Kwamamaza

Uburyo Sindayigaya wakuze yitwa ‘Umuzimu’ yahinduye ubuzima akaba icyitegererezo

Yanditswe kuya 10-11-2016 saa 09:03' na Tombola Felicie


Sindayigaya Saveur w’imyaka 22, uvuka mu Mudugudu wa Kigarama, Akagari ka Gatare, Umurenge wa Hindiro, mu Karere ka Ngororero, ufite ubumuga bw’ingingo (nta maguru afite), avuga ko yahuye n’ibibazo mu bwana bwe birimo kudakingizwa bitewe no kwitwa ‘umuzimu’ biturutse k’uko yavutse.

Avuga ko agitangira kumenya ubwenge, ubuzima bwatangiye kumusharirira kuko ababyeyi be batamukingizaga nk’abandi bana barindwi bava inda imwe, ngo ntibanatumaga agera ahagaragara kuko abayehova bari barabwiye umuryango we ko icyo ari ’igishitani’ cyabateye mu rugo rwabo ngo kuko mu minsi y’imperuka hazaza ibyaduka none bikaba byatangiriye iwabo mu rugo.

Mu kiganiro Sindayigaya yahaye umunyamakuru wa IGIHE ubwo habaga ibikorwa by’ukwezi kwahariwe ubukangurambaga bwa NEP-Kora Wigire nk’umuntu, uyu musore wavuye ku rwego rwo gusabiriza akagera ku iterambere binyuze mu budozi bw’inkweto yigiye kuri VTC –Hindiro muri Ngororero, yagarutse ku rugendo rw’ubuzima bwe bwamushaririye nk’umuntu wavukanye ubumuga ariko akaba amaze kugira aho yigeza.

Bijya gutangira ntiyigeze akingizwa nk’abandi bana

Ati” Nkura nasanze ndi imfura iwacu mu muryango, ababyeyi banjye byarabagoye kubana n’umwana udafite amaguru. Sinakingijwe nk’abandi bana, Mama yagiraga agahinda, yavugaga ko atabona aho ampingukana mu bandi babyeyi bafite abana bazima.”

Akomeza agira ati "Abayehova bakibwira ababyeyi banjye ko mu minsi y’imperuka hazaza ibyaduka bikaba byasohoreye mu muryango wabo, barushijeho kwiheba no kugira ubwoba kuko bumvise ko ari umuzimu wabateye.”

Ku myaka 11 nibwo yatangiye amashuri abanza

Muri 2004 Sindayigaya yabonye umushinga umuha igare ryo kugenderamo nk’umuntu ufite ubumuga kuko byari bimaze kumenyekana ko ahari kandi apfukiranwa, gusa ngo iwabo bararibitse kuko ntaho yajyaga.

Ati "Muri 2006 ubwo nari mfite imyaka 11, iwacu ku rugo Leta yahacishije umuhanda, nari mbonye amahirwe yo kuvuga ko nshaka kujya kwiga kuko igare ryanjye bampaye ryari rimaze imyaka ibiri ribitse mu nzu ntaho njya.”

Avuga ko yagiye ku ishuri ribanza rya Mbonabyombi akiga ashyizeho umwete akajya aba mu myanya y’imbere kugeza ageze mu mwaka wa gatanu w’amashuri abanza aho yarekeye kwiga.

Ati "Nize neza abarimu bakamfasha,hari nubwo nabaga uwa mbere ariko ngeze mu mwaka wa gatanu w’amashuri abanza n’ubundi ntibyagenze neza kuko ababyeyi banjye n’abana batandatu tuvukana bahisemo kuntoroka bakomeje kujya bikanga ko babana n’umuzimu, maze rimwe mvuye ku ishuri nsanga bagiye nta n’ikintu bajyanye kugeza uyu munota sinzi aho bari.”

Kuva mu bwana bwe ngo Sindayigaya abantu baramukunda bityo ngo n’iyo bamwe bamucaga intege yabonaga abandi bakamutera imbaraga ubuzima bugakomeza.

Yagiye gusabiriza birangira yize imyuga imutunze

Nyuma y’uko ababyeyi n’abavandimwe be bamucitse, ibyo kwiga yarabihagaritse ajya kurererwa kwa Nyirakuru ubyara nyina. Agezeyo ngo yaratotejwe bumva ko ari umutwaro ubaremereye, ahitamo gusubira iwabo ajya kwibana mu nzu.

Ati "Kwa Nyogokuru naratotejwe mpitamo kugaruka kwibana iwacu. Natangiye kujya njya mu murima ngahinga mfukamye nkabifatanya no kujya gusabiriza mu isoko rya Ngororero no ku mihanda hose.”

Muri ubwo buzima bumugoye bwo kuba wenyine yaravukanye n’abandi, abayobozi bamubwiye ko hari ishuri riri kwigisha imyuga ahita ajya kwiyandikishamo.

Muri VTC Hindiro niho yahinduriye ubuzima

Muri 2014 yagiye muri VTC Hindiro, yiga ibyo gukora inkweto kuko ariko kazi avuga ko kajyanye n’ubumuga afite.

Nyuma y’amezi abiri, we na bagenzi be bahawe impamyabumenyi zemewe n’Ikigo cy’Igihugu gishinzwe guteza imbere Imyuga n’Ubumenyingiro (WDA) mu byo gukora inkweto, bahita bashinga koperative ikora inkweto mu bikomoka ku mpu ikorera mu Murenge wa Hindiro, aho akora imiguro itatu y’inkweto ku munsi.

Ati "Twashinze koperative ikora inkweto, buri wese ku kwezi abona ibihumbi 30 by’amafaranga y’u Rwanda kandi turanizigamira. Ubu naguzemo inyana y’ibihumbi 120, naguze umurima w’ibihumbi 100 kandi nakoze ubukwe."

Uko yakoze ubukwe bw’igitangaza

Nubwo adafite amaguru, Sindayigaya niwe wakoze ubukwe mu muryango w’iwabo batangira kuvuga ngo umuryango awukuyemo abazimu.

Ati "Muri 2014 nari naramaze kujya muri ADEPR, Imana rero yagiye inyiyereka ndetse ikantumaho abantu batandukanye.Yanyeretse ko ngiye gukora ubukwe bw’igitangaza. Byarabaye, narambagije abakobwa batatu, babiri ni njye wababenze kuko nabonaga badakunda gukora kandi nshaka gutera imbere."

"Uwa gatatu twarabanye ariko ntibyari byoroshye kuko yari yarabenze abasore benshi umuryango we ukabimuziza, bakamubwira ko umugabo we atazamubasha, ko n’ubundi nibanabana atazabyara.”

Tariki ya 27 Gashyantare 2016 Sindayigaya yakoze ubukwe bw’igitangaza , abona ko Imana itabeshya kandi ngo abavugaga ko atazabasha gutera inda Imana yarabahinyuje kuko ubu umugore we atwite.

Ashimira Perezida Kagame

Ati "Perezida wa Repubulika yaduhesheje agaciro tugenda twemye kuko ibi byose iyo atabigiramo uruhare ntibyari gushoboka. Ntabwo aheza abaturage, niwe wazanye umuganda kandi ubuyobozi bwacu bwagiye bunyitaho muri ibyo bikorwa byiza birangajwe imbere nawe."

Ashimira kandi umuyobozi wa VTC Hindiro wamutoranyije mu bagomba kwiga imyuga akaba yaratangiye gukirigita ifaranga.

Afite indoto z’uruganda rw’inkweto

Sindayigaya avuiga ko yifuza kugera ku rwego rwo kugira uruganda rukora inkweto, agatanga akazi ndetse ngo akaba yanagura n’imodoka ntakomeze kugendesha ibiganza.

Mu buzima bwe ashimishwa n’uko yahinduye amateka, akanyomoza abavuga ko abamugaye badakora ubukwe, yemeza ko nabo bashoboye kuba bakora ibintu nk’iby’abandi badafite ubumuga.

Sindayigaya avuga ko yahuye n'ubuzima bukomeye ahabwa akato n'abo mu muryango we
Buri kwezi Sindayigaya yinjiza amafaranga ibihumbi 30, ariko afite inzozi zo gushinga uruganda ruzikora
Yemeza ko umwuga wo kudoda inkweto umutunze n'umuryango we
Yashimiye Perezida Kagame wimitse politiki idaheza abafite ubumuga
Vincent Munyeshyaka, Umunyamabanga wa Leta muri MINALOC areba ibikorwa na koperative Sindayigaya abarizwamo
Aha niho yigiye umwuga w'ubudozi umutunze n'umugore we

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved