Ni inkuru nziza ku mahoro n’umutekano – U Rwanda rwashimye RDC nyuma yo kwica Gen Mudacumura

Yanditswe na Rabbi Malo Umucunguzi
Kuya 19 Nzeri 2019 saa 08:04
Yasuwe :
0 0

Guverinoma y’u Rwanda yashimiye Repubulika ya Demokarasi ya Congo, mu ijoro rishyira kuri uyu wa Gatatu yarashe ikica Lt Gen Mudacumura Sylvestre wari umuyobozi w’umutwe w’iterabwoba wa FDLR, umaze imyaka myinshi ukorera mu Burasirazuba bw’icyo gihugu.

Nk’uko ingabo za RDC, FARDC zabitangaje, Lt Gen Mudacumura yishwe mu rugamba rukomeye yagabweho n’abasirikare badasanzwe, ndetse yicanwa n’abandi barwanyi bari kumwe.

Amakuru ahamya ko ubwo FARDC yagwaga gitumo Gen Mudacumura, yicanwe n’abandi basirikare bari ibyegera bye barimo Col Serge, Col Soso Sixbert, uwari ushinzwe kumurinda akaba n’umunyamabanga we Maj Gaspard n’abandi. Hafashwe kandi abarwanyi 15.

Umunyamabanga wa Leta muri Minisiteri y’Ububanyi n’Amahanga, Amb. Nduhungirehe Olivier, yabwiye IGIHE ko iyi ari intambwe ishimishije itewe mu gukomeza guhashya imitwe yitwaje intwaro ikorera mu Burasirazuba bwa RDC.

Ati "Ni inkuru nziza ku mahoro n’umutekano wa Congo n’akarere. Kuba FARDC yishe Mudacumura, nyuma y’uko yari yaranafashe umuvugizi wa FDLR n’ushinzwe ubutasi ikabohereza mu Rwanda, bigaragaza ubushake bwa Perezida Tshisekedi mu guhashya imitwe y’abajenosideri n’iy’iterabwoba iri mu Burasirazuba bwa Congo.”

Mudacumura w’imyaka 65 yashakishwaga n’urukiko mpuzamahanga mpanabyaha rukorera i La Haye, rwamuregaga ibyaha birimo kugaba ibitero ku basivili, ubwicanyi, kwangiza ibice bimwe by’umubiri ku muntu, gufata ku ngufu, kwangiza imitungo no gusahura.

Iyicwa rya Mudacumura ryongereye umusonga kuri FDLR?

Ubwo abatangije FDLR bahungaga u Rwanda nyuma yo gutsindwa mu rugamba rwo kubohora u Rwanda, bambutse umupaka bashinga umutwe witwaga RDR, uza kuvamo ALIR ya mbere na ALIR ya kabiri, bamwe bajya mu Majyepfo ya Congo abandi baguma muri Kivu, baza kongera guhura. Baje no kugenda batatana bajya muri CNRD na RUD-Urunana.

Iyicwa rya Mudacumura rije nyuma y’uko Ignace Murwanashyaka wahoze ari Umuyobozi w’Umutwe wa FLDR wari ufungiye mu Budage ku byaha by’intambara, aheruka kugwa muri gereza z’iki gihugu aho yari ari kurangiriza igihano cye cy’igifungo cy’imyaka 13 yakatiwe mu 2015, nyuma y’urubanza rwe rwamaze imyaka ine.

Ku wa 15 Ukuboza 2018 kandi abari abayobozi ba FDLR barimo Umuvugizi wayo Ignace Nkaka uzwi nka LaForge Fils Bazeye na Nsekanabo Jean Pierre Alias Abega wari ushinzwe ubutasi, batawe muri yombi bavuye muri Uganda, gutegura ibikorwa bigamije guhungabanya umutekano w’u Rwanda nk’uko babyiyemerera.

Ubu bafungiwe mu Rwanda aho urukiko ruheruka kwemeza ko bafungwa by’agateganyo, mbere y’uko urubanza rwabo rutangira mu mizi.

Nubwo Mudacumura apfuye, hari abayobozi muri uyu mutwe bagishakishwa, ndetse FARDC ivuga ko ibikorwa byo kubahiga bikomeje.

Abo barimo Pacifique Ntawunguka "Omega" uyobora ibikorwa bya FDLR muri Kivu y’Amajyaruguru, Col Ruhinda uyobora FDLR muri Nyiragongo na Goma wanavuzwe cyane mu bitero uyu mutwe wagiye ugaba mu Karere ka Rubavu mu mirenge ya Busasamana na Bugeshi, Gashirabake, Col Kubwayo n’abandi.

Hari kandi n’umuyobozi w’ikirenga FDLR, General Byiringiro Victor Rumuli bakunze kwita Victor Rumuri cyangwa Michel Byiringiro.

Umujyanama wa Perezida wa Repubulika mu bya Gisirikare n’umutekano, Gen James Kabarebe, muri Gicurasi yavuze ko muri Congo yaba FDLR, CNRD na RUD-Urunana cyangwa RNC, bibereyeho gusa kubwira Abanyarwanda ko hari abantu babi bagihari, ko nta mwanya wo kwirara, kuko nta mpungenge bagiteye ku mutekano.

Gen Kabarebe yavuze ko hari igihe ibi abigarukaho hakagira abibaza ko wenda abagira inama ngo bishyire hamwe, nyamara ngo nabyo byabakururira ibibazo.

Yakomeje ati “Ahubwo nibyo byiza. Kuko igihe cyose bishyize hamwe, baba baduhaye umwanya wo kubarangiza. Igihe cyose bishyize hamwe twe ni byo dushaka nubwo mba mbivuga, bashatse kwishyira hamwe twe nibyo dushaka, kuko iyo bishyize hamwe biduha umwanya, tubegera neza tukabagabaganya, tukagabanya imbaraga zabo."

"Ni nako byagenze kuko bacyambuka muri Congo bagiye ari RDR, iza kuvamo ALIR ya mbere na ALIR ya kabiri, bamwe bajya mu Majyepfo ya Congo abandi baguma hano muri Kivu, baza guhura. Umunsi bahuye bakajya hamwe ni wo munsi twabamaze. [...] N’ubu nubwo bakwishyira hamwe ni byo byadufasha. Igihe rero bishyize hamwe ni ho twabamariye, niho imbaraga zabo zashiriye, niko byagenze.”

Gen Fred Ibingira we muri Gicurasi 2017 yavuze ko abibwira ko FDLR yazagaruka kuyobora igihugu, bibeshya, kuko abayigize baba Mudacumura na Iyamuremye ibikorwa byabo bizwi.

Ati “Nubwo twasinzira tukajya mu bitotsi, FDLR igatera dusinziriye, twarwana dusinziriye tukayitsinda.”

Nduhungirehe yavuze ko iyicwa rya Mudacumura ari inkuru nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza