Kwamamaza

Ngororero:Habiyaremye wari umucuzi, ari kubaka Gare ya miliyoni zisaga 100

Yanditswe kuya 22-10-2016 saa 09:32' na Emma-Marie Umurerwa


Yacuraga ibyuma bishaje agakuramo amapata n’ibindi bikoresho akabigurisha, ibi byatumye yiteza imbere kuri ubu ni rwiyemezamirimo ugeze ku rwego rwo kubaka ‘Gare Icyerekezo’ ihagaze miliyoni 100 z’amafaranga y’u Rwanda wenyine.

Habiyaremye Janvier w’imyaka 36 y’amavuko, uvuka mu Murenge wa Kabaya ni umushoramari ukizamuka muri uwo Murenge. Yize amashuri abanza gusa kubera ubukene bwari mu muryango avukamo.

Yaranguraga ibati ry’amafaranga 1000 akunguka ibihumbi 8000

Uyu mugabo watangiye ubucuruzi buciriritse akiri muto yaje kugera aho yinjira mu mwuga w’ubucuzi umuteza imbere kugeza ku rwego ariho uyu munsi.

Yagize ati “Natangiye ubucuruzi ndi muto, ntangiza amafaranga 1000, nkayaranguza umunyu n’isabune maze kugera ku bihumbi 100 by’amafaranga y’u Rwanda nibwo nize gucura amapata (bakingisha inzugi) mu mabati, naranguraga ibati rimwe rishaje ku mafaranga 1000 ngakuramo 8000.”

Akomeza avuga ko yagiye atera imbere buhoro buhoro kugeza ubwo mu mwaka wa 2010 yinjiye mu rwego rw’abashoramari ubwo yari amaze kwizigamira miliyoni zisaga eshanu, atangira kujya apiganira amasoko mato mu Murenge.

Akomeza agira ati “Natangiye gupiganira amasoko yo kugemurira ibiribwa ibigo by’amashuri, kugemura inkwi kuri gereza n’andi masoko aciriritse. Nari mfite na butike irimo ibicuruzwa bitandukanye, kugeza ubwo natorewe guhagararira abikorera bose bo mu Murenge wa Kabaya.”

Nubwo atagize amahirwe yo kwiga, kubana n’abantu bize biri mu byamufashije gutera imbere. Ati “Kubana n’abantu bajijutse byatumye mfunguka mu mutwe, kwitabira inama zitandukanye zirimo abayobozi nkumva impanuro baduha na byo baramfashije cyane.”

Perezida Kagame yamubereye icyitegererezo

Habiyaremye avuga ko hari umuntu afata nk’ikitegererezo mu buzima bwe kandi ko amutera imbaraga zo gukora cyane no kudacogora ku murimo.

Ati “Nagiye mu Itorero ry’Igihugu ry’abikorera mpakura impanuro, ariko kandi umuntu wambereye icyitegererezo mu buzima ni Perezida Kagame, kubera ko ahora adushikariza kureba imbere tukihangira imirimo.”

Nk’uko akomeza abivuga ngo nyuma yo kuva mu Itorero ry’abikorera, no kumva impanuro Perezida Kagame yagejeje ku bikorera bo mu Karere ka Ngororero, yagize inzozi zo kubaka Gare.

Ati “Perezida wa Repuburika yadushishikarije ko twahanga imirimo yatuma abanyarwanda benshi babona akazi, nahise ndeba ibintu bikenewe mu Murenge wacu, nsanga Gare iri mu byihutirwa. Ubu icyiciro cya mbere cyo kubaka inzu zo gukoreramo, ubwiherero, gutunganya imbere no gushyiraho uruzitiro byararangiye bitwaye miliyoni 67, Gare yose izuzura itwaye miliyoni 120.”

Iyi gare izatangira gukorerwamo mu minsi ya vuba, ayitezeho umusaruro ndetse n’iteramberere mu Murenge wa Kabaya. Mu myaka itanu iri imbere akaba ateganya kubaka inzu y’amagorofa izaba irimo amacumbi, ibigo by’imari n’amabanki, ikanakorerwamo ubucuruzi butandukanye.

Inzozi za Habiyaremye ni ugushora imari mu bikorwa bitanga akazi ku bantu benshi by’umwihariko urubyiruko. Asaba ubuyobozi kuba hafi y’abashoramari bakabashyigikira kugira ngo barusheho kugera ku ntego baba bariyemeje.

Gare Habiyaremye yubatse mu Ngororero iri hafi kuzura

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved