Ngororero:Imiryango 90 imaze imyaka ine yishyuza ingurane z’ahanyujijwe amashanyarazi

Yanditswe na Kanamugire Emmanuel
Kuya 2 Ugushyingo 2016 saa 07:30
Yasuwe : XX
0

Imiryango igera kuri 90 yo mu mirenge itandukanye y’akarere ka Ngororero ivuga ko imaze igihe kigera ku myaka ine yishyuza amafaranga y’ingurane y’imitungo yabo yangijwe ubwo hashyirwaho umuyoboro w’amashanyarazi.

Iyi miryango ivuga ko imitungo yangijwe irimo imyaka yari ihinze mu murima, ibiti byo mu ishyamba n’ibindi byari ahashinzwe amapoto y’umuriro w’amashanyarazi.

Abagize iyi miryango batunga agatoki ubuyobozi bw’Akarere kubarangarana no kubasiragiza kuko ngo iyo bagiye kubaza iby’iyo ngurane babwirwa ngo ‘bazagaruke ejo cyangwa mu cyumweru gitaha’.

Umukecuru witwa Costasie Nyiraneza ubwo twamusangaga ku biro by’Akarere aje kubaza aho ingurane yabo igeze, yavuze ko arambiwe guhora asiragizwa n’ubuyobozi kandi aribwo bukwiye kumurengera.

Yagize ati “Ushinzwe ubutaka mu karere niwe uba watubwiye ngo ari kubikurikirana tuzaze ejo cyangwa ejobundi, ubwo duheruka hano yari yatubwiye ngo tuzagaruke mu cyumweru gitaha, none twaje kureba ko ayo mafaranga yabonetse”.

Nyiraneza ati “Usibye ko abandi bagiye bayabaha ariko twe twibaza impamvu tutahawe ayacu, reba nk’ubu hashize imyaka ine twarafunguje konti”.

Aba baturage basa n’abamaze gutakaza icyizere cyo kubona amafaranga yabo, bituma basaba ubuyobozi kubarenganura.

Umuyobozi w’Akarere ka Ngororero Godfroid Ndayambaje nubwo avuga ko atazi umubare w’amafaranga yose aba baturage bishyuza, yemeza ko abatarabona amafaranga yabo byatewe n’uko batinze kuzuza ibyangombwa bisabwa, ariko ngo ikibazo kiri gukurikiranwa kuko ibyangombwa byamaze kuzuzwa.

Ndayambaje ati “Hari bamwe bagiye buzuza ibyangombwa ku gihe, abo barishyuwe, nyuma twarabaruye dusanga hasigaye abagera kuri 90, twatanze urutonde rwabo dutegereje igisubizo kizaturuka mu Kigo gishinzwe gukwirakwiza amashanyarazi mu gihugu”.

Ndayambaje akomeza avuga ko ikibazo cyabo bari kugikurikirana kandi nta muturage basiragije ahubwo babahaye nimero za telefone ngo bajye bahamagara babaze niba amafaranga yabo yaraje batiriwe baza ku karere.

Yibukije abaturage ko bakwiye kujya bihutira kuzuza ibyangombwa bisabwa kugira ngo babonere ku gihe serivise bifuza.

Kugeza ubu akarere ka Ngororero kubijyanye no gukwirakwiza umuriro w’amashanyarazi mu baturage, kageze ku kigereranyo cya 18%.

Umuyobozi w’Akarere ka Ngororero Godfroid Ndayambaje (ibumoso)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza