NCC yiteze ko abana baterwa inda bazagabanuka kubera amakinamico y’Umurage

Yanditswe na Tombola Felicie
Kuya 14 Ugushyingo 2017 saa 11:46
Yasuwe :
0 0

Ubushakashatsi bugaragaza ko imwe mu mpamvu zituma abangavu batwara inda zirimo ubumenyi buke ku buzima bw’imyororokere bityo bikorohera ubashuka kuko aba azi neza ko badashobora kumuhakanya.

Imibare y’abana baratageza ku myaka 18 baterwa inda usanga iteye inkenke hirya no hino mu gihugu. Urugero rwa vuba ni aho mu Karere ka Rusizi hagaragajwe ko abana 2138 batewe inda mu gihe cy’imyaka itanu ishize kandi nabwoabo akaba ari abamenyekanye kuko babyariye kwa muganga.

Imibare ya Minisiteri y’Uburinganire n’Iterambere ry’Umuryango (Migeprof), yo igaragaza ko mu 2016, abana b’abakobwa bari hagati y’imyaka 16-19 bagera ku 17500 batewe inda zitateguwe ndetse binabagiraho ingaruka zitandukanye zirimo no kuva mu ishuri.

Komisiyo y’Igihugu y’Abana (NCC) itangaza ko mu mezi atanu ashize yagiranye ubufatanye n’Ikigo Umurange Communication for Development (UMC) gitambutsa ubutumwa mu ikinamico y’ureherekane kugira ngo kibongerere imbaraga mu bukangurambaga basanzwe bakora mu kurengera abana.

Umunyamabaganga Nshingwabikorwa wa NCC, Dr Uwera KanyamanzaClaudine, yatangarije IGIHE ko ubufatanye na UMC burimo gutuma amakuru asakara hose kandi abantu bakabyitabira, bikazagabanya abaterwa inda bashutswe.

Yagize ati “Aho abakinnyi b’Ikinamico Umurage bekereza mu turere gutambutsa ubutumwa ubona ko byitabirwa n’abantu b’ingeri zose. Kuba Ikinamico Umurage yigisha ubuzima bw’imyororokere biradufasha gutanga amakuru, haba ku rubyiruko ubwarwo ndetse n’abakuru. Tubona ko bizadufasha cyane guhangana n’ikibazo cy’inda ziterwa abangavu kuko ubushakashatsi bwagaragaje ko imwe mu mpamvu zituma abangavu batwara inda ari ubumenyi buke ku buzima bw’imyororokere.”

Avuga kandi ko igihe abakinnyi b’Ikinamico Umurage bagiye mu turere hirya no hino gukina banajyana n’umukozi wa NCC, akahatangira ubutumwa bushimangira ibyakinwe mu ikinamico.

Si ibijyanye n’ubuzima bw’imyororokere gusa, ikinamico ‘Umurage’ yibanda no ku zindi nkingi zifite aho zihuriye na NCC .

Dr Kanyamanza ati “ Iyi kinamico rero inatambutsa ubutumwa bwigisha guharanira u burenganzira bw’abana, kubarinda imirire mibi, kandi iyo abantu babona amakuru menshi kuri izi ngingo biradufasha cyane kuko bibongerera ubumenyi, butuma bahindura imyumvire mu kubungabunga uburenganzira bw’umwana.”

Mu ikinamico ‘Umurage’abakinnyi bagaragaza amanyanga, ubucakura n’ibindi byose abashaka guhohotera abana bakoresha ngo babahende ubwenge babashe kubasambanya, kubagurisha cyangwa kubashora mu ngeso mbi.

Ababashije gukurikira iyi kinamico, urwo rujijo ku buryo ku buryo ntawabagusha mu mutego.

Uretse kumanuka bakegera abaturage, ikinamico ’Umurage’ inatambuka ku maradiyo umunani, ariyo Radio Rwanda, Isango Star, City Radio, Radio Salus, Isangano, Radio Izuba, Radio Ishingiro na Radio 10, ikazamara ibyumweru 52 kugira ngo ubutumwa bugere kure.

Abakinnyi b'Umurage baramanuka bakegera abaturage hirya no hino mu turere
Umunyamabanga Nshingwabikorwa wa Komisiyo y'Iihugu y'Abana, Dr Claudine Uwera Kanyamanza
UMC ikoresha ibiganiro mpaka no mu mashuri ku buryo abanyeshuri bunguka ubumenyi ku ngingo zitandukanye zikinwa mu ikinamico "Umurage"
NCC yiteze ko urubyiruko ruzagira amakuru ahagije ku buzima bw'imyororokere binyuze mu makinamico

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza