Kwamamaza

Ntabwo abantu baba bahuzagurika ngo bakomeze kuza ku mwanya w’imbere- Perezida Kagame

Yanditswe kuya 18-11-2016 saa 21:43' na Rabbi Malo Umucunguzi


Perezida Paul Kagame yasabye abadepite bashya mu Nteko Ishinga Amategeko guhuza imbaraga n’abo basanze, hagamijwe kurushaho guteza imbere u Rwanda kuko ibiri gukorwa ari byiza, ariko hakaba hakiri intambwe igomba guterwa.

Umukuru w’Igihugu yabigarutseho kuri uyu wa Gatanu ubwo yakiraga indahiro z’abadepite batatu, Karinijabo Barthelemy, Mukamana Elisabeth na Bitunguramye Diogène, bose baturuka mu Muryango FPR Inkotanyi.

Ni abadepite basimbuye Depite Nyandwi Désiré witabye Imana tariki ya 14 Ukwakira 2016, Depite Nyirasafari Espérance uheruka kugirwa Minisitiri w’Uburinganire n’Iterambere ry’Umuryango na Depite Mureshyankwano Marie Rose wagizwe Guverineri w’Intara y’Amajyepfo, bose baturukaga mu Muryango FPR-Inkotanyi.

Itegeko Ngenga rigena imikorere y’Umutwe w’Abadepite mu Nteko Ishinga Amategeko riteganya ko iyo ‘Umudepite atakaje cyangwa akuwe ku murimo we w’ubudepite, umwanya we uhabwa ukurikiraho kuri lisiti yatoreweho akarangiza igihe cya manda gisigaye iyo kirenze umwaka umwe’.

Perezida Kagame yavuze ko mu ndahiro zabo biyemeje imirimo myiza bagiye gukora bafatanyije n’abo basanze n’izindi nzego, abibutsa ko u Rwanda ruri kuza mu myanya y’imbere mu nzego zitandukanye, ariko bagomba kongera imbaraga kugira ngo igihugu gikomeze gutera imbere.

Ati “Igihugu kimaze gutera imbere muri byinshi.[…] N’iyo ureba amakuru ashyira hamwe uko ibintu bigenda ku Isi haba mu by’ubukungu, gukora ubucuruzi, imiyoborere, umutekano, n’ibindi, ngira ngo murabibona n’ejo hari ibindi bizasohoka, murabikurikirana u Rwanda rurakomeza kuza mu myanya y’imbere.”

“Ntabwo abantu baba bahuzagurika ngo bahore baza ku mwanya w’imbere. Ubwo bivuze ko ibikorwa bifite ishingiro.’’

Perezida Kagame yavuze ko Abanyarwanda bafite inshingano zo gukomeza gukora neza ku buryo u Rwanda rukomeza gutera imbere, rukarushaho gukora neza kuko ntawe ukora neza ngo agere aho adakenera gutera indi ntambwe.

Yakomeje agira ati “Nk’uko tubizi mu gihugu cyacu haracyari urugendo tugomba gukora kugira ngo tugere ku ntego nyinshi tugenda twiha za buri mwaka. Gukora kwacu ni ukwikorera kandi turifuza gukora ibintu bizima, turifuza gukora ibintu birambye.”

Umukuru w’Igihugu kandi yavuze ko abayobozi bagenda hakaza abandi, bose inzira ari imwe mu guteza imbere u Rwanda.

Nk’uko biteganywa n’Itegeko Nshinga ry’u Rwanda, aba badepite bashya barahiriye kutazahemukira Repubulika y’u Rwanda, kuzubahiriza Itegeko Nshinga n’andi mategeko, guharanira uburenganzira bwa muntu n’ibyagirira Abanyarwanda bose akamaro, kuzaharanira ubumwe bw’Abanyarwanda, gukorana umurava imirimo bashinzwe no kudakoresha ububasha bahabwa n’amategeko mu nyungu zabo bwite.

Biteganyijwe ko aba badepite bashya bazarangiza manda y’imyaka ibiri abo basimbuye bari basigaje, izarangira mu 2018.

Perezida Paul Kagame yashimangiye ko nta kwirara kuko iterambere u Rwanda rushaka ritaragerwaho

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved