Kwamamaza

Nyabugogo: Habonetse imibiri y’abazize Jenoside mu igaraje

Yanditswe kuya 1-11-2016 saa 18:21' na Thamimu Hakizimana


Mu igaraje ryitwa ACOMER riherereye i Nyabugogo mu Murenge wa Kimisagara, mu Karere ka Nyarugenge, habonetse imibiri y’abazize Jenoside yakorewe Abatutsi mu 1994.

Iyo mibiri yabonetse kuri uyu wa Kabiri tariki ya 1 Ugushyingo 2016, nyuma y’igihe kitari gito bamwe mu barokotse Jenoside bavuga ko muri iryo garaje harimo icyobo cyajugunywagamo abantu bicwagwa muri icyo gihe ariko ngo ntibyitabweho.

Abafite abavandimwe babo bajugunywe muri icyo cyobo, bavuga ko babangamiwe cyane n’uburyo bamaze imyaka irenga itanu batanga amakuru y’uko muri iryo garaje harimo imibiri y’ababo kugira ngo bayishyingure mu cyubahiro ariko ubuyobozi bw’Akarere ka Nyarugenge ntibubihe agaciro.

Misigaro Jean Claude w’imyaka 56 uvuka mu Karere Nyaruguru, mu Ntara y’Amajyepfo, yagize ati “ Nanjye harimo mukuru wanjye nakurikiraga, ariko sinari nzi ko ari aha yiciwe kuko nabimenyeye muri Gacaca ya Nyabugogo ubwo umutangabuhamwa yabivugaga akanabyandikira CNLG. Gusa mbabazwa n’uburyo bitahawe agaciro ngo natwe dushyingure imibiri y’abacu mu cyubahiro.”

Perezida wa Ibuka mu Karere ka Nyarugenge, Rutayisire Masengo, avuga ko babangamiwe na ruswa bivugwa ko ihabwa abatuye muri aka gace kugira ngo badatanga amakuru y’ibyabereye muri iri garaje mu gihe cya Jenoside.

Yagize ati “ Twebwe ikitubangamiye ni ceceka iri hano kuko twibaza uburyo dushakira amakuru ku muntu umwe cyangwa batanu mu gihe aha hari abantu bahatuye kandi bazi neza ibyahakorerwaga kuko dufite amakuru y’uko abantu bagiye bahabwa amafaranga ngo batabivuga.”

Umunyamabanga Nshingwabikorwa w’Umurenge wa Kimisagara, Ruzima Serge, avuga ko impamvu batinze gusenya iri garaje ngo bakuremo iyo mibiri, byaterwaga n’uko abatangabuhamya batatangaga amakuru yuzuye.

Yagize ati “Ubundi abatangabuhamya mbere batangaga amakuru atuzuye neza kandi na nyir’ubutaka ntiyemeraga ko harimo imibiri y’abantu ku buryo yanavugaga ko nituhasenya tukayibura aritwe tuzubaka igaraje rye, ariko noneho ubu nibo bazahiyubakira."

Kugeza ubu iki gikorwa cyo gushakisha imibiri muri iri garaje kiracyakomeje.

Imwe mu mibiri yabonetse ahakorera igaraje Nyabugogo
Misigaro Jean Claude uvuga ko afitemo umuvandimwe we, ngo ababazwa n'uko amakuru yatanzwe atahawe agaciro mbere

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved