Kwamamaza

Ni iki kigiye gukurikira nyuma y’itanga ry’Umwami Kigeli V Ndahindurwa ?

Yanditswe kuya 17-10-2016 saa 13:06' na IGIHE


Nyuma y’itanga ry’Umwami Kigeli V ryabaye kuri iki Cyumweru, haribazwa ikigiye gukurikiraho, aho umugogo we uzatabirizwa n’indi mihango ijyana n’itanga ry’umwami uko izakorwa.

Umwami Kigeli V yatanze mu ijoro ryo kuwa Gatandatu rishyira ku Cyumweru tariki 16 Ukwakira 2016 azize uburwayi yari amaranye igihe. Yaguye mu Mujyi wa Oakton muri Leta ya Virginia, muri Leta Zunze Ubumwe za Amerika.

Umwe mu bayobozi bashinzwe umuco yabwiye IGIHE ko Kigeli V nta wamukuraho kuba yarabaye umwami, ariko atekereza ko kuva “yari ishyanga, kuba yatanze nta mihango ijyanye n’umurongo we yakorwa mu Rwanda, kereka habaye icyemezo cya politiki”.

Umuyobozi w’Inteko Nyarwanda y’Umuco n’Ururimi, Dr Vuningoma James we yabwiye IGIHE, ko Kigeli V ari “Umunyarwanda ufite uburyo bwihariye kuko yari umwami w’iki gihugu.”

Ati “Turi gushakisha natwe ngo ni iki cyakorwa mu buryo bw’umuco nyine nk’umuntu wagize uruhare mu miyoborere y’icyo gihe, ariko ntitwari twagira umwanzuro duhuriyeho. Iyo tubonye ibyago nk’ibyo byabaye, ari wowe ari nanjye turatabara, haba hari icyiriyo tukamenya aho cyabereye, mbese umuryango n’abo aribo bose, bakaba babafata mu mugongo.’’

“Gufatwa nk’umwami ni karande k’Abanyarwanda, kwari ugusimburana guhari muri icyo gihe. Ubu turi muri repubulika, ni amatwara atandukanye, afite ibihe bitandukanye ariko ntibivanaho kumufata nk’umuntu. Mu minsi cyangwa amasaha ari imbere turaba tumenye ngo ni ibiki byakorwa mu kubahiriza umuntu nk’uwo no kumuha icyubahiro, kumuherekeza.’’

Umuyobozi w’Inteko Nyarwanda y’Umuco n’Ururimi, Dr Vuningoma James

Dr Vuningoma yavuze ko iby’aho yatabarizwa byaba muRwanda cyangwa mu mahanga, bigomba gushingira ku cyifuzo cy’umuryango we.

Ati “Ntacyo dushobora kubivugaho, kuko ntabwo tuzi icyo umuryango ugena, ni ugutegereza tugashakisha ese umuryango urabivugaho iki, Urifuza iki.’’

Mu itangazo ryashyizwe ahagaragara n’ibiro by’Umwami Kigeli V muri iki gitondo, rivuga ko abajyanama be bari kuganira ku ho azatabarizwa n’uko bizakorwa.

Pasiteri Mpyisi ati kuvuga ibya Kigeli V ataratabarizwa “ni ikizira”

Pasiteri Ezra Mpyisi w’imyaka 94, ufite ubunararibonye mu by’amateka y’u Rwanda n’iby’ingoma ya cyami kuko yari n’umujyanama w’umwami Mutara III Rudahigwa wasimbuwe n’uyu Kigeli V Ndahindurwa, yabwiye IGIHE ko atagira icyo avuga mbere y’uko atabarizwa (ashyingurwa).

Ati “Ubu ntabwo twavuga amateka ye kereka amaze gutabazwa, ntabwo uvuga amateka y’umuntu wapfuye, uyavuga ihamba rirangiye byaramaze iminsi.’’

“Ubu muri iki gihe cy’ubwirabure ntacyo umuntu avuga ku mateka y’umuntu, kirazira mu muco w’u Rwanda. Mu muco w’u Rwanda kirazira ntabwo uvuga amateka y’umuntu yapfuye kereka iby’ipfa birangiye bimaze guherera uruhande rumwe.’’

Pasiteri Mpyisi yanagaragaje ko adakeneye kuvuga byinshi kuri Kigeli V, mu kiganiro yagiranye na City Radio mu gitondo cyo kuri uyu wa Mbere.

Avuga uko yakiriye itanga rye, Pasiteri Mpyisi yasubije umunyamakuru ati “Mbwira uko wakira urupfu rwa So? Nanjye ndababaye cyane. Ikindi mugerekaho ni iki?”

Yabajijwe aho atekereza ko ‘umugogo’ w’umwami wazatabarizwa cyane ko yatangiye ishyanga, nabwo arasubiza ati ‘‘Ndi umuhindiro se ? […] Urambaza ibya Kigeli ntari Umuhindiro ndakubwira iki ?’’

Yavuze ko ibyo byose byabazwa ‘Abahindiro’, aribo bavandimwe b’Umwami Kigeli, akomeza agira ati ‘‘ko ndi umugaragu we ndi umuvandimwe we?’’

Bivugwa ko atari ubwa mbere Pasiteri Mpyisi agaragaza ko adashimishijwe no kubazwa byinshi kuri Kigeli V, kuko ngo hari ubwo yasohotse hagati mu kiganiro kuri Radio, ariko icyo gihe akaza gutanga impamvu ko nta mwanya afite kuko yari mu myiteguro ajya mu bukwe.

Inkuru bifitanye isano:

- Umwami Kigeli V Ndahindurwa ‘yatangiye’ muri Amerika

“Kuba Umwami Kigeli V yatangiye imahanga ni ibyago ariko si igitangaza”


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved