Kwamamaza

Ngoma: Hizihijwe umunsi w’Abageze mu za bukuru baremera abatishoboye

Yanditswe kuya 9-10-2016 saa 14:25' na Marie Ange Mukaneza


U Rwanda rwifatanyije n’ibindi bihugu by’isi mu kwizihiza umunsi mpuzamahanga w’abageze mu za bukuru, umunsi ku rwego rw’igihugu wizihirijwe mu Karere ka Ngoma, mu Ntara y’u Burasirazuba.

Uyu munsi wizihijwe kuri uyu wa 9 Ukwakira 2016, waranzwe n’ibikorwa bitandukanye byaranzwe no kuremera abageze mu zabukuru batishoboye bo mu Mudugudu wa Maswa, Akagari ka Rubona, mu Murenge wa Rukumbeli.

Mu bageze mu za bukuru baremewe, harimo umusaza w’imyaka 82 witwa Nyirimbabazi François wahingiwe umurima ndetse anatererwa imbuto y’ibigori.

Uyu musaza yavuze ko ubwo yumvaga ko agiye guhingirwa ibyishimo byamurenze. Yagize ati "Iki gikorwa munkoreye ndacyishimiye cyane, ni ubutabazi n’ishema."

Yakomeje avuga ko rimwe na rimwe aha abantu umurima ngo bawuhinge akabaha n’imbuto ariko basarura bakamuha bike bitewe n’uko adashoboye kwigererayo ngo arebe umusaruro wahavuye.

Hari kandi undi musaza w’imyaka 85 wubakiwe akarima k’igikoni ndetse anahabwa imfashanyo y’ibirirwa, birimo umuceri, ibishyimbo na Kawunga ndetse anahabwa matela yo kuryamaho.

Abageze mu za bukuru bo muri aka gace bishimira gahunda ya VUP ituma abatishoboye muri bo babasha kubaho neza ndetse bakanasaza neza.

Burasanzwe Callixte w’imyaka 75, akaba anahagarariye abageze mu za bukuru muri uyu murenge, yagize ati"Ibibazo duhura nabyo Leta y’ubumwe bw’abanyarwanda yagerageje kubirwanya, abatishoboye bagiye bahabwa amafaranga ya VUP, ibintu byose ubu tumeze neza, n’uzasaza muri twe azagenda avuga ati’nsize igihugu gitunganye’."

Dr Alvera Mukabaramba, Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza no kurengera abaturage, yavuze ko ibikorwa bakoreye aba bageze mu za bukuru bigamije gukomeza kubaremamo icyizere cyo kubaho no gutuma bareka kwigunga.

Yasabye abayobozi b’imidugudu kujya bamenya abageze mu za bukuru batishoboye no gushaka inkunga yo kubaremera.

Ati "Twashakaga rero ko ibi bikorwa bikomeza, bigakomeza atari ukubikora gusa kuri uyu munsi, ahubwo ni ibikorwa bihoraho cyane ariko bakamenya abari bo, abaturanyi bakabigiramo uruhare tukaza twunganira nkuko dusanzwe twunganira muri gahunda zitandukanye za Leta."

Dr Mukabaramba kandi yagarutse ku bijyanye n’uko abakwiye ubufasha batoranywa, avuga ko inzego z’ibanze zikwiye kugira uruhare mu kumenya ko byakozwe neza ndetse bakamenya niba uwahawe inkunga yamugezeho.

Umunsi mpuzamahanga w’abageze mu za bukuru watangiye kwizihizwa mu Rwanda mu 2001. Insanganyamatsiko y’uyu mwaka igira iti "Duteze imbere abageze mu zabukuru buri wese abigizemo uruhare"

Mu Rwanda, abageze mu zabukuru bagize 5% by’abaturage bose b’igihugu.

Dr Mukabaramba (hagati) n'abandi bayobozi bafatanyije n'abaturage guhinga no gutera ibigori mu murima wa Nyirimbabazi
Umwe mu bageze mu za bukuru yubakiwe akarima k'igikoni
Banafashijwe kubona ibirirwa bibunganira mu mibereho yabo
Abageze mu za bukuru banahawe ibiryamirwa mu rwego rwo kubaremera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved