Nyabihu: Umukozi w’Akarere yafashwe yakira ruswa y’amafaranga ibihumbi 200

Yanditswe na Mukwaya Olivier
Kuya 24 Gicurasi 2019 saa 01:07
Yasuwe :
0 0

Dukuzimana Hermogène umukozi w’akarere ka Nyabihu ushinzwe abakozi yafashwe n’urwego rw’igihugu rushinzwe Ubugenzacyaha (RIB) nyuma yo gufatirwa mu cyuho yakora ruswa y’amafaranga ibihumbi 200.

Uyu mugabo afunganwe na Uwimana Faustin wamuhaye iyo ruswa.

Imvano y’iyi ruswa ni ibizami by’akazi ko kwigisha mu karere ka Nyabihu byakozwe taliki 6 Gicurasi 2019 uyu muyobozi agashyiraho umukomisiyoneri wagendaga ahamagara buri muntu wese wari watsinze ibizamini amwaka amafaranga kugira ngo abashe kubona uwo mwanya.

Dukuzimana yafashwe tariki 21 Gicurasi arimo kwakira amafaranga 200,000 Frw.

Umuvugizi w’urwego rw’igihugu rushinzwe ubugenzacyaha, Modeste Mbabazi yavuze ko hari abandi bagishakishwa muri iyo dosiye.

Ati’’Yafatanywe n’uwari amuzaniye ruswa y’ibihumbi 200 ayamuzaniye iwe mu rugo abandi bakaba bagishakishwa’’.

Amakuru atugeraho nuko hari abandi bagiye babona akazi nyuma yo gutanga ruswa kwa Dukuzimana bakaba bagishakishwa kuko batorotse.

Uwimana Faustin na Dukuzimana Hermogene bafungiwe kuri sitasiyo ya RIB ku Mukamira.

Ingingo ya Kane y’Itegeko ryerekeye kurwanya ruswa ivuga ko G umuntu wese usaba, utanga cyangwa wakira mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Ibihano bivugwa mu gika cya 2 cy’iyi ngingo ni na byo bihabwa umuntu wese utanga cyangwa usezeranya gutanga, mu buryo ubwo ari bwo bwose, indonke iyo ari yo yose kugira ngo hatangwe cyangwa hadatangwa serivise.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza