Ntabwo dushaka ko TTC zacu zigamo abana bafite amanota ya nyuma-Dr Munyakazi

Yanditswe na Emma-Marie Umurerwa
Kuya 8 Gicurasi 2019 saa 10:04
Yasuwe :
0 0

Minisiteri y’Uburezi (Mineduc) yashishikarije abanyeshuri b’abahanga bo mu cyiciro rusange cy’amashuri yisumbuye guhitamo amashami y’amashuri nderabarezi (TTC), aho kuyaharira abafite amanota ya nyuma gusa.

Ubu bukangurambaga bumaze iminsi buzenguruka hirya no hino mu bigo by’amashuri babasaba kuzahitamo neza, bwateguwe nyuma yo kubona ko bamwe mu banyeshuri bitegura gukora ikizamini cya Leta gisoza icyiciro cya mbere cy’amashuri yisumbuye badasobanukiwe ibijyanye no guhitamo amashami bazigamo mu byiciro bikurikiyeho.

Ubu bukangurambaga bwasorejwe muri Lycée de Kigali, ahari hateraniye n’abanyeshuri biga muri Collège Saint André i Nyamirambo, kuri uyu wa 8 Gicurasi 2019.

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Dr Munyakazi, yasabye abanyeshuri kugira amahitamo meza, ababwira ko icyifuzo cya Minisiteri ari uko abanyeshuri b’abahanga bahitamo kwiga uburezi.

Ati “Amashuri atwigishiriza abarezi nayo twayafatiye ibyemezo bikomeye cyane. Kugira ngo tubone umwana uzavamo umwarimu dukeneye nuko hariya bigira (TTC) hajyamo umwana w’umuhanga ntabwo dushaka ko TTC, zacu zigamo abana bafite amanota ya nyuma. Ntabwo bizasubira”.

Yakomeje abwira abanyeshuri ko Leta ishyize imbaraga kubakira ku bumenyi, kandi ko irimo gushyiramo imbaraga nyinshi. Yakomeje ababwira ko guhitamo ari ukwabo ariko bagomba kwirinda guhitamo bashingiye ku byo abandi bahisemo.

Ati “Icyo ushaka kuzaba cyo gishobora kuba gitandukanye na biriya mugenzi wawe yahisemo. Ibi mugiye gukora nibyo bitanga umurongo by’uwo ushaka kuzaba we. Iyo rero uhisemo nabi, urangiza wagiye kwiga ubuganga kandi warashakaga kuzaba mwarimu. Icyo tubifuzaho nukugira amahitamo ariko akaba ari amahitamo yanyu.”

Kalisa Ornella, wiga mu mwaka wa Gatatu muri St André i Nyamirambo, avuga ko yahisemo kwiga imibare n’ubumenyi bw’Isi.

Ati “Ibyo nahisemo kwiga nibyo nkunda, ibyo nahisemo nibyo mbona bizamfasha gutegura ejo hazaza hanjye. Abandi bana nabashishikariza kwiga uburezi kuko nabwo ni bwiza.”

Minisiteri y’Uburezi kandi yatanze amahirwe ku banyeshuri bari barangije guhitamo amashami baziga, ko bakongera bagahitamo dore ko hasigaye ibyumweru bitatu ngo iki gikorwa gisozwe mu gihugu hose.

Mu rwego rwo kurushaho guteza imbere uburezi bufite ireme, abanyeshuri batsinze neza mu cyiciro rusange bazahitamo uburezi, Mineduc izajya ibafasha kwiga kaminuza ku buntu, n’amafaranga atunga umunyeshuri bitishyurwa.

Mu ngamba Mineduc yafashe zo kubungabunga ireme ry’uburezi harimo kongerera amashuri nderabarezi ubushobozi bushingiye ku bikorwa remezo n’ibikoresho bigezweho no kugabanya umubare w’abanyeshuri mu ishuri kugira ngo mwarimu abafashe kwiga bihagije.

Hari uguha TTC abakozi n’abarimu bazobereye umwuga wo kwigisha; kuvugurura integanyanyigisho ya TTC; guha ubushobozi amashuri y’imenyerezamwuga wo kwigisha burimo ibikorwa remezo, ibikoresho bya ngombwa bihagije n’ibindi.

Mineduc yanakuyeho inzitizi zose zatuma umunyeshuri atiga neza, cyane cyane izishingiye ku mikoro, aho umunyeshuri wiga muri TTC azajya yishyura 50% by’amafaranga y’ishuri andi 50% atangwe na Leta.

Abanyeshuri biga mu mwaka wa Gatatu muri LDK n'abiga muri uwo mwaka muri St Andre bakurikiye ikiganiro bahawe na Dr Munyakazi, abasaba guhitamo neza amashami baziga
Dr. Munyakazi yabwiye abanyeshuri ko iyo uhisemo nabi ishami uziga bikugiraho ingaruka ejo hazaza
Umunyamabanga wa Leta muri Mineduc ushinzwe amashuri abanza n'ayisumbuye, Dr Isaac Munyakazi
Umuyobozi wa REB, Dr Ndayambaje hamwe n'umuyobozi wa LDK, Martin Masabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza