingano ze nk’Umunyamabanga Mukuru wa OIF

Yanditswe na Mukaneza M.Ange
Kuya 3 Mutarama 2019 saa 04:16
Yasuwe :
0 0

Nyuma yo gutorerwa kuba Umunyamabanga Mukuru w’Umuryango w’Ibihugu bivuga Igifaransa, OIF, Louise Mushikiwabo yatangiye inshingano ze.

Ku wa 12 Ukwakira 2018, nibwo Mushikiwabo wari usanzwe ari Minisitiri w’Ububanyi n’Amahanga w’u Rwanda, yatorewe kuba Umunyamabanga Mukuru wa OIF.

Abakuru b’ibihugu na za Guverinoma bagera kuri 40 nibo bemeje Louise Mushikiwabo nk’Umunyamabanga Mukuru w’Umuryango w’Ibihugu bikoresha Igifaransa mu myaka ine iri imbere. Amatora yabereye mu Nteko Rusange yawo ya 17 yaberaga i Yerevan, muri Armenia.

Nk’uko bigaragara ku rubuga rwa Twitter rwa OIF, mu gitondo cyo kuri uyu wa Kane nibwo habaye ihererekanyabubasha hagati y’Umunya-Canada Michaëlle Jean, wari umaze imyaka ine ku buyobozi na Mushikiwabo wamusimbuye, igikorwa cyabereye ku cyicaro cy’uyu muryango mu mujyi wa Paris mu Bufaransa.

Atangiye inshingano ze nshya mu gihe mu mpera za 2018 Perezida Paul Kagame yagize Nyaruhirira Désiré, Ambasaderi; uyu akaba ari nawe Mushikiwabo yahisemo ngo azamubere umujyanama.

Nyaruhirira yari asanzwe ari Umujyanama wa Minisitiri y’Ububanyi n’Amahanga w’u Rwanda, mbere yaho yabaye Umujyanama muri Ambasade y’u Rwanda i Burundi kugeza mu 2015.

Ni umwe mu bantu babaye hafi Mushikiwabo by’umwihariko mu ngendo yazengurutsemo amahanga ashaka abamushyigikira ngo yemezwe n’abakuru b’ibihugu nk’Umunyamabanga Mukuru mushya wa OIF.

Jeune Afrique ivuga ko kandi Mushikiwabo yamaze guhitamo ko Oria Kije Vande Weghe nawe wakoraga muri Minisiteri y’Ububanyi n’Amahanga y’u Rwanda, kugira ngo azamubere Umuvugizi, uyu nawe yamubaye hafi mu gihe yiyamamarizaga kuyobora OIF.

Bivugwa ko u Bufaransa bwifuza umwanya w’Umuyobozi w’ibiro bikuru, mu gihe undi mwanya ukomeye wifuzwa na Canada ndetse Perezida w’u Bufaransa Emmanuel Macron, yamaze kubyemeranyaho na Minisitiri w’Intebe wa Canada, Justin Trudeau.

Umuryango OIF Mushikiwabo yatangiye kuyobora umaze imyaka 48 ushingiwe i Niamey muri Niger. Watangijwe n’ibihugu 21 byiganjemo ibyahoze bikolonijwe n’u Bufaransa.

Kuri ubu uyu muryango ugizwe n’ibihugu 84 birimo ibinyamuryango byuzuye 54, ibihugu bine byiyunze n’ibihugu 26 by’indorerezi.

Mushikiwabo ni Umuyobozi wa kane uyoboye OIF nyuma y’Umunyamisiri Boutros Boutros-Ghali (1997-2002), Abdou Diouf wo muri Sénégal (2003-2014) na Michaëlle Jean (2014-2018).

Inshingano za Mushikiwabo nk’Umunyamabanga Mukuru wa OIF

Umunyamabanga Mukuru wa OIF, ni we uyihagararira mu ruhando mpuzamahanga mu bijyanye n’ibikorwa bya Politiki.

Ashinzwe gutondekanya ibitekerezo by’ibanze mu bikorwa bihuriweho n’ibihugu bya OIF. Ibi bijyana n’isuzuma rireba niba imikoranire ihamye no kugenzura ko gahunda n’imirimo biteganywa biri mu mahoro.

Ayobora inzego eshatu zirimo Inteko za OIF, Inama ngarukamwaka z’Abaminisitiri b’Ububanyi n’Amahanga n’Ihuriro rihoraho rigizwe n’Abambasaderi, rinasuzumirwamo ishyirwa mu bikorwa ry’imyanzuro n’ikoreshwa ry’ingengo y’imari.

Mushikiwabo azanayobora Ikigo cyita ku muco, siyansi, ikoranabuhanga, ubukungu na gahunda z’imikoranire yemejwe.

Iki kigo gifite uruhare mu iterambere ry’Igifaransa (kivugwa n’abantu miliyoni 300 ku Isi), izindi ndimi n’umuco w’ibihugu by’ibinyamuryango.

Gifite icyicaro i Paris n’amashami muri Gabon, Togo na Vietnam.

Mushikiwabo w’imyaka 57 ni intyoza mu ndimi nyinshi zirimo Ikinyarwanda, Igifaransa n’Icyongereza avuga adategwa.

Mu nshingano ze harimo guteza imbere Igifaransa, demokarasi, uburenganzira bwa muntu, ibiganiro bishingiye ku muco, uburezi, umuco w’ubucuti n’ibindi.

Ni we ugena uko amafaranga agabanywa akagaragaza nuko azakoreshwamo.

Hagati ya 2010-2013, ingengo y’imari y’umwaka yageze kuri miliyoni 85 z’amayero, aho 75% yakoreshejwe muri gahunda za OIF zirimo kuzamura Igifaransa, gusangizanya umuco, demokarasi, uburezi n’urubyiruko.

Inama rusange ya OIF ya mbere Mushikiwabo azayobora izabera muri Tunisia mu 2020. Manda ya OIF imara imyaka ine ishobora kongerwa.

Kuri uyu wa Kane Michaëlle Jean yahererekanyije ububasha na Louise Mushikiwabo wamusimbuye
Mushikiwabo agiye kuyobora OIF muri manda y'imyaka ine

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza