Kwamamaza

Rubavu: Abagera kuri 70 % baracyakoresha agatadowa

Yanditswe kuya 17-10-2016 saa 22:09' na Mukwaya Olivier


Abaturage bangana na 70 % (abarenga ibihumbi 282 563) by’abatuye Akarere ka Rubavu, ntibagerwaho n’amashanyarazi, ari nayo mpamvu benshi mu babarizwa mu bice by’icyaro bagikoresha agatadowa.

Ibarura ryakozwe muri 2014, ryagaragaje ko aka karere gatuwe n’abaturage 403 662, muri bo 30% gusa nibo bakoresha amashanyarazi, na ho abasigaye bangana na 70% baracyahangayikishijwe no kwigobotora agatadowa.

Surwumwe Jérôme, utuye mu Murenge wa Busasamana yatangarije IGIHE ko aho atuye bataragerwaho n’umuriro w’amashanyarazi ndetse bibadindiza mu iterambere ryabo.

Yagize ati “Twe aho dutuye nta cyizere ko umuriro uzahagera, kugira ngo tugere ku gasantere aho dusharija telefoni bidutwara amasaha abiri, ubwo rero kuvuga ngo tuzakora ibikorwa by’iterambere biracyari inzozi, ariko ubwo nka Mobisol batwemereye ideni turagerageza kuva mu icuraburindi.”

Ikibazo cy’agatadowa cyaba kigiye gushyirwaho ihererezo

Kuri iki Cyumweru, tariki ya 16 Ukwakira 2016, Akarere ka Rubavu kasinyanye amasezerano y’imikoranire n’ikigo gitanga ibikoresho bitanga umuriro ukomoka ku mirasire y’izuba, Mobisol, mu rwego rwo gufasha abaturage bataragerwaho n’amashanyarazi kwiteza imbere.

Umuyobozi w’Akarere ka Rubavu, Sinamenye Jérémie yatangaje ko nubwo hakiri umubare munini w’abatagerwaho n’amashanyarazi ariko hari icyizere ko bigiye gukemuka.

Yagize ati “Imibare y’abaturage tuvuga bakoresha amashyanyarazi ahanini usanga ari abo mu Murenge wa Gisenyi, wagera mu yindi mirenge ugasanga umuriro wibereye mu masantere akomeye gusa. Ubusanzwe abaturage bacana amashanyarazi barenga gato 30%, iyo tuvuze rero uyu mubare mu baturage ibihumbi 403, byerekana ko igice kinini cy’icyaro, hatari umuriro abo bantu baho bose ntibacana. Ubu turi kwiyambaza ibigo bitanga ibikoresho by’imirasire y’izuba nka Mobisol kugira ngo abaturage batuye mu midugudu ya kure na bo bagerweho n’umuriro ku nguzanyo.”

Sinamenye yishimiye ko Mobisol izabafasha mu gusakaza umuriro ukomoka ku mirasire y’izuba.

Ati “ Iyi Mobisol iradufasha kuko mu ntego zayo ni ukugera kuri buri muturage, kandi nabo biteguye kugura amashanyarazi kuko yiteguye gutanga umwenda. Buri muturage ashobora guhabwa ibikoresho akazagenda yishyura buhoro buhoro buri kwezi. Bityo abaturage bagomba kugirana amasezerano mu rwego rwo kurwanya agatadowa dore kagira n’ingaruka ku buzima bw’abantu.”

Umuyobozi ushinzwe guhuza ibigo binini n’inzego za Leta muri Mobisol, Rwagaju Louis avuga ko biyemeje gutanga inguzanyo y’ibikoresho by’imirasire y’izuba ku bantu bagifite ikibazo cy’amashyanyarazi kandi bifuza kujyana n’umuvuduko w’iterambere kugeza mu midugudu.

Ati “ Ikibazo cy’iterambere ry’umuturage kiratureba twese kuko ntiwatera imbere nta mashyanyarazi, abana ntibakwiga neza, rero tugerageza korohereza abaturage tukabaha ibikoresho ku ideni bakajya bishyura gahoro gahoro, kandi tunabibashyikiriza aho batuye haba mu Mijyi cyangwa mu byaro.”

Akarere ka Rubavu kagizwe n’imidugudu 528, utugari 80 n’imirenge 12. Umujyi wa Gisenyi uri muri itandatu yatowe yunganira umurwa Mukuru wa Kigali.

Umubare munini w'abatuye muri Rubavu baracyakoresha agatadowa
Umuyobozi w’Akarere ka Rubavu, Sinamenye Jérémie atangaza ko Mobisol igiye kuba igisubizo ku baturage batagerwaho n'amashanyarazi
Abayobozi batandukanye bafungura inzu izajya icururizwamo ibikoresho by'amashanyarazi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved