"Ntitugashake impamvu z’ubukene, ndababwira ko twese turi abakene na leta y’u Rwanda ni inkene"

Yanditswe na Uwishyaka Jean Louis
Kuya 25 Mutarama 2017 saa 08:51
Yasuwe :
0 2

Umuyobozi w’Umuryango Mpuzamahanga urwanya ruswa n’akarengane ishami ry’u Rwanda (Transparency International Rwanda), Ingabire Marie Immaculeé yatangaje ko abantu badakwiye kujya bashyira ubukene mu bituma bishora mu bikorwa bya ruswa n’ibindi bitemewe n’amategeko.

Ibi yabigarutseho kuri uyu wa Gatatu ubwo umuryango ayoboye washyiraga ahagaragara ishusho y’uko kurwanya ruswa byari bihagaze mu bihugu bitandukanye mu 2016.

Hari abantu banyuranye bakora ibikorwa runaka binyuranyije n’amategeko maze bakitwaza ko baba babitewe n’ubukene butuma batabona ibyo bakeneye. Ibyo Ingabire Immaculée abyamaganira kure akavuga ko ibikorwa nk’ibyo biba bishingiye kuri kamere y’uwo muntu aho kuba ubukene, kuko hari n’abakennye kumurusha batabikora.

Ati “Munyemerere ntitugashake impamvu ngo umuntu ni indaya kuko ari umukene, ndababwira ko twese mu Rwanda turi abakene na leta y’u Rwanda ni inkene. Ugiye kujya ukora ibintu ngo urabiterwa n’ubukene,...ngo yibye kuko ari umukene, yariye ruswa kuko ari umukene, hari abakene kumurusha batabikora.”

Umunyamabanga wa Leta ushinzwe iterambere ry’abaturage muri Minisiteri y’Ubutegetsi bw’Igihugu, Vincent Munyeshyaka, yavuze ko abantu bakwiye kwimika ubunyangamugayo mu byo bakora byose, bityo ko ari byo bizagabanya ibyaha bishingiye kuri ruswa.

Ati"Ndagira ngo mbabwire ko ruswa ari umuco kurusha uko kijyana n’ubukene abantu bafite. Ikintu kijyanye n’ubunyangamugayo ni cyo cyatuma rwose tunarwanya ruswa bugaragara nubwo n’ibindi bikorwa bigamije kuyirwanya no guhana bigomba gukomeza."

Transparency International Rwanda isanga kugira ngo ruswa igabanuke hakwiye kubaho ubufatanye mu nzego zose harushaho guhana bihanukiriye abakora ibyo bikorwa.

TIR yakurikiye Umuvunyi mu gusaba Urukiko rwa Ruswa

Umuvunyi Mukuru Aloyisia Cyanzayire aherutse kugeza icyifuzo kuri Komisiyo ya Politiki, Uburinganire n’Ubwuzuzanye bw’abagore n’abagabo mu iterambere ry’igihugu mu Nteko Ishinga Amategeko y’u Rwanda, cy’uko kugira ngo ibyaha bya ruswa birusheho gukurikiranwa mu buryo bwihariye bikwiye ko hashyirwaho urwego rudafite izindi nshingano rubikurikirana bitewe n’uko imanza za ruswa ngo zikeneye umwihariko wazo.

Iki ni icyemezo cyakiranywe yombi n’umuyobozi wa Transparency International Rwanda, Ingabire Marie Immaculée, wavuze ko uru rukiko rukenewe.

Ati “Ngira ngo tubisabire hamwe n’umuvunyi ko hajyaho urukiko rwihariye ku byaha bya ruswa kandi ko n’abanyereza umutungo wa leta cyangwa abawugurisa mu buryo runaka, bafatwa na bo nk’aba ruswa kuko bo baraborohera gato kandi mu by’ukuri aba bantu ni babi cyane. Bari mu bantu batuma iterambere ritagerwaho ni no mubatuma ruswa ihabwa intebe.”

Umuyobozi w’Umuryango Mpuzamahanga urwanya ruswa n’akarengane ishami ry’u Rwanda (Transparency International Rwanda), Ingabire Marie Immaculée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza