Kwamamaza

Ntabwo tugomba kunyurwa n’iterambere ricagase – Perezida Kagame

Yanditswe kuya 13-10-2016 saa 12:12' na Rabbi Malo Umucunguzi


Perezida wa Repubulika Paul Kagame yashimangiye ko ibihugu bifite amahirwe yo gutera intambwe ikomeye mu kurwanya ukwangirika kw’ikirere, avuga ko uko ibihugu bishyiramo imbaraga vuba, ariko ikiguzi kiba gito kandi umutwaro w’ibidukikije ukagabanuka.

Kuva kuwa Mbere w’Iki Cyumweru, intumwa zigera ku 1000 zaturutse mu bihugu hafi 200 zikoraniye i Kigali ziga ku ivugururwa ry’amasezerano ya Montreal, hagamije icibwa ry’ikoreshwa ry’imyuka ya hydrofluorocarbons [HFCs] ikoreshwa mu byuma bikonjesha, ariko ikagira ingaruka ku kayunguruzo k’izuba, Ozone.

Muri iyi nama kuri uyu wa Kane tariki 13 Ukwakira, Perezida Kagame yavuze ko kubera aya masezerano, akayunguruzo k’imirasire y’Izuba karagenda gakira buhoro buhoro.

Yakomeje agira ati “ Ntabwo tugomba kunyurwa n’iterambere ricagase kandi dufite imbaraga zo gukemura ibibazo byose […] Uko dukora vuba, niko ikiguzi cy’ibikorwa byacu kigabanuka, ni nako umutwaro w’ibidukikije uzagabanuka ku bana bacu.’’

Perezida Kagame yavuze ko guhangana n’ihindagurika ry’ibihe atari ibintu byaharirwa za guverinoma, ahubwo n’abahanga muri siyansi kimwe n’abikorera bagomba gutanga umusanzu wabo.

Ati “Mu kubikora bizagabanya kohereza mu kirere imyuka igihumanya, bigabanyeho igice cya dogere celcius ku bushyuhe bitume ubukungu bwacu buhagarara neza kandi bushoboke mu buryo burambye.’’

Umukuru w’Igihugu kandi yavuze ko gufatira umwanzuro hano i Kigali, birongera imbaraga amasezerano ya Paris agamije kurwanya ihindagurika ry’ikirere, binatange icyizere ko Umuryango Mpuzamahanga ushoboye guhangana n’ibibazo birenze n’ihindagurika ry’ibihe.

Perezida Kagame mu nama yiga ku ivugururwa ry’amasezerano ya Montreal

Umuyobozi Nshingwabikorwa w’Ishami ry’Umuryango w’Abibumbye ryita ku bidukikije, Erik Solheim, yavuze ko ibihugu bishyize hamwe bishobora guhindura amateka ku ishyuha ry’Isi, kandi ko bishoboka cyane.

Yavuze ko kuva hashyirwaho aya masezerano, ashobora kuba ariyo ari gutanga umusaruro kurusha andi yaba yarakozwe mu buryo ubwo aribwo bwose, ndetse aba bayobozi batahuye kugira ngo bavuge amagambo gusa, ahubwo ari ugushaka icyakorwa.

Ati “Dushobora gusa gukemura ibibazo dufite ari uko dukoreye hamwe. Nta gihugu gishobora gukemura ikibazo gisangiye n’ibindi kikabishobora ari cyonyine. Gufatanya ni ingenzi.’’

Umuyobozi Nshingwabikorwa w’Ishami ry’Umuryango w’Abibumbye ryita ku bidukikije, Erik Solheim

Yanavuze ko mu mbaraga zihuriweho byagize uruhare mu kugabanya kanseri y’uruhu yibasiraga abagore n’abana byose bishingiye ku kwangirika kw’ikirere, asaba ko ari nazo zikoreshwa muri uru rwego.

Byitezweho aya masezerano ya Montreal nibyemezwa ko avugururirwa i Kigali imyuka ya HFCs igakumirwa, bishobora kuzagabanya dogere 0.5 ku izamuka ry’ubushyuhe bw’Isi kugeza mu mpera z’iki kinyejana, binahuze imbaraga ku ntego z’Amasezerano y’i Paris ajyanye no gukora ku buryo igipimo mpuzandengo cy’ubushyuhe bw’Isi kitarenga dogere ebyiri kandi umuhigo ukaba ko icyo gipimo cyagera kuri dogere 1.5.

Mu gushyigikira iyi gahunda, Umunyamabanga wa Leta Ushinzwe Ububanyi n’Amahanga muri Leta Zunze Ubumwe za Amerika, John Kerry utegerejwe I Kigali muri iyi nama, aheruka gutangaza ko “amavugurura ya Kigali niyemezwa, abaterankunga bazatanga miliyoni $27 naho abagiraneza batange miliyoni $50” muri gahunda zo kurengera ikirere.

Minisitiri w’Umutungo Kamere ( Ubutaka, amashyamba, ibidukikije n’ubucukuzi bw’amabuye y’agaciro), Dr Vincent Biruta mu nama yiga ku kurwanya ibyuka byangiza akayunguruzo k’imirasire y’izuba
Iyi nama yitabiriwe n'abantu baturutse mu bihugu bitandukanye ku Isi
Minisitiri w'Uburezi, Dr Papias Musafili Malimba(ibumoso) mu bashyitsi bitabiriye iyi nama
Minisitiri w’Ubucuruzi n’Inganda n’Umuryango w’Ibihugu bya Afurika y’Iburasirazuba, Kanimba François(iburyo) na Minisitiri w’Ububanyi n’Amahanga n’Ubutwererane, Mushikiwabo Louise
Umuyobozi Mukuru w’Ikigo cy’Igihugu cyo kubungabunga ibidukikije(REMA), Colette Ruhamya
Perezida Kagame na bamwe mu bitabiriye inama

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved