Niba uri umugabo utagira ubwiherero,nta bugabo bwawe- Guverineri Mureshyankwano

Yanditswe na Uwishyaka Jean Louis
Kuya 2 Ugushyingo 2016 saa 05:16
Yasuwe : XX
0

Guverineri w’Intara y’Amajyepfo, Marie Rose Mureshyankwano, yanenze bamwe mu batuye Akarere ka Gisagara batagira ubwiherero, abibutsa ko umwanda ari mubi kandi ko ugira ingaruka mbi ku buzima.

Bamwe mu batuye mu Karere ka Gisagara bemeza ko hari bagenzi babo batagira ubwiherero kubera impamvu zitandukanye zirimo kutabyitaho n’ubukene butuma batabasha kwiyubakira ubwiherero.

Jean Pierre Singirankabo utuye mu Kagari ka Gakoma, mu Murenge wa Mamba ati “Kutagira ubwiherero byatera indwara nka macinya, kolera, kuko byanga bikunda hari umwanda uturuka ku masazi ugakwira hose, abatabufite tugiye kubashishikariza kubugira.”

Ubwo yifatanyaga n’abatuye mu Murenge wa Mamba, mu gikorwa cyo gusiza ikibanza cy’ahazubakwa umudugudu w’icyitegererezo w’Umurenge wa Mamba, yashishikarije abaturage kugira isuku muri byose.

Yavuze ko mu Ntara y’Amajyepfo hakigaragara abantu bituma mu bihuru kubera ko batagira ubwiherero, cyangwa ababufite ugasanga budasobanutse, ku buryo bisa nko kwituma ku gasozi.

Yagize ati “Kuba uri umuntu w’umugabo utagira umusarani ni igisebo, ibaze umugore wawe agiye kwituma mu rutoki bakorosora bakamubona ikibuno, […] warangiza ukicara ngo ndi umugabo, nta bugabo bwawe.”

Yakomeje asaba abagore gufata iya mbere mu kugira isuku muri byose kuko ari byo bizatuma bagira ubuzima bwiza buzira indwara.

Ubuyobozi bw’Akarere ka Gisagara buherutse gutangaza ko bugiye guhagurukira ikibazo cy’abagabo n’abana basigaye bagaragaraho umwanda ukabije, ndetse ngo nibiba ngombwa bazajya bakarabirizwa mu ruhame.

Ikibazo cyo kutagira ubwiherero gikunze kugaragara mu bice by’icyaro, aho usanga hari bamwe bajya kubutira mu baturanyi, babinuba bakayoboka iy’ibihuru.

Minisiteri y’Ubuzima yemeza ko hafi kimwe cya kabiri cy’indwara zakirwa kwa muganga zituruka ku isuku nke. Izo zirimo impiswi, inzoka zo mu nda, igituntu, indwara zo mu kanwa, izuruhu na malariya.

Abaturage biyemeje ko bagiye guhwitura bagenzi babo batagira ubwiherero kugira ngo babushake
Guverineri Mureshyankwano yemeza ko kutagira ubwiherero ari igisebo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE