Ngororero: Abatuye mu gasantere ka Kabaya barembejwe n’amabi akorerwa ahiswe ’Congo’

Yanditswe na Uwishyaka Jean Louis
Kuya 19 Ukwakira 2016 saa 10:22
Yasuwe : XX
141 71

Mu rugabano rw’Uturere twa Nyabihu na Ngororero twombi two mu Ntara y’u Burengerazuba, hari agace kiswe ’Congo’, karangwamo byinshi bitera urugomo mu rubyiruko birimo ubusinzi bukomoka ku nzoga z’inkorano, uburaya, urugomo n’ubwicanyi.

Aka gace gaherereye mu gasantere ka Kabaya, mu Kagari ka Gasura, mu rugabano rw’Umurenge wa Kabaya, mu Karere ka Ngororero n’umurenge wa Jomba mu Karere ka Nyabihu.

Umuhanda ugabanya iyi mirenge niwo wabaye umupaka, ku buryo ugiye muri ’Congo’ bimusaba kuwambuka gusa.

Abaturage b’Umurenge wa Kabaya, bavuga ko bamaze gutakaza abantu benshi bangirikira muri ’Congo’.

Ubonyentabaza Beatrice, utuye mu Mudugudu wa Kiyovu, Akagari ka Kabaya, mu Murenge wa Kabaya, agira ati “Congo nta byiza byaho, ni iwabo w’Imbyutsa (inzoga zihakorerwa) uburaya, ubuzererezi, urumogi, ubusinzi, urugomo rwica, nibyo biriyo gusa.”

Sekabanza François, na we ati “Iyo mu murenge wa Kabaya bafunze gucuruza inzoga, abanywi bose bihindira muri ’Congo’, ubundi bakahahurira n’indaya bakanywa bakageza bukeye, kandi iyo bahaze bararwana.”

Ubu buraya buvugwa muri aka gace ngo bumaze gusenya ingo nyinshi nk’uko bamwe mu bagore bo ku Kabaya babivuga. Bemeza ko umugabo wagiyeyo uwo bashakanye akurayo amaso bitewe n’uko ahita araruka kubera indaya nyinshi zihabarizwa.

Umunyabanga Nshingwabikorwa w’Umurenge wa Kabaya, Tuyizere Anastase avuga ko ibi biterwa no kuba ako gace kari kure y’ubuyobozi bw’umurenge wa Jomba, bituma bigorana kuhacungira umutekano.

Tuyizere akomeza avuga ko bafatanyije n’inzego z’umutekano bagerageza guhangana n’ibi bikorwa by’urugomo bihakorerwa.

Yagize ati “Ni hagati ya Jomba na Kabaya, hari n’abahita muri Zaïre. Niho banywera imbyutsa, haba n’indaya, ubuzererezi n’ubwomanzi. Tujya tuhakora umukwabu dufatanije na Polisi ikorera mu murenge wa Jomba”.

Abaturage bavuga ko hari abacuruzi baho bajya bafatwa bagafungwa, bitewe n’urugomo rukorerwa mu tubari twabo.

Nta muturage cyangwa umuyobozi ukubwira neza inkomoko y’izina ’Congo’ ryahawe aka gace, gusa ngo ryatangiye kuhumvikana nyuma y’uko abantu batangiye gutahuka bava muri Repubulika Iharanira Demukarasi ya Congo.

Abatuye Kabaya bavuga ko babangamiwe n'urugomo ndetse n'uburaya bukorerwa muri 'Kongo'
Tuyizere uyobora umurenge wa Kabaya avuga ko bahagurukiye ibikorwa bibi bikorerwa muri aka gace

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE