Kwamamaza

Nta Ntore irebera, nta Ntore itekinika - Minisitiri w’Intebe

Yanditswe kuya 27-11-2016 saa 12:55' na Rabbi Malo Umucunguzi


Minisitiri w’Intebe, Anastase Murekezi, yibukije abayobozi bakuru b’amashami mu nzego za Leta ko bafite inshingano yo gutanga serivisi nziza ku baturage, anashimangira ko bagomba gucunga neza ibya Leta kandi ntibatume ibintu bidafututse bibanyura imbere ngo bikomeze mu buyobozi bwo hejuru.

Murekezi yabigarutseho kuri iki Cyumweru tariki 27 Ugushyingo 2016, ubwo yasozaga Itorero ry’Imbamburiramihigo rigizwe n’Abayobozi b’Amashami mu bigo bya Leta ryaberaga mu rwunge rw’Amashuri rwa Leta rwa Butare, mu muhango wabereye muri Stade Kamena mu Mujyi wa Huye.

Minisitiri w’Intebe yavuze ko Perezida Kagame yamutumye kubashimira akazi keza bakora n’ubwitange bagira mu gushyira mu bikorwa Gahunda za Leta.

Murekezi yabasabye kuba umusemburo w’igenamigambi rinoze kandi rigamije impinduka mu Cyerekezo cya 2050, kwihuta mu kazi no kunoza ibyo bakora no guharanira Ubumwe bw’Abanyarwanda.

Ati “Nyuma yo gusoza iri torero, icyo Abanyarwanda tubategerejeho ni ugushyira mu bikorwa, imihigo yose mwahize. Muzarusheho kugira uruhare mu gutegura no gushyira mu bikorwa Politiki na Gahunda bya Leta bigamije kuzana impinduka nziza”.

“Muzarangwe no kwirinda ruswa, kugira ubupfura n’ubudakemwa mu mikorere no mu myitwarire yanyu aho muri hose mu kazi. Mujye muhora muzirikana ko ari mwebwe mugize amashami akomeye ubuyobozi bwose bwa Leta y’u Rwanda bwubakiyeho.’’

Minisitiri w’Intebe Anastase Murekezi yashimangiye ko abo bayobozi b’amashami aribo “kiraro gikomeye gihuza abayobozi bakuru, abakozi, n’abaturage”, ndetse ari nabo batoranywamo abayobozi bakuru.

Ati “Ndabasaba guha ababagana bose serivisi nziza, kandi mukanabitoza abo muyobora bose… Nta Ntore irebera, nta Ntore itekinika, mwitangire umurimo aho muri hose kandi muhe abaturage serivisi bakeneye.’’

Iri torero ryatangiye kuwa kuwa 18 Ugushyingo, rigamije kubaka indangagaciro z’umuco nyarwanda mu bayobozi b’amashami no kubongerera ubumenyingiro bwo kuyobora, ku nsanganyamatsiko igira iti “Gutanga Serivisi zishingiye ku Muturage ni Intego Duhuriyeho”.

Minisitiri w’abakozi ba Leta n’Umurimo Judith Uwizeye, yavuze ko gutanga Serivisi zishingiye ku muturage bizagerwaho kubera uruhare izi ntore zizabigiramo, zirangwa no kuba nkore neza bandebereho.

Ati “Imikorere yanyu y’ubutore si iyo mugaragaza hano, izanagaragarire no mu kazi. Muzabigaragaze muba Imbangukiramihigo; musizanira kuba ku isonga; muba ba rudacogora ku rugamba ruharanira ineza y’Umunyarwanda; mube abatoza b’umurimo unoze; mube ba nkore neza bandebereho kandi mube ku isonga mu kubaka u Rwanda rushya n’iterambere rya Afurika.’’

Muri iri torero kandi hatangiwemo ibiganiro bitandukanye, harimo icyo Minisitiri w’Ingabo Gen James Kabarebe yatanze kuwa Gatanu w’iki cyumweru.

We yibukije aba bayobozi gutanga serivisi nziza, abibutsa ko "gukunda igihugu, kwitanga, gukunda umurimo, imyitwarire myiza, kwihangana... ari zo mbaraga ziruta izindi zifasha gutera imbere".

Yavuze ko hari benshi batanze ubuzima bwabo babohora igihugu kugira ngo inzego z’ubuyobozi u Rwanda rufite ubu zibe zihari, ariko hakiri byinshi bigisabwa kugira ngo kigere ku iterambere rirambye.

Guverinoma ivuga ko serivisi nziza zihutusha iterambere, aho yiyemeje ko nyuma ya gahunda ya kabiri y’imbaturabukungu izarangira mu 2018, serivisi nziza zizaba zitangwa hejuru ya 85%, mu gihe ibipimo by’uko abaturage babona imiyoborere ibabereye n’imitangire ya serivisi mu 2015 byari 71.1%.

Iri torero ryitabiriwe n’abayobozi 786 barimo abagabo 630 n’abagore 156, bafite uruhare runini mu itegurwa rya za politiki, amategeko no kubishyira mu bikorwa.

Minisitiri w'Intebe, Anastase Murekezi ageza ijambo ku ntore z'Imbangukiramihigo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved