Nyabihu: Umugabo yatawe muri yombi akurikiranyweho gusambanya abana batanu

Yanditswe na Rabbi Malo Umucunguzi
Kuya 23 Nyakanga 2019 saa 01:53
Yasuwe :
0 0

Umugabo witwa Nizeyimana Marc wo mu Murenge wa Jenda mu Karere ka Nyabihu, yatawe muri yombi akurikiranyweho ko mu bihe bitandukanye, yasambanyije abana batanu baturuka mu mirenge yegeranye.

Ifatwa ry’uyu mugabo ryamenyekanye mu gitondo cyo kuri uyu wa Kabiri, nyuma yo gushakishwa n’inzego z’umutekano ubwo byari bimaze kumenyekana ko hari umwana w’umukobwa yararanye mu ishyamba, ufite imyaka icyenda.

Abo bana uko ari batanu Nizeyimana akurikiranyweho gusambanya, umukuru afite imyaka 12.

Umunyamabanga Nshingwabikorwa w’Akagali ka Bukinanyana uyu mugabo atuyemo, Umurerwa Cansilde, yabwiye IGIHE ko uwo mugabo yari amaze igihe akekwaho ibyaha byo gusambanya abana.

Ati “Ntabwo abo bana yabafatiye rimwe, yagiye abasambanya mu bihe bitandukanye, ni uko bamufashe ejo yasambanyije akana kitwa [Gakobwa, izina ryahinduwe] noneho aho bari bamushyize ku Murenge wa Bigogwe, abo bandi bose bakekwa babazanye bavuga ko ari we wagiye abasambanya.”

Ni abana bavuka mu mirenge itandukanye ariko yegeranye, ariyo Bigogwe, Jenda na Rubavu. Uwo mugabo kandi ngo afite umugore ndetse baheruka kubyarana abana babiri b’impanga, nta nubwo baruzuza imyaka ibiri.

Umurerwa yakomeje ati “Mbese wagira ngo ni indwara afite ntabwo afata abantu bakuru, ni utwana duto. Kandi iyo ngeso arayisanganywe, tumukorera raporo bagahita bamurekura. Hari nk’akana yari aherutse gufata ko mu Kagali ka Rega naho narahayoboraga, namukoreye raporo nka nyuma y’ibyumweru bibiri mbona bamurekuye. Kandi nako yari yakararanye ijoro ryose, twakabonye bukeye.”

“Ntabwo abararana mu rugo, arabafata akabajyana mu mashyamba, niyo abaraza ntabwo abazana mu rugo. Nk’uwo yafashe ejo yamukuye mu Kagali ka Bukinanyana amujyana mu wundi Murenge wa Bigogwe, ni ho bamusanze.”

Kugeza ubu abana bajyanywe kwa muganga ngo bakorerwe isuzuma, harebwe niba nta ndwara uwo mugabo yaba yarabanduje.

Igitabo cy’ibyaha n’ibihano mu Rwanda, giteganya ko umuntu wese usambanyije umwana, iyo abihamijwe n’urukiko, ahanishwa igifungo kitari munsi y’imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha.

Uyu mugabo yatawe muri yombi ashinjwa gusambanya abana batanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza