Ni iki Oda Gasinzigwa ajyanye muri EALA nyuma yo gusimbura Christophe Bazivamo?

Yanditswe na Philbert Girinema
Kuya 20 Ukwakira 2016 saa 06:26
Yasuwe : XX
0

Byari ibyishimo kuri Oda Gasinzigwa, yongera kuramukanya n’abadepite n’abasenateri mu ngoro y’Inteko Ishinga Amategeko, ubwo yari amaze gutorerwa kuba Umudepite mu Nteko Ishinga Amategeko y’Umuryango wa Afurika y’Uburasirazuba, EALA.

Ni umwanya Gasinzigwa w’imyaka 49 yahawe nyuma y’amezi arindwi akuwe ku buyobozi bwa Minisiteri y’Uburinganire n’Iterambere ry’Umuryango, MIGEPROF, agasimbuzwa Dr Diane Gashumba nawe waje kwimurirwa muri Minisiteri y’Ubuzima.

Gasinzigwa yatowe n’Abadepite n’Abasenateri 71 muri 75, atsinda Kanamugire Callixte mu buryo bworoshye, ubwo mu gitondo cyo kuri uyu wa Gatatu tariki 19 Ukwakira, hatorwaga umudepite usimbura Christophe Bazivamo weguye amaze kugirwa Umunyamabanga Mukuru Wungirije w’Umuryango wa Afurika y’u Burasirazuba (EAC).

Gasinzigwa na Kanamugire bombi ni abakandida batanzwe n’Umuryango FPR Inkotanyi Bazivamo yaturukagamo, nk’uko itegeko ribigena.

Nyuma y’itora, Gasinzigwa yabwiye itangazamakuru ko amatora yatangiye yumva yifitiye icyizere, bikaba ari ibyishimo ko yongeye guhabwa umwanya wo gutanga umusanzu mu kubaka igihugu.

Ati “Birumvikana ni ibyishimo ku cyizere ngiriwe n’Inteko Ishinga Amategeko, nkaba nshimira cyane icyizere nahawe n’Umuryango RPF Inkotanyi, cyane cyane Umuyobozi Mukuru w’Umuryango ariwe Perezida wa Repubulika, kuba umwe mu bakandida ariko noneho Inteko nayo ikaba impaye icyizere.”

“Nk’umwe mu bagize EALA, cyane bihereye no ku nshingano zayo, ni uguhagararira Abanyarwanda ariko nahagarariye abaturage ba EAC, kugira ngo amategeko atorwa abe ari amategeko koko areba inyungu z’abagize uyu muryango mu bijyanye n’ubukungu, imibereho myiza na politiki.’’
Gasinzigwa yavuze ko ubwo u Rwanda rwajyaga muri EAC mu 2007 rwabonaga amahirwe ahari, ku buryo yumva umusanzu we ahereye ku mirimo yakoze mbere, ari uguharanira ko abanyarwanda bose bamenya ayo mahirwe.

Mu mirimo yakoze harimo ko yabaye Minisitiri w’Uburinganire n’Iterambere ry’Umuryango, ayobora urwego rushinzwe kugenzura iyubahirizwa ry’uburinganire bw’umugabo n’umugore, akora mu mishinga yo gutuza ahari ishyamba rya Gishwati, ndetse anakora muri banki imyaka umunani.

Gasinzigwa kandi yanayoboye inama y’igihugu y’abagore ndetse aba komiseri muri Komisiyo y’ubumwe n’ubwiyunge.

Yakomeje agira ati “Nshingiye no ku mahirwe nagiye ngira yo kumenya ibyo igihugu cyanjye cyifuza, numva nzahagarara neza kugira mbe navuganira ayo mategeko meza yadufasha ngo tubone inyungu dutegereje muri EAC, mu bijyanye n’imibereho myiza y’abaturage bacu, habeho ubucuruzi buhamye, no kugira ngo tugire imbaraga zikomeye kuko nk’abagize ibyo bihugu twabonye ko gushyira hamwe ari imbaraga.’’

“Imigambi njyanye ni iyo gufatanya n’abandi nsanzeyo ariko nanjye nkongeramo ubwo bumenyi, ayo mateka mfite, mu kugira ngo mbashe guharanira abatuye EAC, ariko by’umwihariko, Abanyarwanda.’’

Gasinzigwa yavuze ko afatanyije n’abandi badepite azasanga ku cyicaro cya EALA, i Arusha muri Tanzania, yifuza ko begera Abanyarwanda bakerekana amahirwe u Rwanda rufite muri EAC ngo “ntagume mu mpapuro”, humvwe ibyifuzo byabo, banabatume.

Gasinzigwa yavuze ko ari inshingano zitoroshye ariko z’ingenzi, kuko EAC iri mu bihe byo kugira ngo ibe yatera imbere, ndetse uyu muryango ube wahangana n’ibindi bibazo Isi irimo bijyanye n’ubukungu, umutekano, ubukene, imico mibi n’ibindi.

Itegeko rigenga itorwa ry’umudepite uhagarariye u Rwanda muri EALA, rigena ko iyo hari uvuye mu mwanya we, uwinjiyemo ‘‘arangiza igice cya manda gisigaye cy’uwo asimbuye,’’bivuze ko azarangizanya na manda y’imyaka itanu Bazivamo yatangiye mu 2012, izarangira muri Kamena 2017.

Umuryango FPR Inkotanyi n’Imitwe ya politiki yishyize hamwe nawo, muri EALA bagiramo abadepite bane naho PL, PSD, Urubyiruko, Abagore n’Abafite ubumuga bakagiramo umudepite umwe umwe.

Abo muri FPR Gasinzigwa asanze muri EALA ni Martin Ngoga, Hajabakiga Mugorenejo Patricia na Rwigema Pierre Céléstin. PL ifitemo Odette Nyiramirimo; PSD ifite Dr. Francois Xavier Kalinda, Urubyiruko ruhagarariwe na Ndikuryayo Straton, abagore bahagarariwe na Nyirahabineza Valerie naho abafite ubumuga bahagarariwe na Dr. James Ndahiro.

Oda Gasinzigwa wigeze kuba Minisitiri w'uburinganire yatorewe gusimbura Bazivamo muri EALA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE