Kwamamaza

Nyagatare: Bahawe ibikoresho by’agaciro ka miliyoni 19,8 bizabafasha guhangana n’amapfa

Yanditswe kuya 13-10-2016 saa 11:22' na Hagengimana Philbert


Koperative y’abahinzi, Amizero Iwacu, yo mu Murenge wa Mimuli ho mu Karere ka Nyagatare, yashyikirijwe ibikoresho bifasha mu kuhira imirima, bifite agaciro ka 19,800,000 z’amafaranga y’u Rwanda, bizatuma batongera guhanga amaso igihe imvura izagwira cyangwa ngo batake ingaruka z’ihindagurika ry’ikirere.

Akarere ka Nyagatare ni kamwe mu dukunze guhura n’izuba ryinshi cyane mu gihe cy’impeshyi, rimwe na rimwe abaturage bagataka inzara n’amapfa.

Ni muri urwo rwego Ikigo cy’Imari, Atlantis MFI ku bufatanye na Ministeri y’Ubuhinzi n’Ubworozi biciye mu Kigo gishinzwe Ubuhinzi n’Ubworozi, RAB, hamwe n’Ikigega gishinzwe ubuhinzi n’ibiribwa ku Isi (FAO), cyateye inkunga iyo Koperative y’abahinzi babaha ibikoresho bizabafasha guhangana n’ibyo bibazo.

Ibyo bikoresho birimo imashini esheshatu zitanga amashanyarazi (generators), izikoreshwa mu kuhira imyaka (rain guns) cumi n’ebyiri, n’amatiyo y’amazi 240 mu migende azakoreshwa kuri hegitare 40 z’ubutaka.

Umuyobozi Mukuru w’Agateganyo wa Atlantis MFI, Alfred Ndayisaba, yatangaje ko ikoranabuhanga ryatangiriye muri Mimuli mu Karere ka Nyagatare rizabafasha kugera ku bandi bahinzi kugira ngo na bo bahabwe inkunga.

Yagize ati "Twabonye imyirondoro y’abahinzi basaga 250,000 kandi ubu amakuru tubakesha (Bio data, ibyerekezo bya GPS n’ibikorwa by’ubuhinzi by’ibanze) bidufasha kubaha ubufasha nk’ubu bakeneye. Dukorana n’abahinzi hifashishijwe telefone, kandi bashobora gusaba ndetse bakoreheza ubusabe bw’inguzanyo batarinze kuza kuri banki.”

Umuyobozi w’Akarere ka Nyagatare wungirije ushinzwe Ubukungu, Kayitare Didace, yashimye igikorwa kigamije iterambere ry’ubuhinzi mu cyaro ndetse n’uburinganire mu iterambere ry’abaturarwanda, byombi bikaba bigize intego z’iterambere ry’u Rwanda.

Umuyobozi ushinzwe ibikorwa byo kuhira imyaka muri RAB, Innocent Nzeyimana, yatangaje ko ari ibyo kwishimira kubona hari imishinga ifatika kandi isobanutse yo guteza imbere ku bufatanye bw’ibigo by’imari n’abahinzi baciriritse muri ako karere.

Uwari uhagarariye FAO, Dr. Otto Muhinda yakanguriye Koperative Amizero Iwacu kubungabunga ibikoresho bahawe anashimangira ko uwo muryango uzakomeza gutanga ubufasha ubwo ari bwo bwose, ku bahinzi bari mu gihugu hose, yaba abari muri koperative cyangwa abikorera ku giti cyabo.

Atlantis Microfinance Ltd ni ikigo cy’imari iciriritse gikora imirimo yo kubitsa cyemerewe gukora na Banki Nkuru y’u Rwanda tariki 15 Nzeri 2014, kikaba gifte icyicaro gikuru mu Mujyi wa Kigali.

Bamwe mu bahinzi bo muri Nyagatare berekwa imikorere y'imashini yuhira imyaka
Umuyobozi Mukuru w’agateganyo wa Atlantis MFI, Alfred Ndayisaba, avuga ko iri koranabuhanga rizagera kuri benshi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved