Kwamamaza

Ngororero: Imibereho myiza itagira amazi n’amashanyarazi bayifata nk’inzozi

Yanditswe kuya 25-10-2016 saa 11:42' na Prudence Kwizera


Kuba akarere ka Ngororero kataragira ibikorwaremezo bihagije birimo amazi meza n’amashanyarazi, biri mu bituma abagatuye batihuta mu iterambere, bityo bagasaba ubuyobozi kwita kuri iki kibazo by’umwihariko.

Bamwe mu batuye muri aka karere bavuga ko kutagira amazi meza n’amashanyarazi bibagiraho ingaruka mu mibereho yabo n’iterambere nk’uko babitangarije IGIHE.

Jean Damascène Hategekimana utuye murenge wa Kavumu ati “Mu gace ntuyemo baratubwiye ngo amashanyarazi azaza, ariko imyaka ishize ari myinshi ntayo turabona. Hari n’ikigo cy’amashuri duturanye kitagira mashanyarazi”.

Donathille Nyirabasigare utuye mu murenge wa Matyazo ati “Ubuyobozi bw’Akarere icyo twabusabye ni amazi meza n’amashanyarazi, kuko ayo tuvoma ni mabi, kandi n’amashanyarazi nta yo tugira”.

Abatuye aka karere icyo bahurizaho ni uko baramutse babonye amazi meza bagira ubuzima bwiza ntibongere no kurwara indwara ziterwa n’umwanda, na ho amashanyarazi ngo bayabyaza umusaruro bakora ibikorwa by’iterambere.

Nyirabasigare ati “Amashanyarazi iyo yaje umuntu agira icyo akora, hari abazana ibyuma bisya isombe n’imyumbati, hari abakora ibindi bikorwa ugasanga iterambere ryaje.”

Ubuyobozi bw’Akarere ka Ngororero buvuga ko kugeza ubu abaturage bafite amazi meza bari ku kigereranyo cya 62%, na ho abafite amashanyarazi bari kuri 18%.

Godfroid Ndayambaje, Umuyobozi w’aka karere, ashingiye ku mihigo biyemeje kwesa muri uyu mwaka w’imihigo wa 2016- 2017, ndetse n’icyerekezo bafite arizeza abaturage ko ibikorwaremezo bigiye kongerwa.

Yagize ati “Hari gukorwa umuyoboro uzana amazi mu isantere ya Ngororero ku buryo uzagaburira abantu benshi, turakomeza gushyiramo imbaraga uzakorwe neza abaturage babone amazi. Dufite n’umushinga uzadufasha kuzana amazi mu murenge wa Kabaya no mu murenge wa Sovu”.

Arakomeza ati “Gahunda yo kongera umubare w’abantu bafite amashanyarazi twarayitangiye, muri uku kwezi dusoje kw’imiyoborere myiza twatangiye ubukangurambaga dushishikariza abaturage kwishyira hamwe, kandi n’abakozi ba REG bagiye badufasha kwereka abaturage uburyo babona amashanyarazi badatangiye rimwe amafaranga yose, bakajya bishyura buhoro buhoro”.

Ubuyobozi bw’Akarere ka Ngororero buvuga ko bwihaye intego y’uko uyu mwaka w’imihigo wa 2016-2017 uzasozwa abaturage bafite amashanyarazi bari ku kigereranyo cya 30%, naho abafite amazi meza bari ku kigero cya 100%.

Ibiro by'Akarere ka Ngororero
Tumwe mu duce tugize Akarere ka Ngororero
Umuyobozi w'Akarere ka Ngororero, Godfroid Ndayambaje(ibumoso)

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved