Kwamamaza

Abacuruzi b’inyongeramusaruro basabye inzego guhagurukira abazitanga magendu

Yanditswe kuya 21-10-2016 saa 10:55' na Kwizera Prudence


Abacuruzi b’inyongeramusaruro bo mu Karere ka Ngororero bavuga ko baterwa igihombo gikomeye n’abandi bantu bazicuruza mu buryo bwa magendu, bityo bagasaba inzego z’ubuyobozi guhagurukira iki kibazo.

Ibi babigarutseho kuwa Kabiri, tariki ya 18 Ukwakira 2016, ubwo itsinda rya Minisiteri y’Ubuhinzi n’Ubworozi (Minagri) ryabasobanuriraga ibikubiye mu Iteka rya Minisitiri rigena amabwiriza agenga imiti n’ifumbire mvaruganda.

Bagaragaje ko bishimira impinduka zikubiye muri iryo Teka ariko bavuga ko hakwiye gufatwa ingamba zikomeye ku bacuruzi bavanga inyongeramusaruro n’ibindi bicuruzwa kandi ntibipfe kumenyekana.

Telesphore Uwiringiyimana yagize ati “Amabwiriza batubwiye ajyanye n’uko inyongeramusaruro zigomba gucuruzwa twayishimiye ni meza, ariko badufashe babishyire mu bikorwa, kandi bace bariya bacuruzi bafite amaduka asanzwe basigaye bavangamo n’inyongeramusaruro, kuko baradushyira mu gihombo”.

Donatille Mukamwiza nawe ashimangira ko igiciro abacuruzi ba magendu batangiraho ifumbire gituma batabona abayibagurira.

Yagize ati “Twebwe ducuruza inyongeramusaruro ku buryo bwemewe kandi dutanga n’imisoro, ariko bariya bazicuruza rwihishwa ntabwo basora, urumva ko bacuruza ku giciro kiri hasi y’icyacu bigatuma abakiriya bataza kutugurira. Na mbere hose byaravuzwe ariko ntabwo bicika.”

Minagri ivuga ko yahagurukiye iki kibazo

Minisiteri y’Ubuhinzi n’Ubworozi yasobanuye ko ibibazo bijyanye n’inyongeramusaruro zikoreshwa mu buhinzi byatekerejweho kandi byahawe ibisubizo bikubiye mu Iteka rya Minisitiri no 002/11.30 ryo kuwa 14/07/2016 rigena amabwiriza agenga imiti n’ifumbire mvaruganda ryatangajwe mu Igazeti ya Repubulika y’u Rwanda no 30 yo kuwa 25 Nyakanga 2016.

Ivuga ko iri Teka rishingiye ku Itegeko No 30/2012 ryo kuwa 01/08/2012 rigena imikoreshereze y’ifumbire mvaruganda n’imiti ikoreshwa mu buhinzi ryatangajwe mu Igazeti ya Repubulika y’U Rwanda No 37 ryo ku wa 10 Nzeri 2012.

Umukozi muri Minagri, Dr Emmanuel Ngomiraronka, avuga ko itsinda ry’abakozi ba Minisiteri y’Ubuhinzi n’Ubworozi rikomeje gahunda yo gukangurira abafatanyabikorwa kumenya ibikubiye muri iryo Teka, nyuma hagakurikiraho kubishyira mu bikorwa.

Ati “Ubu nibyo turi gukoraho mu turere twose uko ari 30 tw’igihugu, uyu munsi tugeze ku karere ka 13, turi kugenda dusobanura ibikubiye mu Iteka rya Minisitiri, noneho mu gihe cy’amezi atandatu tugomba gutanga impushya ku bazicuruza ndetse n’inyubako zibonekamo. Icyo gihe uzaba adafite ibyangombwa ntazaba yemerewe kuzicuruza, nazifatanwa azaba yishe itegeko azahanwa”.

Dr Ngomiraronka yasobanuye ko bagenda bagirana ibiganiro n’abafatanyabikorwa barimo abayobozi b’akarere, abahagarariye inzego z’umutekano, Abanyamabanga Nshingwabikorwa b’imirenge, abagoronome, abacuruzi b’inyongeramusaruro (ifumbire mvaruganda n’imiti bikoreshwa mu buhinzi), abahagarariye ibigo by’imari, amakoperative n’amatsinda y’abahinzi n’abandi.

Zimwe mu mpinduka zikubiye muri iryo Teka zirimo ko abacuruza inyongeramusaruro bagomba kubikora kinyamwuga, bakaba basabwa kugira ubumenyi (cyangwa bagakoresha abakozi bafite ubumenyi) kandi bakandikisha inyubako zicururizwamo cyangwa zibikwamo.

Dr Ngomiraronka ati “Uwifuza gutumiza imiti cyangwa ifumbire agomba kuba afite umukozi ufite impamyabushobozi ihanitse mu by’Ubutabire n’Ibinyabuzima cyangwa ubumenyi mu by’Ubuhinzi. Naho umucuruzi agakoresha umukozi ufite amashuri yisumbuye (A2) mu by’ubutabire, n’Ibinyabuzima cyangwa ubumenyi mu by’ubuhinzi”.

Yakomeje agira ati “Birumvikana ko Iteka rya Minisiteri rije kugira ngo rikemure bimwe mu bibazo byari bihari, nk’abacuruza imiti n’ifumbire nta bumenyi babifitemo, ababivanga n’ibindi bicuruzwa birimo ibiribwa, bikaba byabangamira ubuzima bw’abantu, ubw’inyamaswa n’ibidukikije”.

Bamwe mu bafatanyabikorwa mu buhinzi bo mu Karere ka Ngororero
Abacuruzi b'inyongeramusaruro basabye inzego guhagurukira abazicuruza mu buryo bwa magendu
Umukozi muri Minisiteri y'Ubuhinzi n'Ubworozi, Dr Emmanuel Ngomiraronka, yatangaje ko ibibazo bivugwa mu bucuruzi bw'inyongeramusaruro bigiye kubonerwa umuti

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved