Ndayisaba yashimangiye ko bitakoroha ko amacakubiri ashira bidahereye mu muryango

Yanditswe na Rabbi Malo Umucunguzi
Kuya 25 Gicurasi 2018 saa 11:53
Yasuwe :
0 0

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, Fidèle Ndayisaba, yavuze ko umuryango ukwiye kuba igicumbi cy’ubumwe n’ubwiyunge wo ukwiye no kuba umusemburo wo gukemura ibindi bibazo byose biwushingiyeho.

Yabigarutseho mu biganiro byabaye kuri uyu wa Kane, byateguwe mu mushinga ugamije komora imiryango no guteza imbere imibanire myiza y’Abanyarwanda (Healing our Community Promoting Social Cohesion in Rwanda).

Ndayisaba yavuze ko iyo havuzwe ubumwe n’ubwiyunge hatekerezwa ku macakubiri u Rwanda rwanyuzemo yagejeje ku rwango rw’indengakamere rwabyaye Jenoside yakorewe abatutsi n’izindi ngaruka bidasigana.

Ibyo ngo bituma kugira ngo u Rwanda rugere ku bwiyunge butajegajega bisaba kubanza kugira ubumwe n’ubwiyunge mu muryango, cyane ko nyuma ya jenoside yabaye mu myaka 24 ishize, ubu n’abari abana batangiye kwisuganya bubaka imiryango yabo.

Yakomeje agira ati “Kugira ngo tuzagire igihugu koko cyunze ubumwe ni uko tugira imiryango yunze ubumwe, umuryango ukaba igicumbi cy’ubumwe n’ubwiyunge.”

“Mu muryango tukarinda abana, natwe ubwacu tukirinda, tukirinda ibiganiro [bibi] kuko amacakubiri iyo ajya agutera yinjirira mu mvugo, mu biganiro, tukirinda amacakubiri mu miryango yacu, ariko cyane cyane tukarinda abatoya amacakubiri, tukarenzaho tukabatoza kuyirinda.”

Yavuze ko kubaka ubushobozi bw’abato bizatuma nibanahurira n’amacakubiri ahandi bazabasha kuyirinda, “bakamenya ko amacakubiri yica, bakamenya ko ivangura ryica,” ariko izo mbaraga zose bazikomoye mu muryango.

Yashimangiye ko kugira imiryango ikomeye kandi yunze ubumwe bizafasha mu gukemura ibindi bibazo byugarije umuryango, kuko usanga hari abasenya ingo zabo mu buryo bworoshye nyamara bikabagiraho ingaruka zigera no ku babakomokaho.

Umuyobozi uhagarariye USAID yateye inkunga uyu mushinga, yavuze ko hari intambwe imaze guterwa mu bumwe n’ubwiyunge ndetse “bwarushaho gushinga imizi Abanyarwanda bongerewe ubushobozi mu komora ibikomere n’imibanire myiza.”

Ibyo ngo byanyuzwa mu biganiro bitandukanye, isanamitima n’ibikorwa bitandukanye nk’ibigaragara muri uyu mushinga w’imyaka itatu, ubu umaze hafi imyaka ibiri.

Mujawamariya Yozafina wo mu Karere ka Gakenke, Umurenge wa Rushahi mu Kagali ka Kageyo, avuga ko uyu mushinga umaze kumufasha ku buryo bukomeye, ku buryo abo yagiye ahura nabo bamufashije cyane, akaba asanga ari ‘abadogiteri’ (Docteurs).

Yitanzeho urugero rw’uburyo nyuma y’ibiganiro bahabwaga, baje gukora amatsinda y’abakoze Jenoside n’ayayirokotse, ariko we ngo yari afite urugendo rurerure kuko uwamukoreye jenoside ntabwo bari kumwe mu itsinda.

Yakomeje agira ati “Ubwo nageraga mu rugo imuhira, naje kuryama nijoro ntekereza ku magambo bampuguye, ntekereza nanjye ubwanjye ibyo ngiye kwigisha abandi, nsanga njyewe ubwanjye umuti ngiye guhagurukana iwanjye, nanjye ngomba kubanza kuwunywa.”

“Narahagurutse njya gusaba imbabazi uwanyiciye kandi we yari yaransabye imbabzi njyewe narazimwinye, naranze kuzimuha. Ndangije kumusaba imbabazi noneho ndagaruka ninjira mu murimo.”

Icyo gihe avuga ko yabwiye bagenzi be ikibazo cyari kimuriho, ku buryo yahise yumva aruhutse bityo nawe atangira kubohora abandi.

Uyu mushinga ugamije kwimakaza ubwiyunge ukorera mu turere umunani twa Nyamasheke, Gisagara, Rubavu, Gakenke, Gicumbi, Kirehe, Karongi na Bugesera, ndetse icyifuzo ni uko wagera no mu tundi turere.

Ushyirwa mu bikorwa n’imiryango irimo Karuna Center for Peace Building, Ikigo cy’Ubushakashatsi bugamije amahoro (IRDP), Healing and Rebuilding Our Communities (HROC) na Aegis Trust.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza